طلب مساعدة عاجلة من المهندس سمير عياد و باقى الاخوة

[samirayad]

بالنسبة للتبطيل فى اوقات لو لحقتها بدوسة البنزين ما بتبطلش و ده فى الحالات اللى بلاحظ تذبذب ال rpm و ميلها للتبطيل و فى حالات تانية بالاقى التبطيل سريع و ما بلحقش ادوس بنزين

جرب بلف أيدل تانى وحتتظبط كل أمورك

بإذن الله

[احمد على 1999]

بالاضافة لما قاله الاستاذ سمير
طالما البطارية اتفكت يبقى لازم تعمل ايدل ليرن تانى
و بالنسبة لريحة العادم و العربية باردة ده شىء طبيعى لان الاحتراق مش كامل
و بالنسبة لنطرة الابرة و السوستة ده طبيعى علشان كده انا بمسكه فى فوطة صفراء قبل ما شغل الكونتاكت و الفيشة واصله ليه
بالنسبة لاستهلاك 3 الى 4 لتر ازاى اتاكدت منها؟
و بأيد كلام الاستاذ سمير لو الايدل ليرن مجبش نتيجة يبقى جرب صمام ايدل تانى

و احسن حاجة علشان تحيد ال egr انك تفصل خرطوم الفيكيم منه و تتاكد ان الستم بتاعه (العامود الى تحت الرداخ الى هو بيقفل و يفتح مسار العادم) شغال طبيعى يعنى تجرب بصوابعك ترفع الرداخ و تسيبه المفروض الستم يطلع و ينزل كانه متحمل على سوسته و لزيادة التاكيد ان الى الستم بينزل على الاخر يبقى ال egr لازم يتفك و يتنضف مكان الفتحات و بعد ما يركب يستحسن فصل الخرطوم لضمان عدم تدخله تانى و زى ما قال الاستاذ سمير ممكن يتعمل قاعدة بلدى تسد الفتحات دى خالص

[lol64]

العواف عليكوا
ممكن اعرف ازاى بيتعمل الايدل ليرن
بجد انا بعشق القسم ده عشان الاستفاده منه وشكرا لمجهودكم يابشمهندس سمير ويابشمهندس احمد

[Bahi]

فاتحة اشراف مبشرة بالخير يا أحمد بك ... ربنا يوفقك

[احمد على 1999]

المشاركة الأصلية كتبت بواسطة lol64 العواف عليكوا ممكن اعرف ازاى بيتعمل الايدل ليرن بجد انا بعشق القسم ده عشان الاستفاده منه وشكرا لمجهودكم يابشمهندس سمير ويابشمهندس احمد

مخبيش عليك انا عارفه بالظبط للانوس لانى جايبه من كتاب الصيانة بس باقى العربيات مش عارف بس متاكد ان معظم العربيات ليها

على العموم بالنسبة للانوس
ال idle learn
1- يفضل تكون العربية باردة
2- افصل البطارية لمدة 10 ثوانى على الاقل ( يكفى فصل الطرف السالب )
3- وصل البطارية
4- افتح الكونتاكت على الوضع on بدون ادارة المتور لمدة 5 ثوانى
5- الكنتاكت off لمدة 5 ثوانى
6- الكنتاكت on لمدة 5 ثوانى ثم قم بادارة السيارة ( على الوضع p لو الفتيس اتوماتيك )
7- انتظر حتى تصل السيارة لدرجة حرارة التشغيل الطبيعية ( و ذلك عندما تعمل المروحة و قد يمر من 10 الى 15 دقيقة للوصول لهذه الحرارة )
8- قم بتشغيل التكييف لمدة 10 ثوانى ( لو بها تكييف)
9- افصل التكييف لمدة 10 ثوانى ( لو بها تكييف)
10- لو السيارة فتييس اوتوماتيك امسك فرامل اليد ثم اضغط على الفرامل و ضع الفتييس على وضع d
11- قم بتشغيل التكييف لمدة 10 ثوانى ( لو بها تكييف)
12- افصل التكييف لمدة 10 ثوانى ( لو بها تكييف)
13- بطل الماتور و بهذا تنتهى عملية التعليم


ده تقريبا مالوش لازمة الا فى حالات نادرة
لان لو البطارية اتفصلت لمدة تزيد عن عشرة ثوانى فبيتمسح من كميوتر العربية خطوات التعامل مع صمام ضبط هواء السلانسيه IDLE AIR CONTROL VALVE
لان كميوتر العربية هو الى بيحدد حركات الصمام (تقريبا حاجة و خمسين وضع للصمام) بناءا على الاتى
1- درجة حرارة المياه (يعنى زى الشفاط ايام زمان ) و انت بتسخن بيقبى قافل الهواء علشان يعلى نسبة البنزين الى الهواء و بعد ما العربية تسخن بالتدريج الصمام بيفتح حتة حتة من خلال الكمبيوتر الى بيعرف من خلال الثرموستات الكهرباء الى راكب على يمين البلوك تحت الكويل
2- لو شغلت التكييف المفروض لو مافيش تحكم فى الصمام ده العربية حتبطل على السلانسيه لكن الكميوتر لما يحس ان التكييف اشتغل (من خلال حساس ضغط الفريون) علاطول يحرك الصمام علشان يحافظ على RPM السلانسيه و العربية متبطلش
3- اثناء التغيير ما بين النقلات ( يعنى لما تدوس دبرياج ) الصمام ده بيحافظ على الRPM انها متقلش علشان العربية متبطلش
4- التوقف السريع تلاقى برضه الصمام ده معلى ال RPM شوية يديك فرصة لو حتمشى تانى تبقى سهل تطلع و لو طولت شوية فى الوقوف بيرجع ال RPM طبيعى تانى
5- و يمكن ليه حاجات تانية انا مش عارفها دلوقتى

المهم الطبيعى ان الكمبيوتر عارف
فلما بتفصل البطارية و تيجى توصلها تانى بعد مدة (10 ثوانى فاكثر) الكميوتر بينسى كل حاجة عن التحكم فى الصمام ده
فتعمل الخطوات دى علشان يتعلم IDLE LEARN
بس ممكن تمشى بالعربية من غير ما تعملها و تلاقى العربية مبرجسة كام يوم (او اقل من يوم لو مشييت و بطلت كتير) و تظبط لوحدها بعد كدة (يعنى بالبلدى اتعلمت لوحدها من تجارب الحياة من غير ما حد يعلمها)
و الى عايزها ما تبرجس معاه الكام مرة دول يعلمها هوا بالطريقة دى
و فى النهاية مفيش ضرر من عدم عملها

و تقريبا لباقى انواع السيارات الى بتحتاج ايدل ليرن حتبقى النظرية واحدة و الخطوات قريبة بس دقة الخطوات تفرق