ايه رايكم في موضوع غسيل الماتور ده ؟؟ بمية و صابون و لا جاز ولا مية نار

[Ahmed AlGamal]

انا غالبا لما بغسل العربية بخليهم ينفخو الماتور هوا بس مش اكتر .. مبخليهمش يقربو المية منه

بس كذا واحد قاللي لازم الماتور يتغسل عشان يشم نفسه و قالولي تغسله بجاز قلت اجرب مرة مش هتضر

المهم روحت للمغسلة وقاللي الجاز خلص روحت اشتريتله جاز و رجعتله وحط الجاز في المنفاخ ده و هاتك يا دعك

و بعدين قالي دورها و راح دايس على البتاعة اللي في الماتور و بتخليه يسرع وصوته يعلى ( الحركة اللي بيعملها الميكانيكي علما بيكشف على الماتور) قلتله ليه كده قالي عشان الجاز و الصدا يتحرقه

قلتله شكلك فاهم يا نصة

و بعديها راح برضه عاملها بمية و صابون و قالي لازم كده عشان يشيل الجاز

قلتله شكلك هتخربها يا نصة

و من ساعتها حاسس بحاجة غريبة في العربية وانا سايقها و بسمع اصوات غريبة لما بدوس فرامل (تسسسسسسسسس) و لما اجي الف ملف ضيق شوية نفس الصوت و حاسس ان نمط العربية اتغير بس اكيد ده تهيئات

انا عايز اعرف اراؤكم في موضوع غسل الماتور ده و كل واحد يقول بيغسل بايه

[Mido Madrid]

هوه انا كنت سالت هنا فى المنتدي وعرفت ان موضوع غسل الماتور بالميه وحش للماتور ولازم تبعد الميه عنه ولو عايز تغسله بيتغسل بحاجه اسمها الفوم ودي مبتضرش ومن وقتها معدتش بغسله بمية

[sehsss]

المواتير الحديثة ما بتتغسلش لا بجاز ولا بمياه ولا بصابون علشان الحساسات.. بتتغسل بحاجة اسمها (فوم)

[Mohammed Hamada]

ههههههههههه ماية و صابون كمان !!
أنصحك تفضل على موضوع الهوا و كل كام شهر أستعمل الفوم

[SAMER_ENGINES]

يا راجل ده انا راكب لادا 2105 و تعتبر عربية قديمة و مش انجيكشن و مش بغسل الموتور بميا و لا بجاز و الكلام ده لانى العربية بتطلع من البنزينة متبرجلة خااااااالص علما بأنى العامل بيربط كيس على الاسبراتير و البوبينة و الكلاكس لكن برضه العربية بتطلع مش مظبوطة خالص من غسيل الموتور و بتقعد فترة على ما ترجع لطبيعتها.
و أعتقد عندك ممكن يكون فى اجزاء لسه فيها مية و لما تنشف هترجع العربية لطبيعتها.