اعمل عقد مسجل عشان تجنب مشاكل التوكيل ولا ايه ؟؟

[mohamed.89]

هشتري ان شاء الله عربيه ريو 2003 من المالك الاصلي الرخصه فاض فيها لحد 2013
والفحص في 2014 معا العلم اني معرفش الشخص ده الا من خلال اعلان كان عمله للعربيه مش اكتر فهل الافضل اعمل عقد مسجل واروح انقل الرخص باسمي ولا اعمل توكيل وامشي بيه
ياريت ياجماعه اللي عنده معلومه اكيده وعن تجربه يفيدني بيها عشان ي اول عربيه اجيبها وشم عاوز الاقي مشاكل لا قدرالله في موضوع الملكيه وهل كده لو عملت عقد وروحت المرو هفحص تاني من اول وجديد فياريت لو حد عده المعلومه يقولهالي بس وحده وحده كده وبالتفصيل

[Emgrand]

اعمل عقد وتوكل على الله- بسبب انى معملتش عقد غرمت 500 جنيه مخالفات غير المشاوير والقرف (مع العلم كنت واخد شهاده مخالفات معليهاش ولا شلن)-وفى الاخر عملت العقد ودفعت المخالفه •♦♣♠♥

[ahany]

اولا . الف مبروك على السيارة
ثانيا . اعمل عقد مسجل ولا توقع مشترى ( فى تلك الحالة لن تلزم بنقل الملكية خلال ثلاثون يوم من تاريخ العقد )
ثالثا . عند نقل ملكية السيارة باسم حضرتك لازم تعمل فحص للعربية
وتقبل مرورى

[mmbader]

بسم الله الرحمن الرحيم
الف مبروك السيارة الجديدة وربنا ياتيك خيرها ويكفيك شرها ان شاء الله
فى ظل الظروف السيئة التى نعيش فيها من سرقت سيارات وخلافة فانصحك انك تعمل عقد مسجل فى الشهر العقارى على طول وتنقل ملكية فى المرور لان ده بياكد سلامة اوراق السيارة ومش عشان نوفر ) اكون قاعد قلقان ) فبنصحك ترخص السيارة باسمك والخطوات هى ( متزهقش منى لان دى الى حصل معايا من 6 شهور وانا برخص عربيتى )
1- البائع هيعملك عقد مسجل فى الشهر العقارى والمصاريف على المشترى + البائع هيحضرك شهادة مخالفات عن السيارة فقط ( الرخصة مادام سارية مينفعش تاخذ شهادة بيانات من المرور والله واعلم فى الموضوع ده ) وحاول تاخد صور بطاقات الرقم القومى الخاصة بصاحب السيارة والتوكيل الاول وصورة بطاقة الشخص الذى سيبيع لك
2- تاخد الاوراق السابقة ( لا تنسى تصويرهم اكثر من نسخة وبالذات العقد المسجل والتوكيل الاول و الرقم القومى الخاص بك لانك ممكن تحتاجهم فى المرور الى انت تابع ليه والمرور القديم الخاص بالسيارة والاهم ان تحتفظ لنفسك بنسخة من كل اوراق السيارة للرجوع اليها وقت الحاجة ) وقم بالذهاب الى المرور التابع له محل سكنك واشترى نماذج التجديد والترخيص حسب عدد السنوات التى سترخص بها ( سنة أو ثلاث سنوات للرخصة ) قم بكتابة البيانات الخاصة بك والخاصة بالسيارة الجديدة
3- اتجه الى عامل رفع البصمة وخد بصمة الماتور ورقم الشاشية على النموذج المعد لذلك ولا تحاول فك النمر دلوقتى لانك هتتحرك بالسيارة
4- اذهب للمهندس الفحص وقم بفحص السيارة وسيقوم المهندس هنا بكتابة بيانات السيارة خلف نموذج الفحص ويطلب منك ختمها من قائد الوحدة اولا ثم التحرك الى المرور التابع له السيارة والذهاب الى شباك ( مطابقة بصمة ) سيقوم الموظف باحضار ملف السيارة ومطابقة رقم الساسية ورقم الماتور الموجودين على نموذج الفحص الجديد مع الموجود فى الملف ويكتب البيانات سليمة وبعد ذلك اذهب واختمها من قائد الوحدة ايضا قبل الرجوع الى المرور الى انت تابع ليه ( حصلت امامى ان الموظف الخاص بالشباك رفض مطابقة البصمة لعدم وجود ختم النسر الخا ص بالمرور الجديد )
4 -ارجع الى المرور الى انت تابع ليه واذهب الى المهندس سيقوم بتوجيهة الى شباك داخل وحدة المرور يسمى استعلام امنى وده بيتاكد ان السيارة غير مبلغ بسرقتها وبيكتب الموظف كده وبيختم وارجع للمهندس واختم نموذج الفحص ( حاول تصوره وش وظهر بعد امضاء المهندس لان ده اثبات الن الاوراق سليمة ) وبكدة تكون اتاكدت ان السيارة سليمة ان شاء الله وهنا بقى فك النمر وخليهم معاك عشان تتوجه بيهم للشباك عند تقديم الورق
5- توجهة الى شركة التامين وسدد التامين الاجبارى على حسب عدد سنوات الترخيص
6- توجه الى شباك بيع طفايات الحريق وافحص الطفاية لو ممرش عليها خمس سنوات تقريبا او هتشترى واحدة جديدة بحوالى 125 جنية وهيختم على نموذج فحص الطفاية
7- قم بشراء ملف جديد من شباك التصوير حتى لا ترجع اليه لان موظف الشباك هيطلبة منك
8- توجه الى شباك نقل الملكية وخد دورك وقدم الورق وادفع قيمة الضريبة وهياخد منك النمر القديمة ويعطى السيارة نمر جديدة ويعمللك الرخصة او يعملك تصريح لمدة 6 شهور لحين ورود الملف الخاصة بالسيارة
9- بعد استلام التصريح او الرخصة راجع بياناتك كويس جدا وكذلك راجع بيانات السيارة من رقم شاشيبة ورقم ماتور وسنة الصنع واللون ( ممكن يكون فى اخطاء وحدث ذلك مع اخى ) ثم توجه الى شباك النمر واستلم النمر الجديدة ومساميرهم والف مبروك واسف جدا على الاطالى واى سؤال انا تحت امرك

[.EhAb]

تمام تمام