الحقونى فيرنا اوتوماتيك 2007 كانت زى الفل لقيتها مبتمشيش

[We.Hear.Your.Fear]

السلام عليكم يا جماعة
انا عربيتى فيرنا اوتوماتيك 2007 لسة شاريها من فترة..المهم العربية كانت ماشية وزى الفل ركنتها امبارح ورجعتلها لقيتها مبتمشيش جبنا ميكانيكى لكن كنا بليل فالباشا افتى وقال ان السبب فى طرمبة البنزين مش عارف بقى عاوزة تتغير ولا تتنضف ولا العيب فى حاجة تانية مع العلم انى بحطلها بنزين 92 لكن من محطة التعاون هل العيب فى طرمبة البنزين..هل العيب فى محطة التعاون والبنزين مغشوش..هل ممكن يكون صاحبها قبلى هاريها بنزين 80..افيدونى بالعيوب المقترحة لان انا سبت العربية مركونة ومش عارف اعمل فيها ايه وشكرا مقدما

[محمد فيصل]

من فضلك وضح العيب
ومدى حكم الميكانيكى الذى احضرته وافتى بطلمبة البنزين

[aymanlaw]

هل كنت بتسمع صوت عالى جاى من ورا يعنى من عند الطلمبة ,صوت ونه بعد مابتفتح الكونتاكت ,هل البنزين كان قليل جداً فى العربية ,ولا كنت لسه ممون يعنى مونت ورجعت من مشوارك وركنت على طول ,وإذا كان الموضوع طلمبة او هتشوف لسه حاول متغيرش الطلمبة كلها يعنى اشترى الموتور الخاص بها فقط وهو اكيد رخيص جداً وربنا يوفقك لما فيه الخير,ومتنساش تطمنا

[AbOnOrA]

بص مبتمشيش خالص ديه كلمة مش واضحة

هل مبتدورش خالص مثلا وقاطعة كهرباء خالص ... يبقى غالبا المشكلة فى البطارية او وصلات الكهرباء او الكنترولر

هل بتدور تكه واتنين بس كده وتبتطل ... كده احتمال عيب فى المارش او الكونتكت نفسه

هل بتدور لدرجة انك تسمع صوت المارش والتعتيله ديه بتاعة الدوارة وبعدين تبطل ... كده احتمال فعلاً مشكلة فى دورة تغذية الوقود بدايه من نوع البنزين ووجودة او عدمة للوصلات للطرمبة للرشاشات

للاسف اليقين فى الموضوع ده لازم بالكشف العملى على العربيه
بس المهم لو طلب منك قطعة غيار زى طرمبة البنزين مثلا
تخليه يفكهالك وتروح انت تجيبها بنفسك وتتفق مع بتاع قطع الغيار انها لو فيها حاجة تقدر ترجعها وتاخد فلوسك كمان يا تاخد فاتورة تضمن بيها الكلام ده يا على الاقل تاخدها كلمة منه وتروح راجع للميكانيكى جرب يا جدع اشتغلت يبقى تمام مشتغلتش خليه يركب القديمة ورجع الجديدة وشوف ميكانيكى تانى

وان شاء الله تطلع حاجة بسيطة

[We.Hear.Your.Fear]

شكرا جدا يا رجالة..انا انهاردة جبت الميكانيكى المعجزة قعد يلعب ساعتين زى المنتخب فى الطرمبة وجاب مصارينها وقال القلب عاوز يتغير روحنا جبنا قلب ركبناه العربية دارت وبطلت روحنا جبنا قلب تانى مدارتش خااااالص وبعد ما طلع عين اهلى 3 ساعات فى الموضوع دا قال العربية عاوزة كهرباااائى مااااشى يا فكيك روحنا جبنا الكهربائى الغريبة بقى انه بعد ما جه شيك على فيوز الطرمبة ولعب فيه العربية دارت وبقت اسد وطلع الفيوز فيه حاجة وجبت واحد جديد وجبت فلتر بنزين بالمرة

المهم الاسعار كالتالى قلب الطرمبة 90 جنيه فلتر البنزين 40 جنيه تقريبا اتخيط صح؟؟

طلب اخير يا جماعة انا داخل على صيانة ال90 الف ومش عارف اعملها فين وايه المفروض يتعمل والاسعار عشان انا عاوز افوق العربية كدة هل اعملها فى التوكيل واكع بنظرية ان الانسان لازم يكع مرة فى حياته وانا اسف عشان انا رغاى شوية