أكسنت rb وبعض الاستفسارات لملاكها

[ِA7med tarek]

بفكر ان شاء الله أجيب أكسنت rb وعندي بعض الاسئلة علشان اي حد هيشتريها يكون عنده فكره عنها قبل الشراء :

1- راضي عن اداء العربية ولو لا السبب

2-اسعار الصيانة الدورية ال 1000 - 5000 - 10000 - 20000

3- المميزات / العيوب اللي شايفها

4- الفئات واسعارها وتنصحني بايه

[sherifabden]

انا معنديش ار بي
لكن هجاوب عليك
بالنسب للسؤال الاول انا معرفش لاني معنديش العربية
اما اسعار الصيانات فانا برضو مش عارفها
المميزات
1/ باور ممتاز
2/ تكيف تلاااااااااجة
3/ وسع داخلي جميل
4/ متور جباااااااااار
5/ منظر داخلي وخارجي ممتاز للسيارة
العيوب
1/ الصاج الخارجي ضعيف بدرجة غبية اوي ابسط لمسة تلاقيه اتنى
2/ العربية طرية يعني لو حملت 2 او 3 ورا تلاقيها نامت منك وانا شفت عربيات اربي كتيرة جدا نايمة وهيا محملة للركاب وطبعا دا غير مناسب للطرق المصرية
3/ مشكلة عدم ثبات السيارة على السرعات العالية
وعلى فكرة انا عايز اوضح حاجة مهمة جدا بخصوص حكاية الثبات دي
الباور خفيف جدا بتاع العربية
علشان كده اللي معندوش خبرة بالسواقة مش هيعرف يتحكم بالعربية كويس فمش هتبقا ثابتة معاه
يعني مع التعود العربية هتبقا ثابتة جدا
اما عن الفئات واسعارها خش على الرابط دا
http://www.contactcars.com/compare_n...2690,2691,2692
انا انصحك تجيب فئة فيها اي بي اس وايرباج علشان الامان
وخلاصة الكلام ان الاكسنت ار بي مناسبة للشباب
وغير مناسبة للعائلات
وتقبل تحياتي
وتقبل تحياتي

[cooliokh]

معايا أر بى HL ABS/AB و العربية ثابتة فى السرعات العالية سواء كنت مركب 2 أو 3 لحد 180 و مجربتش أعلى من كدة مع إنها ممكن تجيب أعلى , و موضوع الباور ده مش سليم لأن فيها EPS يعنى خفيف وانت و اقف تقيل و انت سايق من أول الـ 50 وانت طالع أما عن العيوب ....
خد عندك:
-التكييف مش قوى زى تكييف الفيرنا أو الصنى و ده علشان فلتر الهواء اللى راكب فبها.
-المساعدين زفت.. زفت.. زفت لو عايز رأيى لازم تتعلى و تركب مساعدين رياضيين. (عفشة أنشف).
- الكاوتش اللى راكب فيها وحش ممكن تركب حاجة تانية أطرى.
- لو ناوى تعمل صيانة فى غبور أنصحك تعملها فى مركز الإليت لأن المركز التانى عيز حد فاضى يقعدلهم من 9 الصبح لحد 9 مساءا.
- اللى عملتها هى صيانة الـ 1000 و دية ببلاش مابتدفعش فيها مصنعية , بتدفع بس 300 اللى هما بتوع الزيت و الفلتر. و الباقى معرفش بكام.


من الأخر:
1- راضى عن الأدء العام بس مش 100% يعنى تقدر تقول 80%
2- أسعار الصيانة و قطع الغيار لسة ما تعرضتش لأى حاجة أقدر أقولهالك بس متهيألى معقولة
3- المميزات : أداء رياضى للمحرك بيستجيبلك بسرعة , صالون مريح , شكل ممتاز من برة و من جوة , ثبات كويس لو مش من هواة الطيران ( يعنى لو أخرك 120 -140 ) , الفتيس الستب ترونيك حلو و بيستجيب بشكل ممتاز, الصاج خفيف عشان السرعات و عشان الحوادث ماتموتش , أبعاد العربية حلوة قوى لو مابتحبش العربيات العريضة, إستهلاك البنزين مقارنة بإنك مشغل التكيف على طول ممتااااااز جدا , كومبيوتر الرحلات اللى فى العربية جميل قوى و بيديلك كل اللى محتاج تعرفه , كاسيت و سماعات حلوين مش هاقوللك جبارين أو ممتازين و أبالغ .
- العيوب زى ما قوات فوق.
4- الفئات و أسعارها مش عارفها بالتفصيل بس اللى معايا HL airbag,ABS,Spor Rims بـ 117 ألف وفية فئة تانية بـ 113 ألف دية أول فئة أوتوماتيك من غير ABS , بس فيها 2 air bags بس أكد على الكلام ده من وكيل غبور لأنى سمعت إن العربية زادت 1000 جنية.

أما بقى أنصحك بأية : فأنا مش عارف بجد شوف انت ممكن نستغنى عن أية و مش هاتقدر تستغنى عن أية و ظبط يا معلم.

أتمنى أكون أفدتك...

[abdohtaby]