مطلوب توضيح بعض مصطلحات الدوكو

[yasssser]

السلام عليكم

بنسمع فى اعلانات السيارات... رشة نظافة... ودى مفهومة طبعا.
لكن ما معنى:

• رشة دواخل
• رقم على القائم
• تحتاج سمكرة
  

[ahmed_eng2001]

المشاركة الأصلية كتبت بواسطة yasssser السلام عليكم بنسمع فى اعلانات السيارات... رشة نظافة... ودى مفهومة طبعا. لكن ما معنى: رشة دواخل رقم على القائم تحتاج سمكرة

اسمحلى اشارك و اشرح لحضرتك الى اعرفه من معلوماتى البسيطة

رشة دواخل .... يعنى العربية راشة دوكو فى حوض الماتور و جوة كابينة العربية
و ده الناس مش بتحبه لخوفها ان العربية يكون فيها عيب كبير او شرخ فى الحوض نتيجة حادثة او انقلاب و تم لحامه و بعد كدة تم دهان حوض الموتور بالدوكو
و يقال ان فيه سمكرية و بنوع دوكو بيخلو العربية و كانها مرشتش
يقال على رش الكابينة من الداخل ... رش دواخل برضو ... الناس بتخاف من القوايم ان يكون فيها شرخ او كسر او اتغيرت نتيجة حادثة فى الغالب

رقم على القايم ... معناه ان رقم الشاسيه بيبقى محطوط على قايم العربية ( القايم هو احد الدعامات الى بترفع السقف ) ممكن يكون محطوط على القايم الشمال ( باب السائق ) زى عربيتى

[zing0]

تمام زى ما الإخوة قالوا هنا
رش الدواخل بيكون معظمه لعيب فى السيارة :شرخ فى القواعد - عملت حادثة خطيرة و تم إعاده إصلاحها - ممكن كمان تكون عربية تجميع ( نصين مثلاً و يتلحموا فى بعض و يترشوا دوكو) - طبعاً كل ده بيختاج رش دواخل

بالنسبة لرقم القايم : بيكون فى رقم على أحد الأعمده الحامله لسقف العربية, و أحياناً تسمع كلمة ( رقم كارتيره ) و ده بيكون فيه الرقم على الكارتيرات - الغطاء المعدنى اللى أعلى الكاوتش فى جسم السيارة - و طبعاً معنى إن فى رقم كارتيرة يعنى الجزء ده مفيهوش بارومه من لحظة شراء العربية حتى الآن , لأنه لما بيكون فيه بارومه , يتم نقل الرقم من الكارتيرة للقايم و إصلاح الصاج.

ده على حد ما أعرف. و لازلت متابع للإستفاده

[eaglenest]

ياريت توضيح يعني ايه رش نظافة

[محمد السيد 78]

رش نظافة ده بيتم لما تكون العربية بها بعض الخدوش والحكات البسيطة التى يتم معالجتها بالمعجون فقط بدون سمكرة ثم يتم سنفرة المعجون بعد جفافه بكام يوم ثم يتم الرش لاعطاء المظهر الجمالى للسيارة من جديد