steel seal لعلاج شروخ جوان وش السلندر

[Vanditta]

السلام عليكم ورحمة الله وبركاتة

حد جرب قبل كدة اى منتج seal زى المنتج دة steel seal اللى وظيفتة انك لو عندك شرخ او تسريب فى جوان وش السلندر بيعالج الكلام دة !!
وهل هلاقية اصلا فى مصر ولا مش موجود

http://www.youtube.com/watch?v=3suQy44G_B0

http://www.youtube.com/watch?v=YL9Qj...endscreen&NR=1

هما برة تقريبا بيستخدمو المنتج دة عشان تكلفة تغيير الجوان غالية اوى عندهم

بس لو المنتج دة كويس فعلا انا ممكن استخدمة مش من باب التوفير
لأ من باب انى مستحرم افتح الموتور عشان شرخ بسيط فى جوان وش السلندر بيسبب حاجة زى رغوة بسيطة كدا فى غطا الردياتير بس
ومافيش سخونة زيادة ومافيش تسريب مياة على زيت ومافيش صعوبة فى الدوارة

ف بصراحة خايف افتح الموتور عشان المشكلة البسيطة دى وخصوصا ان مابقاش فى صنايعية عندهم زمة او بيفهموا والكل بقى بيئلف ويفتى ويشتغل شغل اى كلام عشان ترجعلو تانى وقطع الغيار اغلبها بقى مضروب يعنى حتى لو لاقيت صنايعى محترم ممكن حظى يقع فى جوان مضروب مصنوع من خامات رديئة ويضرب بعد شهر ولا شهرين وافضل انا بقى رايح جاى على الميكانيكى
ف اية رأيكو حد استخدم البتاع دة قبل كدة ؟!

[chiko]

ملهوش اي داعي .. طلما حصل تسريب للجوان يبقي يتغير ... لان السخنيه و الكبس كفيله انها توسع اي تسريب موجود حتي مع استخدام المواد ده

[احمد عمار]

انا كان عندى نفس المشكلة من وقت قريب والميكانيكى نصحنى اجيب علبة معالج شروخ البلوك من بنزينة موبيل علبة لونها اسود صغيرة سعرها حوالى 35 جنيه , وبتوضع مع مياه الردياتير بس بعد ما العربية تكون سخنت بدرجة كبيرة بتفضى العلبة فى الرديادتير وبتفضل مدور العربية بعدها , بصراحة انا كنت فاكر الميكانيكى بيشتغلنى ومكنتش مقتنع انها ممكن تعمل حاجة بس بعد يومين لاقيت الزيت اختفى من مياه الردياتير , بس وبعدها بحوالى اسبوع حليت الموتور وعملت الجوان , بس انا مش عارف بالظبط هي فاعليتها بتستمر أد ايه .

[Hisham.Elgazzar]

لأ منصحكش بيها ، دى زى علاج مؤقت جدا
و90% من الشروخ او المشاكل فى الوش مش بتنفع معاها

بترمى الفلوس فى الأرض بتحتاج حوالى علبتين منها
العلبة النهردة Block Seal ب 40 جنيه ، يعنى 80 جنيه ممكن يترموا فى الأرض فى لحظات
تفك الوش وتشوف لو عاوز بتوضب عند خراط ولا حاجة وبعدين يتركب مع جوان أصلى وخلصت الحكاية

[Vanditta]

المشاركة الأصلية كتبت بواسطة Hisham.Elgazzar لأ منصحكش بيها ، دى زى علاج مؤقت جدا و90% من الشروخ او المشاكل فى الوش مش بتنفع معاها بترمى الفلوس فى الأرض بتحتاج حوالى علبتين منها العلبة النهردة Block Seal ب 40 جنيه ، يعنى 80 جنيه ممكن يترموا فى الأرض فى لحظات تفك الوش وتشوف لو عاوز بتوضب عند خراط ولا حاجة وبعدين يتركب مع جوان أصلى وخلصت الحكاية

الموضوع مش موضوع فلوس يا استاذ هشام يعنى لو على 80 جنية ماشى مش هتفرق بس اهم حاجة (مافتحش الموتور) عشان شبهة فى شرخ فى الجوان

والله اعلم دة شرخ ولا المياة فيها حاجة بس انا على طوول بحاول اتوقع الاسوء عشان ما اتفاجئش بعد كدة


مشكووور جدا استاذ هشام على الرد والاهتمام