شهادتى عن الانتخابات الرئاسية 2012

[AbOnOrA]

انا كنت كتبت موضوع امبارح بليل بس مقدرتش اكملة وانهارده ان شاء الله قدر المستطاع هكملة واضيف عليه

الجزء الاول ( بتاع امبارح)
ليلة الوقفة

بالرغم من حالة الترقب والقلق المبرر السائد حتى اللحظات الاخيرة الا انى انا شخصياً كنت متفائل جداً امبارح لاسباب كتير يطول شرحها بس اهما انى لقيت لنفسى دور فى العملية الانتخابية وده شرف كبير كنت اتمناه وتحقق الحمد لله
وحبيت طبعاً اكتب لكم من امبارح وبداءت فعلاً بس كنت راجع مقتول والله وكان لازم اكون فى اللجان الصبح بدرى فاعذرونى وزى ما قولت ان شاء الله هتابع معاكم اكتر ان شاء الله

ليلة امبارح فعلاً كانت اشبه بليلة وقفة وصابح عيد وبحكم انى قررت اشارك عملياً فى الانتخابات كان عندنا اجتماع فى حملة تخص احد المرشحين واكاد اجزم ان الوضع كان متاشبه فى جميع الحملات وكان كالتالى


شغلتك على المدفع بررم

طبعاً كلنا عارفين الافيه ده من فيلم اسماعيل يس
ده بشكل كبير جداً كان الحال فى مقار الحملات الانتخابية امبارح
توافد للمؤيدين على المقارات دورات وتدريب وخطب وحماسيات والاهم تعرف دورك هيبقى ايه فى الانتخابات

طبعاً كل واحد ليه بررم غير التانى بس انا هحاول اسرد لكم كل انواع البررم المتوفرة

1- وكلاء المرشحين
ودول من اهم الناس فى الحملة ودورهم ان يبقى معاهم توكيلات رسمية من المرشح وبيها بيلفو على الجان يطمنو على الدنيا ويتابعو مع باقى الناس

2- مندوبى المرشحين وهم زى الوكلاء وبرضو معاهم توكيلات رسمية بس دورهم منحصر فى لجنة انتخابيه واحدة او زى ما بيقولو كل تركيزة على الصندوق الانتخابى نفسه

3- منسقين
ودول ادوارهم متنوعة مابين التنسيق خارج اللجان او مابين ادارات الحملات والمندوبين والوكلاء

4- منسقين خارجيين
ودول دورهم خارج اللجان مابين
1- نقل الناخبين بواسطة اتوبيسات او ميكروباصات الى مقار الانتخابات
2- استقبال الناخبين فى المقار 3- توزيع اكل وخلافه على المندوبين فى المقار

يعنى دول اللى فاكرهم دولقتى

..... يتبع

[AbOnOrA]

زى ما قولت فى المشاركة اللى فاتت الجو كان كله يتلخص فى شغلتك على المدفع بررم وانا زى باقى الناس كنت مستنى اعرف ايه البررم اللى هقوم بيه

وبما انى مكنتش متابع اوى فى مقر الحملة بتاع العباسية ( كنت بتابع مع مقر المطرية اصلاً) فانا كنت جديد شكلاً للناس فوقع من نصيبى بررم من نوع خاص

مهمة توصيل الناس للمقار الانتخابية

اول ما المنسق قالى كده قولتلة انت بتتكلم بجد ؟؟؟
احنا كنا بنتريق على الاخوان علشان بيعملو كده ازاى احنا كمان نعمل كده !!!

هو باستعباط : نعمل ايه احنا بنسهل على الناخبين

انا : طيب العربيات هيبقى عليها دعاية ولا لاء
هو : اه بوسترات
انا : اه يعنى دعاية
...
انا اسف يا باشا مقدرش اعمل حاجة تخالف قناعاتى
هو : بصلى بمزيج من القرف والاستغراب وطيب

ونفضلى خاااااااااالص بعدها

بعد شوية بدات اتخنق ... انا مش عارف دورى ايه بالظبط واللى اعرفه ان هيتعملى توكيل ولسه التوكيلات كلها مجاتش لحد ما جت 12 بليل ومفيش تدريب ولا ورشة عمل الا وحضرتها وزاكرتها وناقشتها ومش هاين على اروح للتصويت وبس بالعكس ده لو كان اطلب منى ابات قدام اللجان حتى كنت هبات

((( امال مين اللى هيبات قدام اللجان )))

وديه كانت المفاجئه

اولاً اللى عرفته امبارح ان الترتيبات ان اللى هيتولى (البيات قدام اللجان) حزب النور والجماعة الاسلامية بالتعاون مع حملة ابو الفتوح
والاخوان المسلمين بالتعاون مع الحرية والعداله

ثانياً وديه المفاجئه التانية اللى اكدت الاولى انهارده

ان اغلب تمثيل المرشحين فى اللجان كان قوامة من حملات المرشحين الاسلاميين + حمدين احياناً
فى غياب شبه كامل وغير متوقع من ممثلى حملات الفلول وبقيه المرشحين

يعنى كنا متوقعين ان كل لجنة يبقى فيها من 5 - 10 مندوبين عن المرشحين فى كل لجنة
فاذا بالحضور كله لمندوبى ابو الفتوح و مرسى و الاشعل وحمدين

طيب نسيبنا من موضوع البيات (مندوبى المبيت ) ومندوبى اللجان ونرجع لحكايتى او شهادتى عن ليلة امبارح

خلص اليوم امبارح على انى مش عارف بالظبط هعمل ايه بس يمكن بعد المناقشات والاحتكاكات والتعرف اكتر سبت انطباع مع الناس او حاجة فلقيت الناس بتتصل بيا حوالى الساعة اتنين بليل انهم محتاجينى فى العباسية على وعد بانهم هيعملولى التوكيل اثناء اليوم وسلام سلام

وبعد المكالمة بدات اكتب الموضوع عن ليلة امبارح وفى الحقيقة منمتش غير بعد الفكر من كتر التفكير

يعنى انا طبعاً ضد ان اشارك بصفة غير رسمية او فى عمل غير قانونى او غير اخلاقى وفى نفس الوقت تاييدى للمرشح ومشروعة وما يحملة من مبادىء فى اولها اتمام الثورة كان محفز لى بانى اروح واشارك باكثر من مجرد التصويت
وفوق ده وده انهارده واليومين دول عندى تلال من المشاوير وكلها مهمة واغلبها حكومى عايز يخلص قبل الساعة 12 - 1 بالكتير
طب العمل
وقعدت اكلم نفسى طول الليل اروح مروحش
اروح احط صوتى واروح اشوف حالى واشغالى
ولا اروح واستقتل بنفس روح الثورة فى اهم معاركها وربنا اخرها

..... يتبع

[AbOnOrA]

ملخص وتحليل لليلة الانتخابات

- فيه فعلاً بعض الحملات تجاوزت الصمت الانتخابى لكن اكتر الحملات كان مشغولة فعلاً بالاعداد ليوم الانتخابات واعتقد لو كانت فترة الصمت طالت او كانت كافيه كان هيحصل خروقات اكبر ويمكن من كل التيارات عملاً بمبداٍ ( مهما كمان بيعملو )
وطبعاً اتمنى يكون فى نضوج اكبر من مسئولى الحملات فى النقطة ديه مستقبلاً ان شاء الله

- نظام الانتخابات بعد الشروحات القانونية والمناقشات وباجماع الاراء حتى الان هو الافضل فى تاريخ مصر كلها باعتبار النظام العام (نظرياً)
واللجنة كمان بذلت جهد مرضى جداً فى شرح النظام لكل المنظومة المشاركة فى العملية الانتخابية قياساً فى الفترة الزمنية القصيرة

- مازال التيار الاسلامى محتكر قدر ضحم من الفعالية فى تنظيمياً وعملياً
( تطبيقاً على الارض)
( القدرة على الحشد والتنظيم)

وبالبلدى التيار الاسلامى حتى الان هو الاكبر حشداً للناس على مستوى المشاركين فى العملية الانتخابية ( كل انواع البررم اللى قولتها الاول )
وبصراحة الوضع ده خلانى استرجع ايام الميدان وخلتنى اتغاظ اوى من ناس بحترمهم زى حمدين وابو العز الحريرى وخالد على اللى كانو بيتكلمو بكل الثقة عن حجم المؤيدين ليهم وان الناس هتفاجء بالاصوات ومن بدايتها مش شايفين له مندوبين حتى ولا وكلاء حتى !!!

- بالرغم من ان المحصلة العملية من ليلة امبارح بالنسبالى كانت اقرب للصفر الا انى استفدت كتير جداً من التدريب والمناقشات والاراء

- اخر حاجة بكرر عليها نصحاً لكل الشباب ان محدش يندفع بالحماس للمشاركة فى اى فعالية او عمل يخالف مبادئه او محل شك بالنسباله ... اعمل بس اللى تقتنع بيه ... علشان تعرف بجد تعملة

....... يتبع

[kimo10]

هههههه بررام اسمع ديه
ذهبت اول يوم الساعة 10 للادلاء بصوتى فلم يكن موجد مندوب للمرشحين سوى منوب الاخوان ولكنه كان خارج اللجنة يجلس على كرسى ويشرب الشاىفادليت بصوتى ورجعت اخذت زوجتى كى تدلى هى الاخرة بصوتها وكان هناك مندوبى حملة ابو الفتوح يدلون الناخبين الى اللجان الانتخابية والمفاجاءة عبد الانتهاء وجد مندوب الاخوان لسه واصل اللجنة وهو صديقى جدا كانت الساعة حوالى 11 فلا تحزن من البرررام لان الاخوان الاكثر تنظيما ليس لهم دور فى الساعات الاولى وربنا يولى من يصلح

[mhamdy75]

ربنا يولى من يصلح