هو الواحد مش هيعرف يسوق في البلد دي ولا إيه

[dandashx]

بعد ما قضيت 3 اسابيع باتعلم على تاكسي واحد صاحبي، ربنا كرمني وجبت عربية، ومن يوم ماجبتها والسواقة بالنسبالي بقت هم تقيل على قلبي.

محدش بيصبر على حد. الكلاكس من ورا شغال طول الطريق. امسك الحارة اليمين، الاقيه لازق فيا وبيدي كلاكس. أسحب شوية ألاقي ميكروباص حدف يمين مرة واحدة عشان يحمل راكب. أتبرجل مبقاش عارف أدي اشارة وانقل الحارة الشمال، ولا أفرمل. لو فرملت بلاقي اللي جاي من ورايا بيزعق، ولو اديت اشارة ونقلت للحارة الشمال الاقي كلاكس من على بعد 200 متر، وميبطلش غير بعد مايعديني.

طب امشي على مهلي وأدي انتظار. مش بيفرق مع حد. اعمل ايه؟ هو لازم اسحب بالعربية واقعد أخبط واحك في عربيات الناس؟ ولا الأحسن أمشي على مهلي واحافظ على عربيتي وعربيات الناس لحد ماتمكن من السواقة.

فكرت أعلق ورقة عالعربية أقول فيها إني مبتديء، بس مش هاسلم من التريقة.

أنا بطبعي مش متهور، وحابب الالتزام في السواقة جدا. وعارف يعني ايه التزم بحارتي، ومستحيل انقل من حارة للتانية أو ادخل اي شارع جانبي من غير مأدي اشارة قبلها بوقت كافي وابص في مرايتي كويس.
بس المثالية دي مش بتجيب نتيجة. بقيت حاسس اني سواء اديت اشارة او مديتش مش هتفرق. الموضوع عافية ودراع.

ابقى داخل في شارع ضيق، الاقي اللي جاي في وشي بيشد أوي عشان يمشي أكبر مسافة، ويخليني ارجع لورا بدل مايرجع هو. ويبقى داخل الشارع وشايفني جاي ومع ذلك يسحب بالعربية، ويحسسني اني ماشي عكسي، رغم ان الشارع مفيهوش اتجاهات وفي وسط منطقة سكنية.

ويا سلام بقى لو العربية بطلت مني. بتبقى مناسبة إن كله يعمل حفلة، تلاقي الكلاكسات شغالة من كل الاتجاهات. بدل مادور العربية واطلع بيها في 3 ثواني، ممكن آخد 10-20 ثانية بسبب اللخبطة والتوتر من كلاكسات الناس.

أعصابي تعبت وبقيت اخاف من السواقة، رغم اني استنيت اليوم اللي اجيب فيه العربية ده من زمان، عشان ارتاح من المواصلات واريح الجماعة. ورغم اني بحب عربيتي اوي بس بقيت باشيل هم نزولي بيها في الشارع.

النهاردة خبطت في كورولا من ورا خبطة خفيفة ، شاورت لصاحب العربية واعتذرتله، وهو مشكور اتقبل اعتذاري والموضوع عدى على خير، قمت واخد العربية في اول مكان فاضي قابلني وركنتها وروحت البيت مشي. ومع ان الموضوع عدى على خير، بس كان عندي احساس بالذنب، وبقول لنفسي، هو انا لما ربنا كرمني وركبت عربية هاعمل في الناس اللي كنت من يومين باقول للناس متعملهوش.

احساسي بالخوف على العربية والخوف على عربيات الناس، وإحساسي ان السواقة مش متعة زي ماكنت فاكر في الاول، بالعكس طلعت شد اعصاب وتوتر واستعجال وزعيق. كل ده جابلي احباط.

هو اللي انا فيه ده عادي لأي حد مبتديء، ولا انا واخد الأمور على أعصابي؟
طب تنصحوني بإيه عشان ابقى باسوق كويس ومستمتع بالسواقة ومبقاش حاسس بالخنقة دي في كل مرة اركب العربية؟
كل محترف سواقة دلوقتي، لما كان بيتعلم كان كده برضو؟ طيب عدى المرحلة دي ازاي؟
حد يساعدني يا عالم.

[mr_astra]

لا بامر الله باقصى تقدير اسبوع من النهردة وهاتبقى زى الفل بس لو سمحت بلاش الجملة دى خالص انساها واشطبها باستيكة

أنا بطبعي مش متهور، وحابب الالتزام في السواقة جدا. وعارف يعني ايه التزم بحارتي، ومستحيل انقل من حارة للتانية أو ادخل اي شارع جانبي من غير مأدي اشارة قبلها بوقت كافي وابص في مرايتي كويس.

[henryelahlawy]

بص يا باشا ولا يهمك من اي كلاكسات اعمل نفسك مش سامع ويتحرق الي مش عاجبه وامشي على اقلل من مهلك والي مش عاجبه يمشي بعيد عنك وصدقني الحل انك تسوق في زحمة وزحمة من الي تخنق عشان تاخد خبرة انك تمشي وتقف من غير ما تبطل منك العربية وده حيخليك تتمكن من التحكم فيها واهم حاجة ما تستعجلش وتسوق واوعى تركن وتسيبها كده تاني لان ده مش حل وكلنا في الاول اتحكينا واتخبطنا بس طول ما انت مش بتجري حتبقى بسيطة وسيب الطريق يعلمك وانت من نفسك حتعرف امتى تجري وتشد وامتى تمشي على مهلك ربنا يوفقك

[reda310]

بص اعمل الصح وخلاص وبراحتك خالص ومتحطش فى دماغك عشان متعقدش نفسك
وطول ما انت ماشى صح حط صوابعك في عين اى حد يفتح بقه ومحدش هيقدر يغلطك
وربنا يعدى الايام دى على خير والبلد تظبط انشالله

[Moh.Osama]

ولا يهمك يا معلم كلنا كنا كده فى الاول ميهمكش من حد وامشى براحتك لغايت ماتتعود على العربية وتقدر تتحاكم يها كويس ومتعرفش ليه تحس ان الناس اللى مش عجبها انك عطلت ولا ماشى براحه دول تقولش اتولدوا على دركسيون ماهم كانوا كده فى الاول بس الناس بتنسى يلا خير ان شاء الله ومتقفلش نفسك وحاول تشجع نفسك وتاخد الموضوع تحدى بينك وبين نفسك وان شاء الله لم تتمكن كده وتبيقى سويق هتعد تضحك على الايام ديه وتبقى ذكريات حلوه