محتاج مساعدتكم جدا يا جماااعة .. بخصوص عربيتى الاوكتافيا

[Islam Samir]

انا اشتريت اوكتافيا 98 مانيوال من فترة .. و قبل ما اشتريها كشفت عليها وقالولى دواخل فبريقة .. شاسيه سليم .. موتور كويس (متوسط 70%) .. رشة برة
المهم بعد ما اشتريتها صرفت عليها حوالى 4000 جنيه مابين فلاتر و سيور و طنابير و تيل و شكمان جديد و كاوتش .. بس للاسف لقيت العربية بتطلع دخان كثيف اوى لما بعلى ال ار بى ام .. سألت قالولى طقم شنبر و يستحسن تغير الموتور كله - معرفش ازاى من 70% لمحتاج شنابر فجأة كدة؟؟- .. شوية و التكييف باظ و اكتشفت انه مش الاصلى بتاعها اصلا و لازم اغيره كله بالاصلى؟؟!! .. و العربية بدأت ترعش فى الطلعة _و دى غالبا طقم دبرياج؟؟!!_ كل ده فى شهر؟؟!! .. المهم قلت خلاص همشى بيها كده لحد ما اهلك الموتور و الدبرياج خااالص .. و بعدين انزل الحرفيين اسقطلها موتور و فيتيس اوتوماتيك و تكييف اصلى و بالمرة اغير ضفيرة الكهرباء عشان الكهربائى لما شافها قاللى الضفيرة ملعوب فيها!! .. كل ده و انا راضى بقضاء ربنا و قلت مش مهم خسارة المبلغ ده بعدين كأنى دفعت الفرق عشان اجيب عربية اوتوماتيك (الكلام ده يكلفنى حوالى 12000 جنيه!!!) .. رغم ان ثقتى فى العربية و استمراريتها معايا بقت شبه معدومة
المشكلة بقى ان العربية اتخبطت منى خبطة بسيطة .. رحت للسمكرى اردها اكتشفت المصيبة ان العربية مغيرة لون .. السمكرى فضل يتنطط لحد ما قاللى العربية الحوض بتاعها فبريكة بلونه الاصلى .. لكن البيبان و السقف و الشنطة و الرفرف ورا مغيرة لون و رشة دواخل !! يعنى العربية متجمعة ؟!! و البهايم بتوع البنزينة قالولى فبريقة؟؟
طبعا فكرت ابيع وش .. بس المشكلة انى استحرم اعالج الخبطة و ابيعها لحد من غير ما اقوله على اللى فيها .. و لو قلت هيتخسف بيها الارض
فهل لو رحت لحد كويس يقدر يشيل الدهان اللى تحت الدهان ده .. ويرش على نضافة .. و اصرف على العربية و اكمل بيها و خلاص؟؟ ولا هى كدة مش امان و الكلام ده ليه تأثير على كفائتها كدة كدة و المصاريف مش هتبان؟؟ انا مش عارف اعمل ايه يا جماعة؟؟ .. عايز حد ليه خبرة فى الموضوع ده يفيدنى ارجوكم .. خصوصا انى بعد اللى اكتشفته من العربية دى فى شهر و نص مش عايز اقولكوا حالتى النسية عاملة ازاى
معلش طولت عليكم .. و متشكرجدا لسعة صدوركم

[thesward_6000]

بقولك ايه يابوب صلى عالنبى كده واهدى الحوار مش وحش اوى زى مانت متخيل والواحد مش بيتعلم ببلاش اولا مرشه مش مرشوشه كله بيمشى وادام العربيه شاسيها مابيخبطش ولا فى يرومه ولا فى اى شرخه يبقى كويس وفكره تغير اللون ده ممكن تيجى لاى سبب كان بس اهم حاجه ان مفيش لحامات وحتى لو فيها لحامات وماشيه لحد دلوقتى تبقى ملحومه كويس وحوار الماتور 70 % ديه لما بيقولوها هما بيشوفو كبس الماتور نفسه مش بيقيسو بايظ في ايه ولا مش بايظ ايه والتكيف اكيد مش باظ خالص يمكن عايز فريون او مروحه لان مروحه الاسكودا لو مكنتش لوحدها زى الجديد تبقى مروحه الرادياتير نفسه وبتحمل ضغط عليها ولو المروحه وحشه مش هايشتغل التكيف وحوار ضفيره الكهربا ممكن يكون بيقولك كده عشان بيقلب رزقه لان الضفيره لو ملعوب فيها العربيه من اول دوسه بنزين هاترعش منك وهاتبطل وهايبقى يوم اسود حوار الضفيره مش سهل ومايخليش اانوار العربيه ولا العربيه نفسها سليمه والى خلاها تمشى شهر بضفيره بايظه مش هاتعدى الشهر وتبوظ وممكن يكون الى باعهالك لعب ف الضفيره عشان يغير بسببها حاجه مش موجود لها بديل وهو لاقالها البديل بانه يغير حاجه ف الضفيره مش اكتر انت عالج الخبطه عادى جدا ورجعها للونها الاصلى لو الدواخل اسود خليها كلها اسود احسنلك وساعتها يبقى انت رجعتها لاصلها يمكن الى رشها رشها عشان لونها مكنش عاجبه فى ناس كتير كده بس بتقول ايه الى هايحصل لو غيرت ماتعرفش ان فى واحد هايبقى مقلق منهم انما فكره انك تشيل الدهان ديه مش وحشه بس ملهاش لزمه لو هاترجعها للون الاصلى ولما ترش رش اسكينز عشان تبقى تقيله ماتروحش بسرعه وف كلا الحالتين لما تسمكر الخبطه لازم تمعجن وهاتتشال البويه الوحشه ويتحظ بويه على نضافه
وموضوع رعشه الماتور ده ممكن تكون فى الااخر قواعد ماتور مش مربوطه مش كل حاجه تتخيل انها مصيبه ماتخافش كده وانا عايزك تكلمنى ف يوم ابص عالعربيه ديه وانا هاوديهالك لميكانيكى حبيبى يشوف الحوارات الكتير الى انت فيها ديه خد رقمى اهو 01001813608 بس اهم حاجه سيبك من حوار تسقط والكلام ده ويوم ماتسقط تروح بورسعيد تجيب ماتور من هناك متجبش حاجه من هنا وانا ف كونتينر جاى من المانيا فيه قطع غيار تبع واحد قريبى لو لقيت فيه مواتير لعربيتك هاجبهولك ده لو لقينا ان مفيش حل ف الماتور بتاعك بس ربنا يسهل ادام ماشيه يبقى خلاص لسه فيها روح بس انا حاسس والله اعلم انك اديتها لواحد حد فيها بنزين 80 بوظ كل حاجه فيها بس مانحكمش قبل مانشوف عموما كلمنى بس وهانبص عليها واحده واحده

[Pop301]

ممكن تعرفنا اشترتها بكام عشان نقدر نفيدك لان مشكله العربيات دي انك مهما تحط فيها سعرها هو هو انا كان عندي نوبيرا وان 97 اشترتها ب 37 وصرفت عليها في سنه 5000 وبعتها والله با 37000 ما زادو جنيه بس انا اتعلمت عليها ولما لاقيتها خسعت في ناس نصحتني قالتلي اللي هتصلحه بيها حطه في واحده احدث لانك مهما تحط ضايع عليك فلو انت متاكد اللي هتحطه فيها هيرفع سعرها يبقي اتوكل علي الله واعمل المطلوب بس وروح لصنايعي بيفهم لان في كتير بيضخمو الامور عشان يشتغلو ولو لاقيت اللي هتحطه مش هيرجعلك يبقي بلاش منها وخدها من اولها وبيعها بس حاول متخسرش فيها لان المستعمل ده لما بيفتح مبيقفلش والله عن تجربه وبيبقي وقف حال وعطله وبهدله كل يوم في ورشه وتضييع وقت وحراب بيوت تبقي جايب العربيه عشان تريحك تلاقي العكس تماما معلش طولت عليك بس هي دي ضريبه المستعمل وبالزات في مصر يا صاحبي http://annunci.ebay.it/auto-e-moto/a...ia/prezzo14:3/ عشان تشوف الفرق بينا وبينهم

[mhamdy75]

قدر الله وما شاء فعل

واضح انها كنت مخبوطة من الخلف

إعتبرها اتخبطت منك وعملتها

وربنا يعوضك طالما استحرمت تضحك على حد

غير الموتور والفتيس وماترشش دوكو

[khaabas]

متصرفش عليها مليم بعها على حالها وقول للى هايشتريها على اللى فيها هتخسر صحيح بس هتخسر اكتر لو اقعدت معاك كتير وكمان انت نفسينا كرهت العربية واسال مجرب وربنا يعوض عليك