128 مستعمل اوماروتى جديد..

[amgadshah]

اصدقائى ..انا فى حيرة دلوقتى..انا كان نفسى فى 128 مستعمله فى حدود 20000 جنيه بس مش لاقى حاجة عدله كل واحدة فيها مشكلة شكل..
دلوقتى عندى خيار تانى انى اقدم ال20000 مقدم فى ماروتى زيرو وادفع 500 جنيه شهريا..
طبعا عارف ان ال128 اعفى من الماروتى بس بصراحة انا معايا سيات 133من سنة 2007 توبتنى الصراحة فمعنديش استعداد اجيب حاجة تعدى من قدام الميكانيكى مش تروح تتصلح عنده بس.

وياريت لو سؤال بس هل الماروتى تقدر تسافر من اسكندرية للقاهرة او من اسكندرية لمطروح؟؟

وشكرا مقدما.

[sayed2077]

بص حضرتك لو جبت 128 موديل 2008

برضوا لازم تكون مفرغ نفسك انك تعمل زيارات للدكتور الميكانيكى والكهربائى

وانا من رائى هات ب 20000 الف اللى معاك مازدا 323
و هاتها خليجى سيدان مش هاتش باك وسيارة عملية جدااا وحتى لو صلحت فيها حاجه بتعيش مش شهرين وتبقى عاوزه تتغير زى ال 128 غير كدا بقى عربيه عفيه يعنى مش كل شوية تروح عند عفشجى و سمكرى يلحملك الشاسيه بتاعها كل شوية وغير كدا الموديل الخليجى الى بقولك عليه موجود فيه تكيف وفى الاغلب بيبقى مش شغال علشان بيبقوا مهملين بيه فلو روحت تصلحه يبقى افضل وهيبقى معاك عربيه فيها تكيف يرحمك من حر الصيف اللى مبيرحمش بس لو جبت ماروتى اقل ما فيها مش هيبقى معاك تكيف وعربيه صغيرة غير كدا المصاريف اللى هتدفعها 500 جنية كل شهر هيبقوا حمل عليك بس لو جبت ماذدا اللى بقولك عليه اول 5 شهور تظبط الحاجات اللى صاحبها القديم كان مهمل فيها وبعد كدا تستريح من همها ويبقى مصاريفك عليها بعد كدا بنزين و زيت وفلاتر بس وربنا يوفققك للشىء الصالح

[crime]

انت لو بتكلم على عربيتبن بسعر متقارب يبقى طبعا الماروتى وعلى فكره هى تقدر تسافر من القاهره لاسكندريه من غير ما تستريح

تقبل تحياتى

[mhamdy75]

لو بتفكر فى الزيرو هات الماروتى

وسافر براحتك بس ماتدوسش فيها جامد

[amgadshah]

المشاركة الأصلية كتبت بواسطة sayed2077 بص حضرتك لو جبت 128 موديل 2008 برضوا لازم تكون مفرغ نفسك انك تعمل زيارات للدكتور الميكانيكى والكهربائى وانا من رائى هات ب 20000 الف اللى معاك مازدا 323 و هاتها خليجى سيدان مش هاتش باك وسيارة عملية جدااا وحتى لو صلحت فيها حاجه بتعيش مش شهرين وتبقى عاوزه تتغير زى ال 128 غير كدا بقى عربيه عفيه يعنى مش كل شوية تروح عند عفشجى و سمكرى يلحملك الشاسيه بتاعها كل شوية وغير كدا الموديل الخليجى الى بقولك عليه موجود فيه تكيف وفى الاغلب بيبقى مش شغال علشان بيبقوا مهملين بيه فلو روحت تصلحه يبقى افضل وهيبقى معاك عربيه فيها تكيف يرحمك من حر الصيف اللى مبيرحمش بس لو جبت ماروتى اقل ما فيها مش هيبقى معاك تكيف وعربيه صغيرة غير كدا المصاريف اللى هتدفعها 500 جنية كل شهر هيبقوا حمل عليك بس لو جبت ماذدا اللى بقولك عليه اول 5 شهور تظبط الحاجات اللى صاحبها القديم كان مهمل فيها وبعد كدا تستريح من همها ويبقى مصاريفك عليها بعد كدا بنزين و زيت وفلاتر بس وربنا يوفققك للشىء الصالح

أولا شكرا للرد والاهتمام..
هو طبعا المازدا كعربية تضرب ال128 والماروتى طبعا..
بس مش منتشره عندنا فى اسكندرية ومش عارف ممكن اجيبها ازاى ولو لقيت حتكون حالتها ايه؟؟
حوار يعنى.