إزاي تاخد حقك من التوكيل

[TELEBK]

السلام عليكم ورحمة الله وبركاته
في الفتره الأخيره بقت سمة التوكيلات اللامبالاه وعدم إحترام العميل ، وتكبير الدماغ وعدم مراعاه ربنا في تصليح العطل ، وده كان مر عليا مع العربية ، لحد ماكرهت نفسي وحسيت إن حقي بيضيع ، المهم علشان حضرتك تاخد حقك ، إعمل التالي ( وبالمناسبة الطريقة ديه متجربة ) والحمد لله أخدت حقي تالت ومتلت :
1 - حضر كل ورق العربية والصيانة وكل ورقة ذكر فيها إنك بتشتكي من حاجة فيها وصوره .
2 - صور رخصة العربية إللي مثبوت فيها موديل العربية .
3 - إعمل شكوي علي النت بكل حاجة حصلت فيها بالتفصيل ، وإذكر فيها قله الذوق بتاعت التوكيل والمهندسين الموجودين فيه وترجمها الي الإنجليزيه أواليابانيه أو الصينية " وده من علي جوجل ترجمه " ، وإبعتها للشركة الأم ، وإذكر ليهم إنك حتنشر الشكوي ديه علي منتديات السيارات المحلية والدولية ، وحتنشرها في جرايدهم بالإيميل ، وحتعرضها علي لجنه هندسية محلية ودوليه ، وحترفع عليهم قضية سواء علي الشركة الأم أو الوكيل المصري .
4 - إعمل توكيل لمحامي كويس في الشهر العقاري وده حيكلفك 35 جنيه ونصف ساعة من وقتك ، وخليه يبعت ليهم إنذار لصاحب الشركة بعدم صلاحيه السياره وعدم مطابقتها للمواصفات القياسية والهندسية ، ويطالبهم بتغييرها وتعويض يساوي مبلغ السياره ، ده غير النشر في الجرائد الرسمية وخصوصا المهتمة بالسيارات .
4 - إبعت نسخة من كل ده برضة بالإيميل للوكيل المصري وإرفق بيه كل صور الشكاوي بتاعتك ، وإرفق بيه الشكوي بالإنجليزي أوالياباني أوالصيني ،وعرفه إنك حترفع قضية ، وكده كده إنت بتصرف والعربية واقفه ، فخليها عليا وعلي أعدائي ، .
وإن شاء الله هما حيخافوا علي سمعتهم وحيعملوا لحضرتك كل حاجة إنتي عايزها ، وخصوصا لما يلاقوا الموضوع جد وفيه إنذار وقضية ومحاكم .
وبالتوفيق
د / خالد

[screamseko]

( وبالمناسبة الطريقة ديه متجربة ) والحمد لله أخدت حقي تالت ومتلت

طريقه حلوه فعلا بس ياتري كانت ايه مشكلتك واتحلت ازاي؟

[Amr Shehta]

: CONGRA~238:

[TELEBK]

المشاركة الأصلية كتبت بواسطة screamseko طريقه حلوه فعلا بس ياتري كانت ايه مشكلتك واتحلت ازاي؟

كانت ال ABS فيها مشكلة والعربية في الضمان وكانت عايزه تتغير ،وعايزين يحملوني سعر تغييرها 4000 جنيه ، بس الحمد لله بعد ماعملت الخطوات ديه غيروها علي حسابهم ودفعت بس المصنعية .

[crime]