يا جماعه عربيتى بتحرق بنزين كتير ومش عارف اعمل ايه

[YA122]

السلام عليكم انا معايا لانوس 2007 بحط بنزين 92
جربت اعمل الكيلومترات دى لقيت ان 20 لتر بيعملو 150 ك بالعافيه او 160ك

دلوقتى
ايه هيا الحاجات الى ليها علاقه باستهلاك البنزين الكتير بحيث اقدر اكشف عليها او
اعمل لها صيانه ضروريه عشان اكون متأكد ان العربيه مش هتحرق بنزين كتير

[samirayad]

العربيه عامله كام ألف

ومغيرتش فلتر هواء وبوجيهات من أمتى .........؟

وحساباتك دى جوه البلد ولا على طريق سريع

وكيف تقوم بالحساب ...........؟

[YA122]

غيرت البوجيهات مكملتش 3000 كيلو
وكمان فلتر الهواء مكلش 10000 كيلو ايه بقا المشكله
160 ك داخل البلد على 20 لتر ؟
عايز اعرف فى حاجه تانيه ليها بتأثر على استهلاك البنزين

[ahmed_elmagree]

ياسيدى احمد ربنا انا اللى معايا عملتلها حسبة 130 كيلو ف الصفيحة

[حسام البورسعيدى]

على فكره الاستهلاك كده مش وحش .. ومعتقدش ان ده بسبب مشكله فى العربية ..

المشكله اعتقد فى نمط سواقه حضرتك .. حاول تكون سواقتك اكتر سلاسه وانقل الغيارات فى مواعيدها صح .. ولا بدرى اوى ولا متاخر اوى ..

الفيصل فى استهلاك العربية للبنزين هو مقدرا الضغط على دواسه البنزين .. يعنى خليك عارف ان كل ما تدوس بنزين اكتر انت كده بتحرق كميه بنزين اكبر .. فحاول تتدرب على السواقه بسرعه معقوله باقل دوسه بنزين ممكنه ..

جرب الكلام ده واكيد هتلاقى فرق باذن الله ..


ممكن كمن تكون بتحسب الاستهلاك وانت كنت بتمشى فى الزحمه جوه البلد .. وطبعا الزحمه بتخليك ماشى بسرعات قليله او تقف فى اشارات لفترات طويله نسبيا . طبعا كل ده والعربية دايره وبتحرق بنزين ولكن مش بتعد كيلوات كتير .. علشان كده ممكن تلاقى نفسك حرقت 20 لتر فى مسافه 160 كيلو فقط ..

على العموم الاستهلاك المتوسط بالنسبة للانوس جوه البلد المفروض يكون فى حدود 180 كيلو فى الصفيحه (20 لتر) .. وعلى الطريق فى حدود 200 - 220 كيلو فى الصفيحه ..

طبعا ده كل مع اسلوب سواقه عادى مش سرعه وحرق ولا هادئ اوى برضو ...