مشكلة غريبة ويارب ماتكونش كبيرة

[abu_ruqayyah]

السلام عليكم ورحمة الله وبركاته
ادخل فى الموضوع على طول
انهردا وانا بدور العربية الصبح فى الجراج مرة واتنين وتلاتة مش عايزة تدور على الرغم انى مشغل الشفاط ، فقلت اقفل الكونتاكنت واريحه وارجع احاول تانى كالعادة فلاقيت صوت بعد ما قفلت وكأن فى حاجة شغالة فرحت فاتح الكبوت لاقيت المارش فى حتة نار صغيرة مولعه فرحت داخل تانى العربية قعدت اقفل الكونتكنت وافتحه لغاية ما الصوت ما سكت وبعدين قمت قايم مطفى النار اللى كانت ماسكه فى المارش - طبعا ما اقولكمش على ريحة الشياط - بعد ما طفيتها قفلتها واديني فى الشغل بس مش عارف بقي دا حصل ليه وازاى وياترى دي مشكلة ممكن تكون كبيرة قوى ولا ايه .....ربنا يستر

[كيا سيفيا]

خير ان شاء الله

[تامر ديزل]

بسيطه ان شاء الله دي ممكن قفله في المارش .. حل المارش واكشف عليه وبالمره غير الكابل بتاعه لو كان شايط

[abu_ruqayyah]

اشكرك يا استاذ كيا - اعذرنى انى ماعرفش اسمك -

على مشاعرك الطيبة
وطبعا الاستاذ تامر حبيب قلبي بشكرك على اهتمامك ويارب تكون بسيطة يارب وان شاء الله يكون زي ما قلت انت وتطلع مجرد قفله - بس انا صراحة اتخضيت قوى لما شوفت النارلدرجة انى كنت بنفخ هوا من بوقي كأنى بحاول اطفي شمعه ولا حاجة وفيييييييين عبال ما افتكرت ان معايا ميه فى العربية رحت دالق عليها وطفيتها وقعدت اضحك وانا راكب التاكسي على منظرى وانا بحاول اطفى النار ببقي - :w6w2 005041113562663

[sharooo]

ممكن البطاريه يكون فيها قفله اوالكابل الكهربا بتاع البطاريه يكون واخد ارضي من اي حته..
راجع على المرش والبطاريه وجميع التوصيلات وربنا ييسر الحال