كيف انقل ملكيه سياره بامان تام ؟؟؟

[wael890610]

السلام عليكم ورحمه الله
انا ناوى اشترى عربيه من سوق مدينه نصر خلال اسبوع ان شاء الله
وزى ما الناس كتبت فى المنتدى انه يفضل اشترى عربيه يكون رخصها باسم مالكها واسجل فى الشهر العقارى..
المشكله بقه واللى محتاج خبراتكم فيها ازاى اطمن ان العربيه لما اجى اسجلها فى مرور الاسماعيليه اللى بانتمى اليه هاتمشى الامور بسلاسه وما يظهرش مشاكل ..
هل شهاده البيانات والمخالفات تكفى ولا فى اجراء ممكن اعمله يطمنى اكتر
تانى حاجه انا سمعت انى لازم ارجع اعمل مطابقه بصمه تانى من المرور اللى كانت تنتمى اليه العربيه هل ده صحيح ......مع العلم انى هاشترى عربيه رخصتها ساريه وباسم مالكها
واخر طلب فى سطرين ... لما اجى اشترى تنصحونى ادفع مقدم بسيط واسجل الباقى فى عقد البيع الابتدائى .... ولا اكيش واخلى مبلغ بسيط لما بعد استخراج شهاده البيانات والمخالفات من المرور .......وشكرا للجميع

[hazem_khidr]

عموما دلوقتي او قبل كده
و سواء هتشتري من السوق او من اي حد
يا اما اشتري العربيه من اسم المالك
يا اما من تاجر و يكون ثقه مش من اي واحد و خلاص
و برضه في الحالتين يتم التسجيل فورا
اول حاجه بتشوف العربيه و تاخدها في الشهر العقاري اللي في السوق و تدفع جزء كبير من الفلوس و تسيب 3000 جنيه لحين استخراج شهاده البيانات و المخالفات
لو معاه شهاده المخالفات و رخصه العربيه سا ريه و لوحات السياره كمبيوتر
يبقي مش محتاج شهاده بيانات و تكفي الرخصه و شهاده المخالفات و عقد البيع المسجل
و تروح المرور بالورق اللي معاك
و تفحص العربيه و تسجلها باسمك في المرور
و غالبا مش بتحتاج مطابقه بصمه ولا حاجه

[wael890610]

حبيبى حازم باشا .... تسلم يُمناك
بس تقصد نمر الكومبيوتر .... النمر الجديده اللى فيها حروف
وهل العقد هايكون مثبت فيه الجزء المدفوع والمتبقى ... ولما ادفعه الباقى اعمل ايه علشان اغير العقد ...
واخيرا كان نفسى فى تاكيد على موضوع البصمه دى .... هل هاضطر اروح بيها المرور القديم تانى يوم (السبت)ولا اروحها فى نفس اليوم للاسماعيليه ...
عذرا اذا كانت اسئلتى للناس كتير بس اكيد فى ناس كتير هاتستفيد من علمك يا حازم باشا