مساعده في كبوت ال 128 (البطاريه اتسرقت )

[khaled_bibo]

بسم الله الرحمن الرحيم

قدر الله و ما شاء فعل

امبارح كنت نايم و صحيت على صوت جارتنا بتخبط و تقول ان في بتاع 15 عربيه بطاريتهم استرقوا

يادوب سمعت الكلمه نطيت من على السرير و نزلت بفتح الكبوت مالقتش البطاريه

و مش عاوز اقولكوا الواحد نفسيا عامل ازاي مش عشان البطاريه نفسها عشان حاجة اتاخدت

غصب عنك

روحت سألت على اسعار البطاريات لقيت الكلورايد السايله ب 320 جنيه!!!!!!!!!!!!!!!

و الجافه نوع اسمه bendex كان ب 450 جنيه !!!!

و اللي اتسرقت كنت جايبها نوع اسمه Marchtelli كانت ب 300 جنيه (كانت احلى حاجة في العربيه و الله ) يوم 2/1/2011 و

مكملتش سنه سبحان الله يعني الحرامي هيبعها بب 50 جنيه و يجبلوا حتتين بانجو و يحرق دمي انا بس

دلوقتي عاوزكوا تفكروا معايا في حل لكبوت ال 128 عشان البطاريه متتسرقش مع استبعاد الاتي

1- فكرة جنزير حوالين البطاريه عشان جاري كان عملها في 128 برضه و كسروا السلسله و خدوا البطاريه ( و العربيه كانت متغطيه كمان !!!!!!!)

2- فكرة الانذار عشان برضه موقفتهمش

3- فكره الجراج عشان انا عندي جراج تحت بيتي و سيبت العربيه مره قبل كده فيه و الفيران اكلت الفرش و السلوك و اتبهدلت عشان اعملهم

و معلش طولت عليكما بس حبيت افضفض لأني جايب اخري

[كومندا]

ظبط الجراج وقفله كويس بحيث الفران متلاقيش مكان تدخل منه وحتى والعربيه جوه الجراج اقفل الابواب والازاز عشان مفيش فار يخش ياكل الفرش
وربنا يعوض عليك فى البطاريه

[sayed2077]

طبعا ربنا يعوض عليك
بس ليا كام سؤال
1:حضرتك المنطقه بتاعتكوا اسمها ايه
2:الساعه اللى اتسرقت فيها البطاريه
3:هل الشارع ساكت ولا فيه حركه
4:هل الشارع مضلم

انا مستنى رد حضرتك وهقولك حلين على الماشى
1:تدخل العربيه الجراج (و انا مش فاهم الفران بتاكل الفرش ازاى والعربيه مقفوله ) ولو كنت بتقفلها يبقى بقى تجيب سم بتاع فران وجبنه رومى وطماطة وتحت فى كل حته فى الجراج سم فران على الجبنه الروومى والطماطم

2:تاخد البطاريه بس تحطها عندك فى البيت او الجراج

بص احنا عندنا فى المعادى راجل بقالة بتاع 15 او 20 سنه بيجى كل يوم من الساعه 9 بليل لغاية الساعه 8 الصبح وبيفضل ماشى طول اليوم عمال بيصفر بصفاره علشان بيحرس العربيات بتاعتنا وكل واحد عنده عربيه بيديله 20-30 جنيه فى الشهر وربنا يستر

[khaled_bibo]

المشاركة الأصلية كتبت بواسطة sayed2077 طبعا ربنا يعوض عليك بس ليا كام سؤال 1:حضرتك المنطقه بتاعتكوا اسمها ايه حدائق حلوان ابراج النصر 2:الساعه اللى اتسرقت فيها البطاريه بين الساعه 12 , 3 الفجر 3:هل الشارع ساكت ولا فيه حركه ساكت 4:هل الشارع مضلم لأ منور انا مستنى رد حضرتك وهقولك حلين على الماشى 1:تدخل العربيه الجراج (و انا مش فاهم الفران بتاكل الفرش ازاى والعربيه مقفوله ) ولو كنت بتقفلها يبقى بقى تجيب سم بتاع فران وجبنه رومى وطماطة وتحت فى كل حته فى الجراج سم فران على الجبنه الروومى والطماطم 2:تاخد البطاريه بس تحطها عندك فى البيت او الجراج بص احنا عندنا فى المعادى راجل بقالة بتاع 15 او 20 سنه بيجى كل يوم من الساعه 9 بليل لغاية الساعه 8 الصبح وبيفضل ماشى طول اليوم عمال بيصفر بصفاره علشان بيحرس العربيات بتاعتنا وكل واحد عنده عربيه بيديله 20-30 جنيه فى الشهر وربنا يستر

بالنسبه ان الفيران بتدخل العربيه ده يرجع الى ان العربيه مفتحه من تحت و من عند الطابلوه فكده بيدخلوا على الفرش

[abu_ruqayyah]

نفس اللى حصل معايا تقريبا من شهر ونص وبطارية عربيتي اتسرقت وكان عندى بطارية جافة كانت لسة بضمانها وقدر الله وماشاء فعل وبطارية اخف من العربية كلها والحمد لله وعملت الأتى
1- ركبت انظار و اشتريت قفل دريسكيون لان معنى انه فتح الكبوت او دخل العربية فدا كدا خطر يستلزم اخذ الاحتياط
2- غيرت الكوالين بتاعة الابواب وكمان رحت للسمكرى ظبطلى الصوباع بتاع الكبوت اللى بينزل فى القفل وحتى انا لما باجى افتح الكبوت وانا فاتح القفل بيفتح بصعوبة
3- ودى حاجة مهمة جدا انك توري وشك كتير للناس اللى حوالين فى المنطقة عشان يعرفوا ان العربية دي بتاعتك وكمان تتعرف عليهم لو انت ما تعرفهمش ولو حتى ترمى السلام عليهم كل يوم


وربنا يعوضك ويعوضنا خير يارب