تجربتى مع الغاز فى الفيرنا

[M.TONSY]

انا عايز احكى لكم عن تجربتى مع الغاز فى الفيرنا

المميزات

1-اقتصادى جدا المتر المكعب 45 قرش والاسطوانة بتاخد حوالى 14متر ده بيختلف من محطة لاخرى حسب الضغط يعنى تفويلة الاسطوانة بتودينى من الجيزة لحد اسكندرية بـ 5 جنيه حاجة زى الفل (ماشاء الله)
2-بيحافظ على نظافة المحرك والزيت لانه العادم بتاعه بخار الماء وليس الكربون فبالتالى بيحافظ على عمر الزيت بيكون اطول وعلبة البيئة والرشاشات والزيت اللى بيقعد 5000 بغيره على 7000 وبيبقى صعبان علية بلاقيه نظيف ولونه فاتح
3-لما بستخدم التكييف بيبقى عامل اكنى حاطط 95 نفس الاداء مبسمعش تسقيف

نيجى بقى للعيوب وهى ليست جوهريه
1-الشنطة الاسطوانة بتبلع حوالى 30% من الشنطة يعنى كبيرك تاخد شنطة سفر كبيرة وهاندباج وشكرا
وعلى فكرة الاسطوانة بالنسبة لتقلها هى حوالى 60ك بس بصراحة مش ماثرة خالص فى مسائلة وطو العربية او المطبات الحمد لله
2-القسط قاطم وسطى بصراحة بس انا شايف حلاوته تبان اكتر بعد ماخلص الاقساط ادعولى
3-حريق الغاز ابطئ من حريق البنزين يعنى سحب البنزين اعلى لان الغاز بيضغط زى الفريون فيبقى ساقع بياخد وقت فى الاشتعال بس انا شايفه ميزة الصراحة لانه بيريحنى من صوت التسقيف اللى انا شايفه غلط على الموتور مش باسمعه خالص مع الغاز
4-نيجى بقى لموضوع الموتور اللى مخوف الناس كلها
انا شخصيا بعمل حاجة وهى انى لازم اسخن العربية بنزين كويس وبعد كدة احول لغاز وعلى فكرة النظام الجديد اللى بيركبوه دلوقتى للانجيكشن بيحافظ على حاجات كتير غير القديم التعبان بتاع زمان اللى كره الناس فى الغاز
ايه هو الجهاز الجديد ليه كومبيوتر مشابه لبتاع العربية ده بيخلى العربية اجبارى تشتغل بنزين عكس القديم فده بيحافظ على المارش وبيدى فرصة للصبابات تشتغل علشان الكاوتش ماينشفش وبيحافظ على المارش اللى كان دايما بيبوظ فى النظام القديم
مسئلة العمرة فى الطبيعى العربية بتحتاج تعمر على 250000ك ممكن ازيد ممكن اقل حسب الاستخدام بس ده المتوسط
فى الغاز بيقال انه على 220000ك برده المتوسط فلو حسبنا الفرق ده قصاد التوفير اللى الغاز هيوفره خلال الفترة دى هنلاقيه يشترى حوالى 5 مكنات فيرنا ويمكن اكتر
بعض النصائح لو هتعمل الموضوع ده
1-اول ما تدور تسمى الله طبعا وتسيب العبية تسخن براحتها بنزين وبعد كدة علشان تحول غاز دوس (امبليه) يعنى زود الاكسريتر لحد 3 RPM وتشيل رجلك براحة تسمع تكة ولمبة الغاز نورها يثبت تبقى كدة قلبت غاز ولما تيجى تبطل مستحب بس مش لازم انك تبطل وانت قالب بنزين وعلى فكرة انت لما بتطفى العربية هى بتقلب اوتوماتيك بنزين
2-من المستحب انك تخلى العربية يوم فى الاسبوع تعمل مشوار بنزين
3-المحافظة باستمرار على نظافة فلتر الهواء
4-تغيير البوجيهات كل من 15000ك-20000ك ببوجيهات NGK شمعة2
وبكدة اختم معاكم تجربتى مع الغاز فى الفيرنا فانا حبيت انى افيدكم فى هذا الموضوع زى ماانا استفدت من خلال تجربتى الشخصية ... ولو فيه حد عنده اي استفسار يبقى يقولى

[hazem_khidr]

شكرا علي سرد التجربه
بصراحه حكايه الغاز انا متخوف منها
علشان الموتور و خصوصا اني بخاف من اي حاجه تحصل له
طب بالنسبه للسحب يا تري سحب العربيه عامل ايه؟؟؟

[nawwara]

انا سألت سواق تاكسى عن مسألة السحب دى وقالى ان الاثنين واحد

[Dr. Mostafa El Nazer]

تسلم يا باشا على المعلومات الجامدة دي ..... انا من زمان نفسي يكوم في عربيتي الغاز بس كنت قلقان
لكن دلوقتي أنا قلبي استريح

[khaabas]

بياخدوا وقت اد ايه فى التركيب وقيمة التركيب تحديدا