اساطير شائعة جدا في طب الاطفال .. التهاب الحلق و اللوزتين

[dr.wael7yran]

السلام عليكم ..
و كل عام و انتم بخير ..
انا اسمي د/ وائل .. اخصائي الاطفال و حديثي الولادة ..
و على مدى سبع سنوات لاحظت كمية كبيرة جدا من الاخطاء الشائعة جدا في طب الاطفال ..
و كنت كل ما باخد بالي من حاجة .. باقتلها بحثا و تمحيصا و اسئلة للاستشاريين بتوعي لغاية لما اوصل و اتأكد من الصح ..
و موش هتصدقوا انا وصلت لايه .. انا ممكن اكتب كتب في الموضوع ده ..
و الاخطاء دي ممكن يقع فيها الام او الاب او الصيدلي او حتى نسبة موش قليلة من دكاترة الاطفال للاسف الشديد ..
و لأن الناس هنا بتخدم بجد .. فانا ان شاء الله هكتب كام موضوع عن الاخطاء دي في اهم الامراض اللي بتواجه اطفالنا ..
و ربنا يستر على اولادنا جميعا ..
و موضوعنا النهاردة عن التهاب الحلق و اللوزتين ..
او احتقان بالزور .. او صديد على اللوز ..
حيث انه الموسم بتاعه الايام دي ..
و طبعا .. ده من اكتر الالتهابات التي تصيب الاطفال و اكثرها شيوعا ..
طيب تعالوا نشوف الاخطاء ..
1- over diagnosis او بالبلدي التشخيص عمال على بطال :
كل اسبوع او اسبوعين ابني بيسخن ..
و كل لما اروح لدكتور يقولي زوره محتقن .. او اللوز ملتهبة ..
لغاية لما حسيت انه اللي في رقبته ده موش زور .. دي بلاعة
طبعا التهاب الحلق و اللوزتين من اكثر التشخيصات المفترى عليها طبيا ..كل طفل سخن و موش باين هو سخن ليه نقول انه عنده التهاب في الحلق ..
و ده لانه احنا عندنا في الطب تشخيص اسمه "simple fever" او الحمى البسيطة و دي معناها انه الطفل ممكن يكون سخن و مفيش اي اعراض و لا اي علامات باينة عليه و ده ممكن يكون التهاب فيروسي بسيط هيروح لوحده من غير اي علاج او مقدمة لحاجة تقيلة زي نزلة معوية او نزلة شعبية بس لسه مبانش اعراض ..
بس طبعا انت دافع خمسين جنيه للدكتور .. و داخله و ابنك سخن و تلاقيه يقولك مفيهوش حاجة باينة دلوقتي .. هتقول عليه ايه ؟؟
فلازم يقولك عنده التهاب في الزور ..
و طبعا يكتبلك مضاد حيوي ..
و ابنك ياخد الدوا من غير اي لازمة ..
و لذلك من فضلك .. احترم الدكتور اللي بيقولك دي حمى بسيطة و موش محتاجة اي علاج و ممكن تكون مقدمة لحاجة و لو ظهرت اي اعراض ارجعلي تاني ..

2-تشخيص التهاب الحلق في الاطفال اقل من سن سنتين :
التهاب الحلق و اللوز في الاطفال اقل من سنة شيئ نادر الحدوث ..
و من سنة لسنتين لازم يكون تشخيص مستبعد جدا جدا..
الطفل اللي زوره بيلتهب و عمره اقل من سنتين لازم يكون واخد عدوى محترمة من حد قريب منه .. او عنده بكتيريا او فيروس نادرين شوية ..
و لذلك .. اذا تم تشخيص ابنك و عمره اقل من سنة بالتهاب في الحلق .. اسأل طبيبك ايه اللي ممكن يكون جابله العدوى دي ..
و اذا تكرر الموضوع .. خد رأي طبيب تاني ..

3-المضادات الحيوية :
موش كل حالة التهاب في الزور يبقى لازم تتعالج بمضاد حيوي ..
في حالات كتير بيبقى سبب الالتهاب فيروسي .. وده بيجي و يروح لوحده و المضاد الحيوي ده ضد البكتيريا موش الفيروس و موش هيعمل حاجة للفيروس..
و كقاعدة عامة اذا كانت حالة الطفل جيدة و مفيش ارتفاع جامد في درجة الحرارة يبقى موش محتاجين مضاد حيوي ..
و كتر المضادات الحيوية غلط على الكبد و الكلى ..
كما انه غلط على مناعة الطفل ذات نفسه ..
و هيخليه عرضة اكتر للالتهابات و العدوى ..
و اذا كان فعلا الالتهاب بكتيري و محتاجين مضاد حيوي يبقى لازم ندي مضاد حيوي فعال و قوي ضد البكتريا المسببة ..
و دي غلطة بيقع فيها كتير من الاطباء و الصيادلة الصراحة ..
يعني اقوى مضاد حيوي هو Ospen
يليه Zithromax و عائلته ..
و يليهم Duricef و عائلته ..
انما مثلا ادوية زي Augmentin و عائلته هي قوية اوي في التهابات الجهاز التنفسي العلوي و السفلي بس موش اد كده في التهاب اللوز ..
و لا بد من اكمال فترة العلاج بالمضاد الحيوي من 7 الى عشرة ايام كاملين ..
حتى يتم القضاء تماما على الميكروب و ميقعدش ينطلنا كل اسبوع ..
خدنا مضاد حيوي يبقى ناخده صح .. موش خمس ايام و الكلام ده ( طبعا فيما عدا ال zithromax ده له نظام تاني )

و من اكتر الطلبات اللي بتطلب مني في العيادة الحقن .. يا دكتور ادي ابني حقن مبيجيش غير عليها ..
و تبص على الطفل تلاقيه نحلة في العيادة عامل ياكل في المصاصات بتاعتي و يدشدش في ام اللعب
و طبعا ده مرفوض ..في الالتهابات البسيطة يا ريت نبعد عن الحقن.. و بكده احنا بنخلى الحقن فعالة اكتر في مواجهة التهابات اكثر قوة مثل الالتهاب الرئوي لا قدر الله ..و بنساعد على تقوية مناعة الطفل الطبيعية .. موش حقن و اضعاف لمناعة الطفل كده عمال على بطال ..علشان نريح الزبون و خلاص
و حتى معظم المضادات الحيوية الحقن موش قوية في علاج التهاب اللوز زي الادوية اللي انا قلتها فوق من شوية ..
و عموما .. من فضلك تردد دائما في اعطاء طفلك مضاد حيوي ..

4- نصايح مالهاش لازمة :
و اساطير الامهات و الجارات و الحبايب طبعا ..
الواد لازم ياكل كويس علشان يخف
طبعا لازم ياكل كويس بس موش بالعافية و تخيل نفسك انت زورك ملتهب اكيد بتبقى نفسك مسدودة و موش طايق الاكل .. ابنك كده برده .. اه متسيبوش لنفسه يموت من الجوع بس برده متجبروش جامد على الاكل و هو تعبان .. سيب الموضوع حسب شهيته ..
ابعديه عن اخواته ده معدي
العزل في التهاب الحلق مالهوش لازمة .. و حتى لو معدي بعد اول 24 ساعة من المضاد الحيوي ميبقاش معدي و ممكن يعيش حياته عادي و بدون تعقيد و عياط و عكننة ..
البيض و السمك و اللبن
كل كتب الطب اجمعت انه فولكلور و كلام فاضي ..
لا بيسخنوا و لا بيزودوا الاعراض ..
بس عن تجربة شخصية .. انا كل لما اجمد قلبي و اقول للام اكليه الحاجات دي عادي .. ترجعلى و الولد تعبان اكتر
يعني لما تكون الام معوداه انه ياكل بيض و يشرب لبن عادي و هو عنده برد .. مبيحصلوش حاجة ..
و لما تكون موش معوداه بيزيد المرض عليه ..
و لذلك انا بسيب الموضوع ده حرية شخصية للام ..

5- عايزين نشيل اللوز :
اللوزتين جزء مهم في جسم اي واحد مننا و ليهم دور مهم جدا في الوقاية من الامراض ..
فمش معقول علشان كام شكوى هايفة زي الولد علطول نفسه مسدودة و مبياكلش او علطول بيسخن بسبب اللوز نجري و نشيل اللوز ..
و اللوز لازم تتشال في خمس حالات فقط و هم
1- تكرار التهاب اللوز ( و التهاب اللوز معناه التهاب في اللوز ذات نفسها موش التهاب في الزور او الاذن او اي حته و مسمع في اللوز ) اكتر من 6 مرات في السنة
2- التهاب اللوز المزمن ( اللي مبيخفش خاااااااالص خاااااالص ) موش اللي بيخف و يرجع يجيي بعد 3 اسابيع و لا شهر ..
3- خراج اتكون حوالين اللوز متكرر
4- اللحمية اللي ليها اعراض ( تنفس من الفم طوال الوقت ، خنفان ، شخير اثناء النوم ، التهابات متكررة بالاذن الوسطى )
5- حدوث حمى روماتزمية لا قدر الله

و عموما .. من فضلك .. تردد جدا جدا جدا قبل ما تعمل اللوز لابنك ..

و كده ابقى خلصت معظم الاساطير و الاخطاء الشائعة ..
و صدقوني .. معظم حالات التهاب الحلق كل اللي بتحتاجه شوية راحة و شوربة و دوا يخفض الحرارة و هي هتروح لوحدها في 3 ايام .. من غير حقن و من غير قصص ..
و معلومة بسيطة اخيرة .. انه الاطفال طبيعي يجيلهم التهاب في الحلق من 6-7 مرات في السنة ( امال احنا هناكل عيش منيين يعني ).. و ده شيئ طبيعي و موش معناه نقص المناعة ..
و معظم الاطفال اللوز بتاعتهم كبيرة جدا .. و ده طبيعي و موش معناه التهاب ..
الالتهاب معناه احمرار شديد و صديد و ممكن تكون غشاء على اللوز كمان ..
و حتى في وجود الصديد .. ممكن يكون الفيروس هو اللي عامله و موش محتاجين مضاد حيوي ..

و يا رب اكون افدتكم ..
و انا على اتم استعداد للاجابة عن اي سؤال او استفسار ..
و لو عجبكم الموضوع انتظروا الموضوع القادم عن نزلات البرد ..
و تقبلوا سلامي جميعا ..:1463B6~153 :

[aboosama66]

كلامك صح 100% بس لو عملنا كدة عيادتنا هتوقف ومحدش هيجيلك لان الأم بتجيللك نفسها العيل ياخد معلقة الدواء ويخف بعديها بساعة ولو ما متحسنش علي الصبح بالكتير اوي تكون كاشفةغلية عند واحد تاني ويقوم مديها الروشتة المتستفة اللي انت عارفها اللي بتدمر مناعة العيل علي المدي الطويل والعيل يكون علي بالليل راق طبعا من البلاوي اللي خدها في الروشتة والام تنيسط ولا هيه فاهمة حاجة المهم عندها العيل يخف في لمح البصر وتقعد ترغي وتقول الدكتور الاولاني مش عارف حاجة
اللي انا عاوز اقولة ان الناس نتيجة الجهل الطبي الفظيع والقتي عمال علي بطال يتخلي الدكتور يعمل حاجات هو عارف انها مش في الطب الصح وطبعا غصبا عنة الن العيادة هي مصدر رزقة الاساسي في البلد المعفنة دي اللي ما بتقدرش اطبائها وبتسيب كل واحد يدبرها بنفسه وهو وحظة لو عيادتة ماشية هيعيش حلو اوي ولو مش ماشية هتبقي حالته واقعة اوي وهوب يروح ميافر وطفشان من البلد دى ويدنية طول عمرة متغرب وبيستحمل القرف برة عشان هو عارف ان مفيش حل تاني قمة المهزلة والله

[Neo206]

بجد موضوع جميل
صحح مفاهيم كتيؤخطأ
تقبل تحياتى و بارك الله فيك

[محمد فيصل]

دكتور وائل
جزاك الله خيراً
تأكيداً لكل ما ذكرت انه قد حدث معى انا واختى لان من كان يعالجنا طبيب اطفال ندر الزمن ان يجود بمثله مرة اخرى
انه الاستاذ الدكتور :صلاح الدين حماد :استاذ طب الاطفال بجامعة الاسكندرية رحمه الله
د.وائل حضرتك ممكن تسأل عنه الدفعات الاقدم او استاتذتك
: 140109~347::1 40109~347::14 0109~347::140 109~347::1401 09~347:

[akerima]

والله يا دكتور كون بس انك تعمل موضوع عن طب الاطفال دي حاجة تشكر عليها جدا جدا جدا وشرف لينا ان يبقي في دكتور اطفال في وسط عيلتنا الصغيرة علي المنتدي

وعندي استشارة بنوتي عندها 3 سنوات وبلاحظ دايما ان فية بقعة لونها فاتح هي كبيره شوية علي لسانها هي مابتشتكيش منها بس انا مش عارف دي عبارة عن اية وهل في منها خطر ولا عادي

وبشكرك مرة اخري علي الموضوع الهايل