تجربة جراند بونتو

[YahiaAshraf]

أولا: المحرك
العربيه محركها 1.4 لتر 8 صمام و المحرك بيولد 77 حصان و هو متركب على جسم السيارة يعنى لو عايز تحسب قدرة المحرك بالنسبة للمحركات الأسياويه هتضرب فى 1.31 و هيكون الناتج حوالى 100 حصان و ده و هو قدرة المحرك و هو مش متركب على السيارة .
المحرك أقتصادى و موفر لأستهلاك الوقود و تسارعه جيد جدا مش بطئ ولا حاجة ذى ما ناس قالوا عليه هو صوته اللى بيكون عالى شويا عند التشغيل لكن أثناء السير و تشغيل المكييف بيكون صوته معتدل جدا و صوته هادئ حتى أثناء الدوران على دورات المحرك العاليه فوق ال 4000 لفه فى الدقيق
أنا جبت بيها لحد 130 كم / ساعة و مشعرتش بفرق يزكر فى التسارع بنها و بين النيسان صنى 2005 اللى هى عربيتى قبل العربيه دى
ثانيا : الفتيس الأستبترونيك

العربيه فيها فتيس من 5 سرعات أماميه + سرعه خلفيه هو و ممكن تتحكم أنت بنفسك فى السرعة اللى أنت عليها عن طريق الفتيس و برضه الفتيس بيسعدك شويا لأنه بيجيب الغيار الأقل المناسف فى حالة التباطوء و برضه بيرفض أنه يجيب الغيار الغير مناسب و العربيه بتعمل للسائق أشاره صوتيه
أما بالنسبه للوضع Auto العربيه العربيه بتغير السرعات بنفسها بناءا على الضغطه على دواسة البنزين و برضه ممكن تتحكم فى تغير السرعات عن طريق الفتيس و هو على الوضع Auto و العربيه هتستجي معاك عادى جدا .
الفتيس بياخد مده زمنية عند التغير بين سرعه و سرعه أخرى هى أكتر شويه من المدة الزمانية اللى فى الفتيس الأوتوماتيك العادى بس التغير بين النقلات بيكون مريح و مفيش نتشات خالص و هى تقريبا نفس مدة التغير للعربيات المانيوال
من الجدير بالذكر أن العربيه مش بتتحرك خالص و أنت مش ضاغط على دواسة البنزين ذى العربيات المانيوال و ده فيه مشكله و ميزه فى نفس الوقت لأنه شئ كويس فى الزحمة و مش حتحتاك تجيب وضع ال N بس مشكله أن العربيه بترجع للخلف على الأراضى المرتفعه فى حالة عدم الضغط على دواسة البنزين ذى المانيوال تمام .
الفتيس بيرفض الغير بين وضع N و وضع القياده الأمامية فى حالة عدم الضغط على دواسة الفرامل أو الضغط على دواسة البنزبن لتجنب تكسير التروس و الرفض بيكون عباره عن رسالة على الشاشة المعلومات بتقولك أضغط على دواسة الفرامل و حاول مرة أخرى
وضع ال ECO بيكون عن طريق زرار فى تابلو العربيه بيخلى العربيه تغير السرعات على لفات محرك منخفضه جدا بين ال 2000 و 2500 لفه و ده أقتصادى جدا فى الأستهلاك لكن بيخلى عزم العربيه ضعيف جدا و هو مش كويس للقيادة على الطرق السريعه و فى حالة القياده على سرعه أكبر من 50 كم – يعنى من الأخر ده بيستخدم فى الزحمه بس – لأنه بيموت العربيه جده و بيخليها تغير سرعات كتير أوى حتى لو كنت ضاغط دواسة البنزين للأخر .

ثالثا : التجهيزات الداخليه
أول ما تخش العربيه هتلفت نظرك جدا عدادات السيارة لأنها مرقمه بطريقه مختلفه بداية من صفر و ثم 10 ثم 30 ثم 50 و هكذا لحد ما نوصل ل 230 كم / ساعة و عداد لفات المحرك مرقم بأرقام عشريه من صفر حتى 70 و لا يوجد Red Zone لكن مجربتش أجيب أكتر من 5000 لفه أبدا و مش هحاول .
يوجد عداد البنزبن و عداد الحرارة و شاشة المعلومات المفيده جدا و بيظهر فيها الوقت و التاريخ و درجة الحرارة الخارجية و عدد الكيلومترات المقطوعه بالسيارة و ممكن تعرض فيها متوسط أستهلاك السياره للوقود أو الأستهلاك اللحظي للوقود و أقصى مسافه تقطعها بالوقود الموجود .
يو جد فى السيارة مثبت سرعه لكن للأسف مجربتش أستخدمه حتى الأن لكن هو الكلام اللى فهمته من الكاتلوج أنه بيستخدم على الطرق السريعه المفتوحه فقط .
ممكن تتحكم فى أرتفاع و أنخفاض المصابيح الأماميه و يوجد أضواء ضباب أماميه و خلفية . و يوجد مساحه خلفيه للزجاج .
يوجد زرار أسمه City مرسوم عليه دركسيون يجعل الدركسيون خفيف جدا و يستخدم عند ركن السيارة فقط .
فتح الشنطه عن طريق زرار موجود فى التابلو و فتح تنك البنزين بمفتاح السيارة من الخارج ولا يوجد فتح للغطاء من الداخل .
السياره فيه مشغل أسطوانات Audio فقط للأسف لكن يمكن تشغيل أغانى mp3 بأستخدام الفلاشه عن طريق ال Blue & me .
ال Blue & me هو عبارة عن نظام تشغيل ويندوز موبيل يمكن أستخدامه فى أجراء المكالمات عن طريق سماعات السيارة و يعرض لك أسماء الاشخاص فى سجل الهاتف المحمول الخاص بك و تشغيل الأغانى عن طريق ال Media Player كما يمكنك أستخدام الأوامر الصوتية للتعامل معه أو التعامل معه عن طريق الأزرار فى الدركسيون و شاشة المعلومات و التعامل معه سهل للغاية .
و أرجوا أن لا أكون قد أطلت عليكم و أنا مستعد للأجابة عن كل أستفسارتكم ماعدا موضوع أستهلاك البنزين لأنه بيختلف من شخص لأخر و أسعار قطع الغيار و المقارنات بالسيارت الأخرى لأنى مش خبير فى المواضيع دى أبدا


منقول للافاده

[Mohamed Dahab]

الله ينور اه الحلاوه دى
تقرير موضوعى والف شكر

[Dr.genius2009]

لو سمحت منين أقدر أجيب ال Blue &Me ?? وهوا بيتحط في الطفاية يعني؟ شكرا

[fadymedhat]

موضوع جميل........

[amr_abdelalem]

شكرا على الموضوع الجميل يا باشا وهيه عربيه ممتعه فى السواقه بس هل عفشتها تتحمل البهدله والشوارع بتاعتنا؟؟