محتاج حكام مصريين قبل ماشترى من الكوريين

[mohamedbhit]

تدعولى الاول بالتوفيق وحسن الاختيار

ان شاء الله انا مستقر على الكيا برايد الهاتش باك وحدودى الحمد لله 25 الف وعايز اعرف
1- انه موديل افضل فيها مع الأخذ فى الاعتبار الحالة النضيفة طبعا وهل فى منها cc 1300 وهيكون افضل من ال 1100 cc
2- ومميزاتها وعيوبها بكل وضوح واستهلاك البنزين فى اللتر يعمل كام كيلو
مع العلم انى هستخدمها داخل المدينه (بنها ) وممكن السفر مرة كل اسبوع لحلوان رايح جاى ومرة او مرتين كل سنه اسكندرية مثلا

3- محتاج اعرف اشتريها منين هل من الاعلانات اللى على النت ولا سوق الجمعه فى مدينة نصر ولا الافضل اجيب من بنها هنا عشان الترخيص والتجديد وكدا

انا بصراحه بيفرق معايا رايكم كتير ومتشكر لكل الموجودين فى المنتدى اعضاء او مشرفين

[AbOnOrA]

اهلاً بيك فى مصر موتورز

البرايد بالسعر ده هتبقى الكورى القديم موديلات التسعينيات وهتبقى 1100 سى سى بدون تكييف او كماليات
ال 1300 تبداء من اواخر العشرينيات لمنتصف التلاتنيات وسيدان مش هاتش باك

فيه هاتش باك 1300 ايرانى وفيه كورى بس نادر اوى لان كل اللى كان بينزل هاتش باك كان 1.1 لتر بس

استهلاك البنزين ممتاز وبتشتغل على اى بنزين ولو الكربراتير مظبوط هتعمل 250 - 300 كم فى المتوسط للصفيحة

مميزاتها انها عربيه عملية واقتصادية تكاد تكون اقرب لل 28 فى اقتصاديتها واقرب لليبابانى فى نعومتها وسهولة استخدامها
ده باختصار وتفصيلاً قطع غيارها رخيصة ومنتشرة صيانتها سهلة جداً لاى ميكانيكى والحوض واسع تصميمها عامة عملى واعتمادى وموفرة فى البنزين ودي كلها اهم مميزات عربيه اقتصادية للمدينة

مشاكلها
خفيفة ومش ثابتة لو ستوك بس ممكن تتعدل فى العفشه وتغير جنوط لو غاوى جرى وغرز
تقفيل وخامات متواضعة اقرب للشاهين مثلاً والادا كخامات من جوه والاكسيل مثلاً والاكسنت ارقى منها من جوه بكتير

اما عن الشراء فهو زرق ونصيب ممكن تشترى من على النت وممكن تشترى من جارك او زميلك فى الشغل مش شرط تابع السوق والمنتديات ومعارفك ومتستعجلش وان شاء الله هتلاقى حاجة كويسة

[mohamedbhit]

اولا انا مش قادر اعبر عن سعادتى لما لقيت اول رد من حضرتك استاذنا الكبير ابو نورا
ثانيا مش هلاقى رد ولا احسن ولا اجمل ولا افضل من كده الا من حد عنده نفس خبرتك
ثالثا تقريبا مش لاقى حاجه اقولها غير ان ادعيلك بالتيسير والبركة فى الرزق والاولاد

اخر حاجه هغلس على حضرتك فى سؤال انا عايز اعرف 96 ولا 97 ولا 98 ولا 99
افضل ولازم يكون فى تكييف فى العربية ولا عادى الواحد ممكن يعيش من غيره

وشاكر جدا لحضرتك على الافادة

[Mohamed Elhasafy]

السلام عليكم...
هو التكييف عادى الواحد ممكن يعيش من غيره ... بس فى شهرى 7 و 8 و خصوصاً فى الظهر الواحد بيكون مش طايق العربية رغم وجود التكييف!..
الموضوع بيرجع لحضرتك ... يعنى بتسوق كام ساعة فى اليوم و بتتحرك بالعربية فى الظهر كتير و لا لأ ...

[mohamedbhit]

انا لقيت عربية هاتشباك موديل 1998 والميكانيكى بص عليها وعلى سمكرتها وشكرلى فيها هى من غير تكييف بس مجهزة تكييف مش فاهمها دى يعنى ايه وحالتها بره وجوه جيده وفيها سنتر لوك
بس المهندس صاحبها طالب 27,500 الف هى كدا غاليه ولا ايه محتاج الرد لانى المفروض ارد على المهندس خلال ساعه
وشاكر جدا على ردك استاذ m.elhasafy بس انا فعلا مبمشيش فى اضهرية خالص الحمد لله وربنا يحفظنا يارب
محتاج رايكم ضرورى جدا