أرجوكم أريد أن أعرف كيفية ضبط المرآه اليمنى

[fankoushat]

السلام عليكم ورحمة الله وبركاته

الأخوة الكرام, كنت ماشي مره على طريق سريع , وحبيت أنقل للحارة إلي على يميني , فبصيت على المراية اليمنى وما شفتش أي عربيات, فجيت أدخل على الحارة , فوجئت بكلاكس عالي وكنت هلبس في عربية تانية.

طيب إزاي أضبط المرآه اليمنى بشكل سليم وصحيح ؟
وعندما أريد الإنتقال للحارة اليمنى (اليسرى سهله) , فكيف أنتقل بشكل صحيح وسليم؟ وأكون متأكد من عدم وجود سيارة بجانبي

وشكرا جزيلا للجميع

[ehab62]

المرايه اليمين بيكون ليها طرفين (يمين وشمال) المفروض ان الطرف الشمال ده بيكون جايب التاتش بتاع اخر العربيه من ورا وباقى المرايه بيكون جايب كله باقى الطريق وفى ناس تانيه بتخلى المرايه اليمين مش بتبين جسم العربيه ولا حتى جزء منه وكل المرايه للطريق فقط انا من مؤيدى الطريقه الاولى لانها بتنفع فى وسط البلد والزخنقه بتبقى شايف مين اللى جنبك وبينك وبينه قد ايه بالممللى وفى نفس الوقت على الطرق السريعه والدائرى بتجيب ليك الحارة التانيه

[AbOnOrA]

زى ما قال استاذ ايهاب ممكن تظبطها بحيث تجيب طرف جمب العربية الميمين مع باقى الطريق او تظبطها تجيب حدود الرصيف اليمين وانت ماشى ماسك شمال

بس اياً كانت طريقة الظبط هتفضل فيه نقطة عامية مش ممكن تشوفها وممكن تسبب حوادث لاقدر الله

انا عن نفسى لازم ابقى متابع اللى ورايا دايماً وبشكل دورى ايا كانت ماشى فى وسط البلد او على طريق سريع
وقبل ما انزل يمين ببص على المرايات واقدم جسمى لقدام شوية وانا باصص للمراية والحركة ديه كافية لاظهار كل الطريق اياً كانت طريقة ظبط المراية وكافية لتفادى النقطة العمياء

ولو نازل يمين على طريق سريع او فيه نزلة كوبرى او هقطع الطريق خالص اخش فى شارع جانبى ولا حاجة ساعتها ببقى مشغل الانتظار وواخد سرعة مناسبة للطريق ووبص فى المرايات بالطريقة السابقة وابص من قزاز العربيه وجنبها كمان مش بس المراية

[young..pharaoh]

حضرتك ممكن تكون مرآياتكـ مظبوطه بشكل صحيح

فــ متغيرهاش لو كانت بتكشفلكـ الطريق كله

المشكلة كانت في نقطه في العين اسمها blind area النقطة دي لا تستطيع الرؤيا

و بالتالي لم ينعكس الجسم الموجود في المرآه بالصورة المرئية

و دي ملهاش حل غير انك تبص علي اللي جنبك بعينك المجردة بعد النظر في المرآة

ربنا يكفيكـ شر الحوادث

[ezzatfred]

دى بيسموها النقطة العميا اللى بتكون فيها الرؤية منعدمة لا من مراية الصالون ولا مرايات الجنب افضل حل اعمل المرايا الجانبية 90 درجة هتزود مجال الرؤية هى مشكلتها انك مش بتشوف غير جزء صغير من ديل العربية ودى بتبقى مشكلة فى الركن ممكن لما تيجى تركن غير وضعها لجوه شوية