ازاى اروح دمياط من المنصورة

[dreammate]

سلامو عليكم
انا اعرف ان فيه طريقين لدمياط من المنصورة
واحد بيعدى على الزرقا والتانى بيعدى على كفر سعد
ايهما افضل من حيث المطبات والرادار
وايهما اسرع واقل مسافة
وفين نقطة التحول بين الطريقين
ويا ريت بردو الطريق من دمياط لدمياط الجديدة ازاى وكام كيلو
وشكرا

[Torn@doo]

اقولك يا سيدى
ف طريقين لدمياط من المنصورة
الشرقى زى ما بيطلق علية كلوا مطبات وبيعدى ع بلاد ارياف كتير فدا انا مبفضلوش لانوا متعب وبياخد وقت اطول حوالى ربع ساعة زيادة
الطريق الغربى او العادى ودا هو امتداد طريق المحلة المنصورة وبيبقى افضل شوية من حيت المطبات وعلية كمين رخم
لو عايز دمياط الجديدة من المنصورة يبقى من ع الطريق الدولى اقربلك واحسن
وتحيااااااااااااااتى

[ايمن عبدالحميد]

المشاركة الأصلية كتبت بواسطة dreammate سلامو عليكم انا اعرف ان فيه طريقين لدمياط من المنصورة واحد بيعدى على الزرقا والتانى بيعدى على كفر سعد ايهما افضل من حيث المطبات والرادار وايهما اسرع واقل مسافة وفين نقطة التحول بين الطريقين ويا ريت بردو الطريق من دمياط لدمياط الجديدة ازاى وكام كيلو وشكرا

انت نسيت اهم وانظف طريق وهو الدولى الساحلى - تتطلع من كورنيش المنصورة تركب كوبرى الجامعة ( نهاية الكورنيش من الناحية الغربية)اللى نازل على المحلة الكبيرة وتنزل من اول منزل يمين قبل الكوبرى ما ينتهى تلاقى بداية طريق جمصة ( الدولى ) بيعدى وانت ماشى على مدخل بلقاس وبنزينة تعاون على شمالك بعد مدة وينتهى بالطريق الساحلى طبيعى تاخد اليمين وتكمل علطول هتلاقى دمياط الجديدة والقديمة وكل ما تتمناة .....

[dreammate]

شكرا على الردود
حلوة حتة تلاقى كل اللى تتمناه دى :D
انت نسيت اهم حاجة يا باشا انا عارف ان فيه طريقين بس منين انقل من ده لده منا عارف ان البداية واحدة ولكن فين نقطة التحول دى اهم حاجة
ولو عايز اسأل الناس فى الطريق اقولهم ايه؟؟ فين الطريق الغربى؟؟
محدش هيفهمنى
وثانيا هل الطريق الدولى الساحلى اقرب واحسن من الغربى ولا لا؟؟
وموضوع الرادارااااااااات ايه النظام

[black_cres]

المشاركة الأصلية كتبت بواسطة dreammate شكرا على الردود حلوة حتة تلاقى كل اللى تتمناه دى :D انت نسيت اهم حاجة يا باشا انا عارف ان فيه طريقين بس منين انقل من ده لده منا عارف ان البداية واحدة ولكن فين نقطة التحول دى اهم حاجة ولو عايز اسأل الناس فى الطريق اقولهم ايه؟؟ فين الطريق الغربى؟؟ محدش هيفهمنى وثانيا هل الطريق الدولى الساحلى اقرب واحسن من الغربى ولا لا؟؟ وموضوع الرادارااااااااات ايه النظام

زي ما الزملا قالوا لحضرتك فيه طريقين :
الطريق الغربي : ودا اللي عليه الموقف الجديد بتاع طلخا بتطلع عليه يا اما من ورا الجامعة يا اما من طلخا مميزاته انه مطباته قليلة وهتعرف تمشي فيه بسرعة لانه اتجاهين لكن عيبه انه طويل
أما الطريق الشرقي فا دا انت بتطلع له من كوبري جديلة وتاخد شمالك هتعدي على أكاديمية النيل وتكمل على طول هتعدي على الزرقا وفارسكور وبعدين توصل لبنزينة الشعرا اللي هي بداية مدينة دمياط القديمة الطريق دا اقصر من الغربي لكن عيبة انه اتجاه واحد رايح وجاي مع بعض ومطباته كتير بخلاف انه هتعدي في وسط بلاد بمعنى انك ممكن تتعطل وتقف كتير
لو عاوز تنقل من الطريق الشرقي للغربي أو العكس فيه مكانين ممكن تعمل منهم كدا
كوبري شربين أو كوبري فارسكور العلوي
وأي استفسار تاني انا في الخدمة