تقرير عن صيانة ال-1000 كم ل-F3 أوتوماتيك بالصور (تحية شكر و تقدير لفرع اسكندرية )

[gad_fcis]

السلام عليكم ورحمة الله و بركاته
إلنهردة رحت اسكندرية عشان أعمل صيانة ال-1000 كم ، أنا نزلت من البيت 6.15 وصلت هناك 9.30
كنت رقم 7 أو 8 و كانت كل العربية الواقفة لادا و اتنين F3 و واحدة F0


دخلت و سلمت على باشمهندس اسامة مبروك بصراحة الرجل كان قمة في الذوق و الحترام و خلى العامل يعمل طابور للادا و طابور ل F3


مفيش عشر دقائق و كان بيستلم مني العربية و بيسألني بشتكي من إيه ، أنا ردت عليه بالقائمة التالية :



1-المفتاح إلي بيفتح الشنطة من جوة أوقات يشتغل و أوقات لأ و كمان الشنطة مفارقة من جانب و الجانب التاني لأ (اتعملت و إتظبت فرق الشنطة )

2-فيه هواء ساخن بيجي من عند الدواسة أو من تحت التابلوه (فتحت التكييف إلي من تحت إلي بتجيب هوى من برى كانت مفتوحة فاتحة بستي مع إن المفتاح كان معمل إنه ميجبش هواء من برى و إتزبطت )

3- العربية فيها رعشة أو غربلة عند سرعة 120 كم فما فوق (العربية محتاجة ترصيص و للاسف هما مش عندهم جهاز ترصيص )

4-الفوانيس الأمامية مرفوعة أوي لفوق (إتزبطت و أنا عرفت مكان الرجلاش عشان لو عايز أعدلها بعد كدا )

5-أوقات بسمعة صوت ونة بسيطة أوي عند سرعة 60-70 كم (ده بصراحة هو قلي استنى شوية لما العربية تمشي أكتر سعتها هنعرف دة عيب فيها ولا دة طبيعي و بيني و بنكو أنا الصوت مش مضايقني قوي عشان أنا اللي بركز معاه لكن هو يكاد يكون مش مسموع )

6- إستهلاك البنزين كان مع أول تفويلة 11.7 كم في اللتر ، مع تاني تفويلة كان 9 كم في اللتر (أخبرني إن الاستهلاك المفروض يكون حوالي 10-11 كم و مش هنحكم عليها دلوقتي غير بعد 5000 كم، و كدا كدا هي عملت معايا في المشوار بتاع إلنهردة 10 كم في اللتر )

7-صوت تكتكة عند الدوس على الفرمل و الفتس على وضع P و العربية دايرة (الكهربائي زيت سوستة كدا هي اللي بتعمل release لزرار shift lock و الحمدلله الصوت بقى أقل بكتير من الاول و الزرار مبقاش يتحرك الحركة البسيطة اللي كان بيتحركها مع الفرامل و هي بتعمل release lock )

8- طبق المرايا الشمال بيتهز هذا خفيفة مع المطبات و اليمين سليم (ده بقى اللي بينلي الراجل دة عنده ضمير فشغله أد إيه ، أنا ذي مبقول هي كانت هزة خفيفة و الفني حاول يشوف العيب فين بس مكتشفش عشان فعلاً المرايا متثبتة كويس ، أنا لاقت باشمهندس اسامة بيقوله غير المرايا عشان نكون في السليم و فعلاً المرايا اتغيرت و أنا نفسي كنت مندهش )


اه بالمناسبة فلتر الزيت اللي حطهولي بتاع ميتسوبيشي و أصلي
و كمان عمل check على التكييف و و نظف فلتر الهواء


الجميل بقى اني صورت كل الكلام دة ، و أحسن حاجة اني صورت العربية من تحت ، أنا كنت قالب النت عشان أشوف شكل العربية من تحت عمل ازاي و ملقتش صور لها


قبل ما أسبكو مع الصور ، أحب اشكر باشمهندس اسامة على ضميره و كمان كل الفنيين اللي هناك عشان فعلاً كانو بيشتغله بضمير مش نظام اقلب و امشي

[gad_fcis]

ربنا يباركلك فيها
ومبروك الصيانة وعقبال صيانة ال 100.000

[Koge22]

ربنا يباركلك فيها و جميل اوي يكون في ناس كده

[m.dardir]

مشكور تعبك يا باشا وربنا يباركلك فيها