ثورة الغضب المصرية الثانية 27/ مايو / 2011

[Dr/Mohammed]

ثورة الغضب المصرية الثانية 27/ مايو / 2011

ده الرابط بتاعها علي الفيس بوك

http://www.facebook.com/event.php?eid=147776135291120

ياتري انتم موافقين علي الثوره دي وهتشركوا ولا لأ

وياريت بجد نكون واعيين للرفض وواعيين للقبول للثوره دي

لان لما سوزان تطلع برأه علشان ردت لينا 24 مليون جنيه << ده اسمه تهريج << الي ردته ده حق الشعب المصري ده الي سرقته مش كرم منها علينا علشان نسامحها
لما يطلع سرور وغيره وغيره ب 100 الف جنيه الي بتدفعوه ده مجرد بس جزء من الي سرقتوه مش تكرم منكم علشان نسامحكم
ده اسمه استهبال الي بيحصل

ياريت بجد نناقش الموضوع بموضوعيه وفي نقاط بسيطه

1. رأيك في الثوره ؟
2.ليه اخدت الرأي ده : او مبني علي ايه رأيك في الثوره ؟
3. شايف البلد حالها ايه دلوقتي وعلي اي مدي تم تحقيق اهداف ثوره 25 يناير ؟
4.لو اي حد يحب يضيف اي نقطه تانيه في الحوار يتفضل .

[عبدالله منصور]

فعلاً مفيش اى تغيير

ولابد من وقفة احتجاجية تانية محترمة

انا سامع كمان ان بعض الرجالة بدأ يفرج عنهم بكفالة

الثورة طلعت فشنك الظاهر !!

[alymonir]

متابع..........

[Ahmed Anwer]

موافق طبعا علي المطالب المشروعة

و اعترض بشدة و بعنف علي مطلب المجلس الرئاسي و الدستور أولا

دي ناس بتستهبل و تخلط الأوراق

امال احنا عملنا الاستفتاء ليه !

مش هنخلص من حكم العسكر يجيلنا حكم النخبة الإقصائيه الديكتاتورية

انتهازيين و استغلاليين

لازم نصحي و نحارب عشان حريتنا و الديمقراطية

في تاريخ الثورات مفيش ثورة مضادة نجحت من فلول النظام غير ثورة مصدق في ايران

لكن ثورات مضادة كتيييير نجحت من فصيل من الشعب عايز يستفرد بالثورة لحسابه و يحرم بقية الشعب

لن يسلم الحكم إن شاء الله سوي لبرلمان و رئيس منتخب

نصحي للمطالب و منتخدشي في دوكه

[Dr/Mohammed]

للاسف يا استاذ عبد الله في كتير خرجوا وأتبرؤا خلاص
ده كده استهبال
وطلعت النيابه من ربع ساعه تقول انها لسه مبشرتشي التحقيقات مع سوزان والي اخلي سبيلها وزاره العدل للكسب غيرالمشروع << ده يعني ايه بقي مفيش تنسيق مبنكم وبتحدفوها لبعض وبتلعبوا بالشعب يعني

وفعلا يا استاذ احمد كلامك فعلا صح
مفيش ثوره هتنجح في وجود النظام القديم
ده لسه امن الدوله موجود يا جدعان ده اسمه كلام << احنا بنشتغل نفسنا كده والجيش بيلعب بينا
عاملين زي الست الي عارفه ان جوزها بيخونها بس ساكته علشان خاطر بيتها
مهياش عارفه انه اساسا كده مخروب تكمل بقي قتل في الفساد وتبنيه من جديد بدل ما طول عمرها تفضل ساكته علشان خاطر بيتها يفضل علي رجليه
بجد يا جماعه لازم نصحي ونفوق
لان في كتير جدااااااااااااااااااااااا مش فاهمين حاجه ومش موافقين علي اي اعتراض تاني
ودول الي قالوا نعم للتعديل الدستوري ومش عايزين دستور جديد
اهو مفيش بعدها باسبوع طلع وعملوا اعلان دستوري
وادي حال البلد
6 شهور والنقد المخزون لينا يخلص
مفيش سولار في الجيزه و6 اكتوبر
مساجين عماله تهرب واخرها 36 مسجون هارب من سجن 6 اكتوبر امبارح بليل << اله امال فين الامن بقي وفين الشرطه
ولما حبوا يحاكموا حاكموا نائب المأمور امال فين المأمور نفسه بقي ولا هو عادي مش بيتحاكم بردوا زي النائب بتاعه
ده لو اتحاكم اساسا يعني