مواقف مع سواقين التاكسى ادى لحيرة . التاكسى احسن ولا عربيتك

[NicEgypt]

السلام عليكم جميعاَ .

كنت نسيت مواقف بعض سائقى التاكسى واللى اغبلها غريبة بعد امتلاكى لسيارتى .. وطبعا رجعت للتاكسى تانى لانى بشد
عربيتى .. السؤال اللى بفكر فية واجابتة تقريبا محيرة .. هل عربيتك احسن من التاكسى ام التاكسى افضل ؟
من ناحية كل شيئ .. السرعة .. الرحمة من القيادة فى غابة فوضاوية .. المصاريف والفلوس اللى كل شوية تطلع ... الخ

اسمحولي اقولكم على مواقف حصلت فى مشوار واحد بس ..
بدءت اليوم بأسم الله .. ونزلت الساعة 8 صباحاَ .. شاورت للاول تاكسى ابيض .. رايح المكان الفلانى .. قال لاء واحد تانى قالى ماشى .. ركبت .. نزلنى تانى عند اول رصيف
بعد مركبت لقيتة بيقولي يا باشا الثورة وبتاع زود خمسة ج كمان ومش هيشغل العداد ! قلت لة لاء شغل عدادك مش راكب زينة هو .. مش عجبك نزلنى .. مكدبش خبر وركن قمت نازل بعد مبعدت عن المحطة ورخامة بقى منى وانا معروف برخمتى سبت لة الباب مفتوح على مصرعية ومشيت نيهاهاهاها

رجعت اشاور لتاكسى ابيض باردو .. مهو انا بشاور لتاكسى ابيض عشان العداد عشان اريح دماغي .. قالى لاء
وراة على طول تاكسى ابيض واسود شاهين .. صاحبة لابس النضارة الشمس ومروق نفسة كدة .. وقف بدون مشاور لة
قالى ايوة يا هندسة ؟؟ .. " عرف ازاي هة عرفها ازاي ؟ " ... قلت لة شكراَ يا هندسة . لقيت وش تانى ظهر اول مقلع
النضارة وقالى : يا هندسة الابيض زى الابيض واسود بل احنا ارخص من العداد تعالى بس قلت لة خلاص هدفع كذا
قالى لاء قلت لة شكراَ قالى بس نتفاهم قلت لة شكراَ انا مشورتش ليك اصلا انت اللى وقفت علشان معترض انى بشاور
للتاكسى الجديد اللى كان قدامك .. قالى يعنى مش جاي ؟ قلت لة " لا اله الا الله " رح حضرتة رد بـ " تيت توت "
كلمة مش لطيفة .. طبعا قلة ادب .. انا حر ف التاكسى اللى يعجبنى وقف لية دة ؟ وكمان شتم وجري .. ماشى ما علينا
دة كلة الساعة 8 الصبح فى بداية اليوم .. كدة اليوم بدء من اولة .. يا ستار .

وقف شاب صغير ف السن كدة ودماغة باينة بالعافية من تابلوة الفيرنا .. ركبت معة .. كعادة السواقين بياكلو دماغ الراكب
قعد يرغي وانا متجاهلة تماماَ .. المهم حكي لى على موقف غريب .. قلت لة بأختصار علشان متكلشى دماغي ع الصبح
هات لك سلاح .. رد عليا وقالى منا معايا سلاح تحت رجلي جامد مبخرجش من غيرة .. قلت لة معاك اية .. تخـيلو معة اية ؟ .. طلع لى من تحت الكرسى دراع كوريك هههههههههه

وراح فتح موضوع ان 3 افراد اتلمو علية وثبتو واخدو منة التاكسى ايام الثورة ! .. قلت لة طبعا مش معاك سلاحك الجامد
كان نفسى اخبطة بية مهو لازم العربية تتسرق هههههههه .. رد عليا وقالى لالالا انا نزلت بدراع الكوريك بعد الثورة وبعد
المشكلة دى .. قلت لة ربنا يقويك ..شوية وقالى احنا لما عملنا الثورة مش عارف اية .. واحنا لما عملنا الثورة .. قلت لة انتو مين ؟ قالى احنا .. قلت لة ايوة مين قالى الشعب .. قلت لة انت لوحدك بقيت الشعب ؟ قالى لاء كلنا يعنى .. قلت لة انت اثناء
الثورة كنت فين ؟ " مش زي عادل امام ماشى " قالى كان نايم وامة صحتة وطلبت منة ينزل يجيب " بسبوسة " ! وصلت وخلصت منة ونزلت . بس الحـق يقال .. الواد زى العسل وشاب وزوق مش زى الرخم اللى هقولكم علية .

وانا راجع بقى سواق ارخم خلق الله .. كنت فاكر انى ارخم واحد.. راكب اسبرانزا متروقة كدة ومنكلة .. راجل كبير ف السن جداَ .. المكان الفلانى يا سطى قالى ماشى .. معايا شنطة اول مشفها راح فاتح شنطة عربيتة من جوة وقالى بكل قرف " حط اللى معاك فى شنطة العربية " يا فتاح ياعليم .. قلت لة دول فانوسين عربية خلفي مش محتاجة .. قالى يا بية لازم يتحطو ف الشنطة يخربتك على بيت الشنطة انت فرحان بالشنطة ؟ انت الوحيد يعنى اللى عربيتك فيها اوبشن الشنطة ؟ مكل العربيات فيها شنطة .. طيب عديت اليوم وحطيت اللى معايا ف الشنطة .. اول مطب راح واكلة دب

قلت لة يعم والنبي الفوانيس هتتكسر مش طالبة 600 ج تانى رد بغباء وقالى يعنى شيفهم ف ايدي علشان اكسرهم وهما قشر بيض يعنى .. قلت لة " مش عارف من ساعة مركبت معاك وانت قرفان منى يا حج لو زعلان نزلنى " قالى هو انا اعرفك علشان اقرف منك يادي النيلة الراجل مش عايز يعدي يومة .. يا جماعة دة راجل كبير ف السن لو نفخت فية هقـلبة مصفى
المهم سكت .. وبعد ما اخد اليوتيرن بكل هدوء وبطء راح طالع كوبري 15 مايو يعم متاخد كوبري اكتوبر وانزل الدقي خلينا نخلص قالى لا دي زي الفل ودايما رايقة نزلنا الكوبري لقينا الطريق كلة واقف وطبعا مصلحة لية علشان العداد بيعد والزبون يدفع ! المهم الطريق مشى شوية والاشارة فتحت الاخ ماشى لي وبدون مبالغة والله يا جماعة على 40 ومصورها بالموبايل
قلت لة يعم امشى شوية عايز الحق السمكري خلينا نخلص يقولي انا حاضر وعنيا ومفيش اي تغيير قولت لة انى ف الزحمة ببقى ماشى 80 وعرز وانت ماشى 40 لية الطريق فاضى راكبين بسكلتة ولا اسبرانزا ؟ يقولي اصل انا عندى القلب والسكر .. وشوية وهيشحت مال القلب والسكر بالكيلو متر حد يفهمنى والنبي ؟ ولا القلب والسكر مربوطين بواير مع الكيلومتر
يمكن دة اوبشن جديد فى الاسبرانزا وانا معرفش !! طبعا دفعت فى نفس المشوار زيادة 6 ج بسبب دلعة وانة اخد طريق طويل
غير الوقت اللى ضاع ! لو انت مكانى هتعمل اية علما انة اخد الكوبري صاروخ وبعد مطلعنا الكوبري الاوبشن الجديد اشتغل بتاع الاسبرانزا وبدء نظام القلب والسكر وحاجة لله يا ولاد الحلال ! يارب تخلص عربيتى علشان تعبت من الناس دى .

[michohat]

طبعا مش فى كل الاوقات التاكسي يبقي اسهل من عربيه الواحد
يعنى مثلا لو انا عاوز انزل وسط البلد اقضي مصلحه وهيكون فى صعوبة اني الاقي مكان اركن فيه طبعا اقضيها مواصلات

[د.محمود صلاح]

ده في يوم واحد فقط ... تخيل لو كل الأيام ؟؟!!؟؟

[sad-bird]

المشاركة الأصلية كتبت بواسطة michohat طبعا مش فى كل الاوقات التاكسي يبقي اسهل من عربيه الواحد يعنى مثلا لو انا عاوز انزل وسط البلد اقضي مصلحه وهيكون فى صعوبة اني الاقي مكان اركن فيه طبعا اقضيها مواصلات

مبلاش احنا نتكلم
ده احنا انيل من القاهرة

[sad-bird]

NicEgypt

مش عارف اقولك ايه والله من المعاناة اللي انت فيه
بس كله كوم وبتاع الاسبيرانزا ده كوم تاني

ده عيب التعود على العربية
انا الحمد لله عارف طريقي
مترو واقرب محطة للمكان اللي رايحة
انزل وخد تاكسي أو ميكروباص
على حسب الموجود ايه