كان رد خليته موضوع

[محمد عبد الفتاح الكومى]

السلام عليكم جميعا الحقيقه الموضوع ده كان رد ليا على موضوع العضو المحترم Temo (نعم ... كلنا مبارك) وإللى كان بيقول فيه بإختصار إن لا يصح أن نتهم مبارك وحده بالخيانه وكلنا نخون مصر بلدنا بشتى الطرق كل فى موقعه فرديت على موضوعه الممتاز وإللى أنصح الجميع بقراءته وبعدين حسيت إنى عايز كل الناس تعرف رأيى مش عارف ليه فقررت أحوله لموضوع مستقل وأعرف من حضراتكم أنا صح ولا غلط وإليكم الموضوع ....
مبسوط كده يعنى خليتنى أعيط ... عموما أنا مش هقولك إنى مثالى فى شغلى وبراعى ربنا فى الأمانه إللى أنا مؤتمن عليها حيث أعمل أخصائى مكتبات فى مدرسه للتعليم الأساسى أبنى وأشكل فكر و وجدان الطلبه والطالبات مستقبل مصر بلدنا ولكننى أحاول قدر إستطاعتى ومن خلال موقعى ... وكنت بحس معظم الوقت إنى غريب فى وسط إللى حواليه ومش كتير بيفهمو إللى بحاول أرسخه فى حصصى وفى تعاملاتى وأكاد أسمع همسات زملائى ( عبيط بكره يعقل ) وده بيخلينى أصمم أكتر و أكتر على إنى ماضعفشى وأكمل زى مانا ماشى يمكن غيرى يعمل زيى ونبدأ نكتر برغم محاولات الحكومه الجاهده لتغييرى عن مسارى وتحويلى لمجرد موظف روتينى متكاسل.. ماتستغربش ماهو لما يكون مرتبى 105 جنيه فى الشهر ( مائه وخمسه جنيهات فقط لا غير ) ومواصلاتى من وإلى المدرسه 6 مواصلات يوميا رايح وجاى بصرف فيهم حوالى خمسة جنيهات ونصف فى كل يوم يعنى حوالى 165 جنيه فى الشهر بالزمه مش دى حاجه تضحك ؟ يعنى بكمل من جيبى الخاص علشان بس أعرف أروح شغلى وأنا متزوج وأعول وأسكن فى شقه إيجار وطبعا مطلوب منى إنى أروح شغلى كل يوم وأنا يملأنى الأمل فى الغد المشرق البسام و ذهنى صافى من أى مشاكل ماديه حتى أستطيع القيام بوظيفتى على أكمل وجه ولا يتأثر التلاميذ بحالتى المزاجيه والتى ليس لهم فيها ذنب طبعا ده بعد ما أكون رجعت من شغلى التانى إللى بشتغله من العصر لقرابة الصباح حتى استطيع الوفاء بمتطلبات بيتى الضروريه ... متأسف للإطاله بس لما يكون دا موقف الحكومه من شاب بيحب شغله وعايز يشتغل وكل طموحه إنه يعيش ده يبقى إسمه إيه ؟؟؟ وغيره كتيييييييييييير بس كفايه كده .... إللى عايز أقوله إن ومع وجود العذر بل الأعذار الكافيه لضميرى حتى لا يشعر بالوخز إذا لم أعمل إلا أننى أبدا لم أتقاعس عن أداء مهام وظيفتى التى أحبها و أعلم جيدا مدى خطورتها و أهميتها فى إعداد جيل أحمله أنا وليا الشرف بما أريده أن يكون فى مصر مستقبلا من قيم واداب وسلوكيات وعادات لطالما إفتقدناها ... معذرة مره أخرى للإطاله إنما قصدت شيئين من سردى هذا أولهما تدعيم مبدأ ( إبدأ بنفسك والبقيه تأتى ) وثانيهما توصيل رسالة لمن يهمه الأمر مضمونها إن مصر جايه وإن مش كلنا مبارك وأعرف أن الشرفاء فى مصر كثيرون سيدفعون مصرنا الحبيبه إلى مراتب العظماء ما دام القلب ينبض .. وختاما أقول ( تحيا مصر بس والنبى خلوها تحيا )

[m_elmasoudy]

فعلا عندك حق يا أستاذ محمد، الحقيقة فعلا ان لو كل واحد بدأ بنفسه وحاول يشوف شغله بطريقة صح ويعمل إللى عليه، أكيد ساعتها هنحس بالفرق وبإننا أصبحنا أفضل فعلا....

أرجو من الجميع إتباع مبدأ : إبـــــدأ بـنــفـــــســـــــك

اصبر عليا بس يا استاذ محمد لما امسك البلد ديه وانا هرشحك وزير للتربية والتعليم والله اللي زيك خسارة في البلد ديه

105 جنيه اموت واعرف بيعملوا ايه للشباب اللي زيك والله في الزمن ده الواحد مبيكفهوش 150 مصاريف للبيت في اليوم ربنا يسامحهم


وانا فعلا مع الاستاذ المسعودي اننا لازم نبدء بنفسنا

وربنا يعنا ويتولانا برحمته

[محمد عبد الفتاح الكومى]

المشاركة الأصلية كتبت بواسطة m_elmasoudy فعلا عندك حق يا أستاذ محمد، الحقيقة فعلا ان لو كل واحد بدأ بنفسه وحاول يشوف شغله بطريقة صح ويعمل إللى عليه، أكيد ساعتها هنحس بالفرق وبإننا أصبحنا أفضل فعلا.... أرجو من الجميع إتباع مبدأ : إبـــــدأ بـنــفـــــســـــــك

ماهى المصيبه يا محمد بيه إن فى ناس بتتكسف والله من الإلتزام ولسان حالهم بيقول هويعنى أنا إللى هصلح الدنيا لما تتظبط نبقى نمشى مظبوط وبالشكل ده عمرها ما هتتظبط

[محمد عبد الفتاح الكومى]

المشاركة الأصلية كتبت بواسطة corsair اصبر عليا بس يا استاذ محمد لما امسك البلد ديه وانا هرشحك وزير للتربية والتعليم والله اللي زيك خسارة في البلد ديه 105 جنيه اموت واعرف بيعملوا ايه للشباب اللي زيك والله في الزمن ده الواحد مبيكفهوش 150 مصاريف للبيت في اليوم ربنا يسامحهم وانا فعلا مع الاستاذ المسعودي اننا لازم نبدء بنفسنا وربنا يعنا ويتولانا برحمته

يا عم الله يخليك وزير التربيه والتعليم حته واحده عمومما متشكر جدا بس إنت إمسك البلد وسبتنى بس بدل مانا شغال بقالى 3 سنين بعقد ويبقى رئيس جمهوريتنا من (مصر موتورز) يادى الهنا