معلومات خطيرة و مؤكدة عن ميدان التحرير - عمرو سلامة

[MmFFoR]

ظهرت شائعات أخيرا عن ما يحدث في ميدان التحرير، كان بعضها حقيقي و بعضها لا أساس له من الصحة، و بسبب نزولي لعدة مرات قررت أن أوضح صحة هذه الشائعات من كذبها.

ترددت شائعات عن توزيع وجبات كنتاكي و أموال للمتظاهرين، ٥٠ جنيها بالتحديد، و إحقاقا للحق، الوجبات لم تكن كنتاكي فقط، في ناس مابتحبش كنتاكي، فبيجيبوا لناس ثانية ماكدونالدز، و ناس ثانية برجر كينج، و ناس ثانية غاويين فقر، مصممين على الكشري و الفول و الطعمية و لهذا كشري حمادة و التابعي الدمياطي أثبت تورطهم في تحريك هذه المظاهرات الحقيرة.

أما عن الأموال، فرفض المتظاهرين أن يأخذون أموالا مصرية، نظرا لنزول سعر الجنية، و نظرا لإنهم جميعا أتم من فلسطين و إسرائيل و إيران، فهم يقبلون الأموال فقط بالشيكل و الريال الإيراني، و لما لقوا الموضوع هيطول قرروا يا يقبضوا بالشهر يا بلاش.

و ترددت الأحاديث عن الآجندات الخارجية، و تناسوا الحديث عن إن بعد أن إنتهت الآجندات بسبب العدد الكبير، فقاموا بتوزيع نتائج حائط، و الأغنياء كل منهم أتوا له بالآيفون، حيث أنه يضم أجندة داخلية، أما أحدث صيحات الموضة هي الآي باد، و دول هتلاقوهم مع المندسين الأوروبين بالذات نظرا إن سعره في أوروبا مش حنين.

أما عن قيام المتظاهرين بدورات تدريبية في الخارج فهذا عبث، لإن المدرب المصري أثبت جدارته، و كانوا بيستخدوا الكوتش حسن شحاتة لما كان قاعد بيهوي بعد كاس أفريقيا و هذا ما يدل على إنهيار مستوى المنتخب بعد البطولة لإنه ماكنش فضيله.

أما عن تورط حماس و الإخوان و إيران و إسرائيل و أمريكا و كل القوى الخارجية وراء المظاهرات لتفتيت أمن مصر، فأنا أأكد لكم أنني تواصلت شخصيا مع القوى الحقيقية وراء الأحداث، و هم جماعة الجهاد زحل، و تنظيم الشرفاء من بلوتو، و أهمهم التنظيم السريالي من كوكب المريخ، و لهذا لم تتأثر المظاهرات من قطع الإنترنت لإن الإتصال كان من الساتالايت.

في ناس بتقول إن البلد واقفة و حظر التجول قائم بسبب المظاهرات، مش بسبب غياب الشرطة المفاجىء، و بقلهم شطار، و ربنا يخليلكم عقولكم، و مالهمش حق الناس اللي بتطالب بالعدل و الديموقراطية، المهم يرجع الشباب يقفوا قدام كوفي بين، و نرجع نقف في إشارات و نشوف العسكري بإثنين جنيه عشان يفتح الإشارة، و نقف في طوابير العيش و نموت فيها، و نرجع لحياتنا الطبيعية بقى، و نرجع لمؤتمرات الحزب الوطني اللي بتضحك على أي دعابة مرحة يقولها ريسنا حبيبنا، و نرجع نقرا مقالات أساما سرايا و ممتاز القط عن كيف عبر بينا الريس محنة مظاهرات الشباب السيس.

أما عن محاولات إمتطاء المعارضة لركوب الحركة، ما طبعا، ما إنتم خدتوا أحصنتهم و جمالهم من نزلة السمان و إديتوها للبلطجية، هيركبوا إيه؟ و عن ركوبهم الموجة، أحب أقولهم إنهم لو كانوا بيعرفوا يعوموا ماكنش زمان مصر وصلت للحال ده.

أما عن إقتناع الناس السائد أن مبارك والدنا جميعا، أنا بأؤكد إن تحليل ال دي إن إيه اللي إتعمل لكل شباب المظاهرات لسة موصلهمش بسبب إن المستشفيات مشغولة في مئات الوفيات و آلاف الإصابات من الشهداء و الأبطال اللي قتلهم و ضربهم و عذبهم السيد والدهم، و لكن من الواضح من تقدير العمر لمبارك و للمحتجين، فهو يا إما راجل صحة نمسك الخشب يا إما هم أحفاده بقى، و أنا أميل لمنطق إنهم أحفاده و لكن نرجع نقول أعز الولد ولد الولد.

أما عن إن كل القنوات كاذبة بإستثناء المحور و التليفزيون المصري، فأنا زرت كل هذه القنوات الكاذبة، و هم جميعا مقتنعين فعلا إن الكذاب ما بيرحش النار، بيروح الحزب الوطني، و كلهم عندهم هذا الطموح العظيم.

تحيا أعظم ثورة مصرية، التي قد تكون أعظم ثورة في التاريخ، التي ألهمت العالم، التي كانت غربالا، لتعلم من هم العقلاء و الحكماء و من هم الذين نجح نظام إعلامي و تعليمي ظل ثلاثون عاما ماسك دبوس و بيفسي عقولهم من أي منطق.

و أخيرا... إسفوخص.

ياريت تشوفوا الفيديو ده... تأكيدا على كلامي كمان.

[MIDO-SPICY]

اشكرك وبشده على موضوعك

[zaraki]

والله يا استاذ mmffor الناس زهقت وبقت بتصدق اى حاجة تديهم اى اطمأنان وكان الله فى عون مصر وشباب مصر العظيم

ربنا يباركلك والله فعلا انا وصلت لمرحله ما يعلم بيها الا ربنا وكلام يحرق الدم وكلام اهبل من التلفزيون المصري زي دول قله مندسه وعايزين يخربوا البلد والفيديو ده بيرد علي شوية البهايم دول

[engima]

اولا السلام عليكم

-ازيك يا mmffor انا اكنت عاوز اتكلم فى الموضوع ده واختلاف الراى لا يفسد للود قضية ( او للوز صنية) ما علينا وانا اتكلم عن كل نقطة على حدى و هاقول راى بصراحة واتمنى انك ما تزعلش منى لو اتكلمت بحدة فى بعض النقط .

- الوجبات و الاموال : بص يا باشا انا متأكد من موضوع الفلوس و الاموال ولكن الوجبات دى( الله اعلم ) بس فى ناس كتير عاوزة الوضع يفضل كدة و اغلبية الناس اللى كانت بتدفع فلوس بيبقوا اجانب و بيدوا الناس شعارات لاسقاط مصر .


- المتظاهرين و الدورات الخارجية: بيتهيئلى ان الموضوع ده محدش يخوض فيه لانه موضوع شائك و ممكن يكون صح او خطأ و كلنا نعرف ان الناس دى ممكن تعمل اى حاجة (اسرائيل و امريكا) اه معلش كنت هانسى بلاش تدخل شحاته و المنتخب فى الموضوع لان كل اللى اتعمل فى 6 سنين ضاع فى مباراة مصر وامريكا و اصبح الترتيب لمنتخب مصر حاجة و ثلاثين بعد ما كنا التاسع و خلاص الدورى مفيش السنا دى و ممكن مافيش كاس امم كمان .


- القوى الخارجية : معلش يا باشا مينفعش الكلام اللى مكتوب لانه بعيد كل البعد عن الصحة و مينفعش نهزر فى الموضوع دة يا باشا لان فعلا دلوقتى ايران بتخبط فينا و لبنان كمان و الجماعات الاسلامية و الراجل اللى هوا قائد التيار الاسلامى فى ايران مش فاكر اسمه معلش يا باشا ماتحسسنيش انك مصرى من قطر (ما تزعلش منى)



- نيجى بقى لموضوع ان اختفاء الشرطة هوا سبب ان البلد واقفة معلش انا مش موافقك لان ايه اللى خلى الشرطة تختفى !!!! مش المظاهرات يا جماعة (يعنى انتا عجبك يا باشا وقف الحال ده انا والله بقالى اسبوع ما روحتش الجامعة)........... والله الشرطة كانت بتدافع عن نفسها و كانت عايزة تقلل التجمعات بقدر الامكان و بدأوا مع الناس بخراطيم المياه وبعد كدة الناس ابتد تضرب الامن المركزى و الشرطة وبعد كدة اللى حصل يا عجبى الاقسام كلها اتحرقت يا جدعان هى مش دى فلوس الشعب فلوسنا والله انا مش عارف اقول ايه .

- الاعلام الكاذب: معلش ممكن محدش يفهم حكاية ان الاعلام جزء من سياسة البلد ( بس انا معاك ان الاعلام كان بيحجب حجات عن المشاهد) و دة ممكن يكون لمصلحة البلد يعنى انتا يا باشا يرضيك ان القنوات تعد تعرض مشاهد ضرب و عنف و قتل 24 ساعة كدة تسبب الذعر للناس اكتر ما هما مذعورين و معلش انا احب اشاهد التلفزيون المصرى رغم انه يحجب بعض الاشياء عشان هوا ارحم من بعض القنوات زى الجزيرة و العربية (بيعرضوا الحجات المستفزة اللى بتثير الناس و لو الدنيا ابتدت تهدى يعدوا يعيدوا و يزيدوا فى المشاهد اللى فيها ضرب لحد ما تولع تانى وكانت قناة الجزيرة عمله اللوجو بتعها على موقع النت معا لاسقاط مصر.

- و حسنى مبارك مش محتاج كلام والله الراجل ده ليه الجنة ياجماعة مينفعش راجل حارب فى 73 يضر البلد دى والله انا كنت بأبكى كل ما اشوف حد بيشتمه لان كنت حاسس ان فى رابط ........ يا جماعة الراجل لا يستحق كل الاهانة دى اقل حاجه كان خاد اول طيارة للندن واحب اوضح حاجة الكتير مش واخد باله منها ان هوا عايز يحسن ختامة فى البلد دى و يسجله التاريخ جانب العظماء فى تاريخ مصر.

و فى النهايه احيك على الموضوع و احيى الناس بتوع المظاهرة الاولى 25 بس بعد كدا بحيى الناس اللى هما فى ميدان التحرير و مش عايزين يمشوا بعد خطاب الريس الثانى اقول لهم ان انتم اخذتم الجائزة الاولى فى الوطنية ( لقد ساقوقم مثلما تساق البهائم)