حقى وحقك

[samirayad]

زى ماهو باين من العنوان

ونظرا لطبيعة ميولى الهندسيه

فأنا أسميتها بالمعادله

لابد لنا من معادله متساوية الطرفين

لكى نصير بلد ناجح

________________________

الطرف الأول

1- حكومه تدعم كل الجوانب الأيجابيه والسلبيه فى المجتمع

بحيث يكافأ المنتج ويعاقب المقصر

2- حكومه تعترف بالكفاءات والخبرات

ولاتعترف بطوابير العيش وكل واحد حسب دوره ............

أبدا

عاوزين كل واحد ياخد حسب كفاءته لخلق روح التنافس والتطوير

مش أبص ألاقى ( كله زى بعضه ) فى التقدير المادى والمعنوى

3- حكومه لاتستحى من أعطاء دور قيادى للأحدث ( مع الكفاءه )

4- حكومه تقف فى جانب كل أنسان شغوف للتطوير ....

وتقف ضد كل أنسان تافه

يريد أن يلعب بعقولنا ( علشان كل هدفه يلم إللى فى جيوبنا )

_________________________ __

الطرف الثانى للمعادله

1- مواطن يطالب بحقه .......ولكن يجب أن يسبق مطالبته بحقه

أداؤه لواجبه

مش أبص ألاقى فئات من الشعب وخاصة من موظفى القطاع العام

عاوز يبقى مرتبه يتعدى الألف جنيه ( كمثال )

وهو فى الواقع

بيروح يمضى فقط ..........ويروح

أو مقضيها أنتخه وتزويغ وتضييع للوقت فى مجال عمله

2- مواطن بياخد مرتب وهو مدرس أو طبيب مثلا

ومعتمد على الوظيفه ( بدون أى آداء أيجابى فى محل عمله )

وحيكمل تهليب الناس بره لما يروح من الوظيفه


( دا لو كان بيروح شغله أساسا )

وغيره من السلبيات الكتيره الموجوده ولا نستطيع نكرانها

_____________________

حسيبكم تكملوا بأنفسكم السلبيات


وكل واحد يدلو بدلوه

فلولا الجماعه المخلصه

لجميع أطرافها .........

فلن تنهض الأمه

[cheetosmini]

سياسة الدنيا هى الثواب والعقاب
يعنى لو كنت كويس فالدنيا هتخش الجنة ولو وحش هتخش النار
هى دى بالظبط الروشتة السحرية لحل كل مشاكلنا يعنى لو واحد اشتغل كويس يتجازى كويس
ولو واحد غلط يتعاقب ويعتذر مهما كانت سلطتة ونفوذة وبكدة ممكن نبقى زى الناس الى سبقونا فى كل حاجة

[MIDO-SPICY]

انا عايز اقول انى لسه شايف على التليفزيون المصرى دلوقتى مداخلهمن شاب اسمه تامر مقدرتش اعمل او اقول حاجه بعدها غير انى اخد سيجارتى واخرج اقف فى البلكونه علشان ادارى دموعى وحرقة قلبى واللى مقدرتش انى اوقفهم ..

الشاب بيتوسل للتليفزيون وهو منهار تماما من كتر البكاء انه يتواصل مع الشباب قبل بكره ويقولهم يروحوا

هو واحد من اللى بقالهم 10 يام فى الشارع ولما احتكم لصوت العقل روح هربان علشان ماحدش يقول عليه انهخاين

ومعرفش قرار الحربيه بامكانية انهم يروحوا غير لما راح عند اقارب ليه فى غمره

وبيتوسل للتليفزيون انه يوصل التحرير دلوقتى ويبلغ الشباب بالقرار دا

فين ناس كتير جدا عايزه تروح وخايفه من امن الدوله

بيقسم بالله العظيم اكثر من مره ان فيه ناس مش مصريين دلوقتى جوه المظاهرات وكانوا معاهم من اول يوم بيتكلموا معاهم وكانوا بيتظاهروا معاهم وبيجيبولوهم وجبات وشاى وسجاير وبيعملولهم اللافتتات اللى هما عايزينها وقاعدين ياثروا عليهم طول الليل

وقال انهم قالولهم ان بكره جمعه الوداع .. وداع لمين ؟؟؟

وانهى مكالمته وهو فى حالة اعياء من كتر البكاء

بالماسبة مزيع القناه طلب منه انه يجى دلوقتى على التليفزيون علشان يتكلم معاه وحولوا الخط على الكنترول علشان ينسق معاهم هيجى ازاى بس الولد مابداش قبول او رفض

_________________________ _________________________ ____

انا حاسس يا جماعه ان مصر بتسقط .. مصر تعدت مرحلة الثورة واصبحت فى حالة حرب .........

وحرب على مين ... حرب علينا احنا مش على شويه مبانى ولا على شويه فلوس نقدر بتعبنا وعرقنا اننا نعوضهم واحنا فخورين باللى عملناه

دى حرب ابادة للشباب اللى انا فى قمه حزنى انى ماكنتش معاهم علشان افضل فخور بنفسى باقى عمرى ادام نفسى وادام بنتى وادام عيلتى وبلدى

حرب اباده للشباب اللى رفعوا اسم مصر فوق قوى .

حرب اباده للشباب اللى ماحدش قدر يعمل زيهم مش من 30 سنه لا يمكن من 50 سنه او اكتر

حتى ثوره يوليو الشهيره اللى عملها مش شويه شباب عزل .. لا دى قياده جيش ليهم سلطه ونفوذ فى البلد ومعاهم سلاح ثقيل

مش عارف اعمل ايه للناس دى علشان احاول اجنبهم ولو ا % من اللى ممكن يحصلهم بكره

دمهم هيروح هدر

مش لاقى غير انى اقوم اتوضى دلوقتى واصلى وادعى ليهم ان ربنا يحميهم بكره من عنده ويبعد عنهم اى شر ويبيد الظالمين

الناس دى مش عايزه حاجه اكتر من انها تحس انها ليها كرامه فى بلدها ودى ابسط حقوقهم وكون ان الحكومه تنفذلهم دا فدا مش تفضل منهم وانما دا واجب عليهم

يارب حافظ علينا وعلى بلدنا وابعد عنا اى شر ..

اللهم اضرب الظالمين بالظالمين واخرجنا منهم سالمين

يارب رجع لاخواتنا فى ميدان التحرير دلوقتى رشدهم وعقلهم قبل ما تحصل الكارثه اللى كلنا هتسيب جوانا شرخ كبير

وبطلب من جميع الاعضاء اللى فى المنتدى انهم بكره فى صلاه الجمعه ان امام المسجد يدعوا فى صلاته ليهم وان ربنا يخرجنا من اليوم دا سالمين

يارب

انا بكتب المشاركه دى فى اكتر من موضوع دلوقتى علشان اكبر عدد من الاعضاء يقروها ويدعوا معايا للشباب دى ويدعوا وهما بيصلوا من دلوقتى لبكره فى صلاة الجمعه