نقل تجربتي مع مرور الباشاوات ...... مرور الجزيره

[amrmaismail]

السلام عليكم شباب المنتدي المحترمين

انا بنقل تجربتي للأستفاده العامه وهحاول اختصر
انا كنت بنقل عربيتي من مرور الدقي للأسكندرية وبقالها سنه وملفها مش عايز ييجي
وبعد السفر رايح جاي والفحص والبحث والتمحيص لاقيت بالصدفه ان الملف بتاع الدقي فيه رخصه كانت تبع مرور بولاق والجزيره يبقي اكيد اصل الملف هناك

اخدت استعجال باليد ورحت علي هناك وانا بدعي انه يكون مرور محترم وماتمرمطش
المهم عرفت ان مرور الجزيره بقي منفصل عن بولاق وبيخدم الجزيره وجاردن سيتي

الصراحه ماشي عالكورنيش لاقيت كذا يافطه مكتوب عليها مرور الجزيره بالأسهم لغاية ما وصلتله

مبني نضيف جدا وكأنه سفاره او فيلا اول ما تدخل فيه زرع وورد وحاجه ماكنتش مصدق الصراحه ان ده مرور
مافيهوش ولا طابور.. وكل حاجه عليها لافتات ارشاديه وبيانات بالاوراق المطلوبه
الموظفين بشوشين ... والله ..... والمكان كله مكيف والاضاءه ممتازه اكنك في بنك
والعملاء قصدي المواطنين اللي قاعد ماسك الآي باد او الاب توب وبيخلص شغل علي ما ينادو اسمه واللي بيشرب عصير والهدوء يعم المكان

قلت الحمد لله هبعت الملف وارجه علي اسكندريه وبقيت مش مصدق اني في مصر
لكن هيهات انت لسه في مصر
العسكري اخد مني الطلب ونزل يجيب الملف
وطلع يقولي الملف مش موجود ... ليه ؟
اصل المرور ده جديد ومش كل الملفات جت من بولاق اكيد هتلاقيه لسه في بولاق روح لواحد هناك اسمه عادل هيجيبهولك

طيب... اكيد انا عامل حاجه غلط ربنا بيعاقبني
رحت مرور بولاق اللي في قسم بولاق جنب المستشفي العام

من الدخله كده عرفت اني فمصر والحمد لله
الناس كلها مكشره وبيكلموا نفسهم ...الشتيمه والسباب صوتها يعلوا علي صوت الزحمه
المهم ركنت بالعافيه بعد ماديت واحد ٥ جنيه علشان اركن قدام محله ربع ساعه

وعرفت ان البطل المصري اللي هيدخل معايا النهارده اللحلوح المصري ( الجنيه )

دخلت القسم عسكري البوابه قاللي
- ايوه ياباشا اؤمر
- عايز واحد اسمه عادل يجيبلي الملف ده
- عادل لسه مجاش يا باشا بس انا هعمل معاك واجب ابن مـ..... علشان انت شكلك سمح وصباحك زي الفل انشاء الله
-ماشي ياسيدي وطبقتله خمسايه في ايده
راح منادي علي واحد عسكري قالله خد الباشه لإيهاب يحضرله الملف ده لغايه ما عادل ييجي وقاللي اقعد هنا يا باشا علي ماييجي ادخل معاه

حاضر ..

راح العسكري لإيهاب قاله ما بحضرش ملفات لحد لما استاذ عادل ييجي هو يبعتني
( طبعا ما اللحلول ما تكلمش )
وصل عادل ودار معاه الحوار الاتي
استاذ عادل عايز الملف ده
قام بصلي بإزدراء وماردش عليا ودخل قعد علي طربيزه بعيد يفطر
وبعد ربع ساعه
- استاذ ايهاب الملف .. مسك الورقه وقاللي
- روح لناصر وشاور علي اللي جنبه
- استاذ ناصر عايـ...
-نعم نعم فيه ايه هوا كل حاجه ناصر ناصر
- اهدي بس يا استاذ انا عايز الملف ده
مسك الورقة وقاللي
- مش عندنا روح الجزيره
- رحت الجزيره مالقيتهوش هناك قالولي هتلاقيه هنا
- ياسلام طب بقي ابقي خللي اللي قالك انه هنا ييجي يجيبهولك
- يا استاذ اتكلم بإحترام شويه انت موظف حكومه دور علي الرقم في دفتر الصادر عندك لو لاقيته يبقي هناك لو لأ يبقي هنا
- انت هتعلمني شغلي بقولك مش هنا
- فين يعني
-وانا اشعرفني . وسع من قدامي

طبعا الدم غلي في عروقي قلت هدخل لرئيس الوحده أكيد هيجيبلي حقي
فين رئيس الوحده ؟؟
رحت مكتبه لاقيت عسكري قلتله ده مكتب المقدم وليد
قاللي اه بس ماتدخلوش احسن يكرشك
يكرشني ؟؟ يكرشني ليه ... والله لنا داخله

خبط ودخلت لاقيت المقدم وليد شاب مبتسم بصلي قلتله :
- حضرتك المقدم وليد
- نعم ... وهو مبتسم
- انا بنقل الملف ده لأسكندريه والموظف مش عايز يجيبهولي
لاقيت الابتسامه راحت في ِثانيه وحلت محلها نظرة مزيج من الأزدراء والتعالي والعجرفه وكأنه عايز يشتمني ..
- وعايزني اعملك ايه
- عايز الملف مش انت رئيس الوحده
- مش قالك مش عندنا .. خلاص يبقي مش عندنا
- كده من غير ما يدور
- اه هو كده
- طب انا اعمل ايه يعني .. ارجع تاني الجزيره اقولهم مش هناك
- لأ روح للموظف تاني قوله طلعهولي


ماشي
روحت للموظف قولتله بيقولك الباشا طلع الملف ده
قاللي وبعدين ياأستاذ احنا موراناش غيرك معنديش ملفات
دخلت للظابط قولتله رد قاللي ايه

ما انت مستفز الصراحه مش قالك مش عاندي خلاص يبقي مش عانده
ياولاد التييييييييييت مانت لسه قايللي خليه يطلعهولك
رديت عليه بثورة
- انا المستفز بقولك مابصش في الورقه اصلا وراح راميهالي يبقي انا المستفز
- انت بتعلي صوتك اطلع بره
وقبل ما اتـ.. علي وشه بثانيه

العسكري اللي واقف قاللي اهدي يا أستاذ الموضوع بسيط احنا نقلنا الملفات كلها الجزيره ارجع هناك قولهم هاتولي الملف يا إما تدولي ورقه تقولوا فيها الملف مش عندكم

رديت بنفاذ صبر حااااضر وخرجت
والظابط بيقوللي بجليطه ما تنساش تقولهم هناك برده الظابط رمالي الورقه

رحت الجزيره

لاقيت العسكري اللي بعتني واقف مع عسكري تاني حكيتله اللي حصل
قاللي دول ولاد وـــــــــ الملف عندهم قام زميله قاله ماتروح معاه تجيبهوله

قال مش هقدر
قلتله وانا بغمزله بعيني مش هتقدر ليه تعاله وانا هظبطك
قاللي معاك عربيه ( المرورين جنب بعض جدا علي فكره )
قلتله معايا يا سيدي
واحنا فالسكه قاللي ظبط الموظف اللي هناك ولا لأ؟
قلتله هو اداني فرصه ده مش عايز يبص فالورقه
قاللي خلاص مالكش دعوه انا هاقوله انك هتظبطه

المهم رحنا قام واخد الموظف علي جنب ( بيقوله اني هظبطه ) لاقيت الموظف اتقلب ١٨٠ درجه دخلني جوه ( وده ممنوع ) وقام مطلعلنا كشوفات الصادر من ٢٠٠٦ ( تاريخ الرخصة ) ل ٢٠١٠ وقالنا دوروا في دول لو مالقيتوش حاجه يبقي الملف عندنا
قعدنا انا والعسكري ندور ساعه لغايه ما جالي حول واستجماتيزم ما لاقيناش حاجه
الله طب الملف فين لو ما راحش مرور تاني ومش عندكم
قام الموظف قال للعسكري فاكر الملفات القديمه اللي ماجددتش لما جيتوا تنقلوا..؟ العربيه ماكفتش قمتوا سبتوها مرميه ورا الخزنه
قاله اه
-هتلاقيه ممكن فيهم
رحنا غرفه متربه ومعفره قعد العسكري يدور نص ساعه لغاية ما طلع بالمولود قصدي بالملف

وطبعا انا ما بقتش مصدق
ونفسي ادخل للظابط اشتمه واقوله الملف اهه فالمرور بتاعك
بس المسامح كريم ( احسن ياخد مني الملف ويقوللي مالكش عندنا حاجة )

واحنا خارجين الموظف اياه قابلنا قاللي هاه كله تمام يا باشا ( وبيفرك ايده )
قلتله باستفزاز اه كله تمام و متشكرين يا ريس واديته خبطتين علي كتفه
طبعا بصلي بصه كان عايز يقتلني لأني ما ظبتوش بس هو يستاهل
المهم رجعنا علي مرور الجزيره وصدرت الملف والحمد لله

وطبعا ٥٠ جندي للعسكري اللي تعب معايا

وانا آسف اني طولت بس فهمت من المشوار ده كام حاجه

- اني لو كنت فضلت ابعت طلبات استعجال من اسكندريه كان عمره ما هييجي
- ان مافيش موظف ابدا هيدور لحد علي ملف بالشكل اللي دورت بيه انا والعسكري
- ان الملف ده لو انا ما سافرتش ولاقيته كان زمانه اتعدم زي مالعسكري قاللي
- ان المصالح الحكوميه المصريه لسه زي الزفت والحمد لله وعمرها ما هتتعدل

وعمار يا مصر

[data]

انت بصراحة كويس انك هادى
للاسف انا عيبى ان دايما متسرع ومتنرفز وبدخل فى مشاكل كتير عشان نرفزتى
بس كان من الاول تغمز الراجل وكان الموضوع هيتحل
بلد مايعلم بيها الا ربنا
بكره المصالح الحكومية

[محمد شهاب]

يا باشا انت عليك وعلى واحد من مؤلفين المسلسلات
واتفرج على احلى دراما فى رمضان الجاى
مسلسل انا والمرور وهواك
دراما مرورية اصلية مستخبية بالملوخية
وسلم لى على الحكومة الالكترونية




تحياتى للجميع

[hazem_khidr]

شكرا ليك يا باشا علي نقل التجربه و الاسلوب الرائع في السرد
بصراحه انا بحاول بقدر الامكان اشتري عربيه يكون رخصتها ساريه و من مرور محترم
علشان لما انقلها عندي ما يبقاش فيه مشاكل
و عندنا في المحله ميزه ان المرور مظبوط جدااااااا و ما فيش فيه اي تلاعب
علشان كده ببقي مطمن و انا بشتري و عارف ان الملف بأذن الله حيجي من غير تعب
بصراحه يوم لما بروح المرور بيبقي يوم جميل جدا علشان الناس اللي هناك متعاونه
و من غير ولا مليم مع اي موظف هناك
الكل ماشي بما يرضي الله
تحيه الي العقيد ماجد ناشد رئيس وحده مرور المحله و جميع الضباط و الموظفين