مطلوب مساعدة فى تسعير سيارة

[mr_astra]

السلام عليكم ورحمة الله
اخوانى الكرام لى صديق هايشترى عربية لادا وانا عمرى ما ركبتها ولا اعرف حاجة عنها
انا شوفت العربية هى لادا 1500 باربع فوانيس موتور 1500 موديل 82 الحالة الخارجية عاوزة تترش كلها ..........الموتور كويس جدا سوقتها ماشية حلو وبتعدى الـ 120 كم .........العفشة راكب ليها جوز مساعدين وبيض جديد
الصالون يعتبر معقول والعدادات شغالة الكاوتش نسبة 60 %
مش هاقول هو طالب كام لانى عاوز اعرف رايكم تعمل كام؟؟؟؟؟؟؟؟؟؟؟؟؟؟

[tom_gr]

صديقى العزيز
اعتقد انى اقدر افيدك لانى كان معى العربية دى

مواصفات عربيتى وانت تقدر تقارن بينها وبين مواصفات العربية المعروضة عليك
- عفشة مجددة بالكامل
- كاوتش تيوبلس عريض جديد لنج
- جنوض اسبور تايوانى منتهى القوة والجمال
- سمكرة مافيهاش غلطة واحدة
- دهان مافيهوش خربوش
- كراسى مجددة بالكامل اكنها زيرو
- فرش جلد 2 لون ماكنش فييه زيه حتى فى العربيات الجديدة
- تابلوه جديد لسه طالع من الكارتونة ( استيراد )
- فرش سقف وابواب جديد
- زجاج امامى وخلفى وابواب جديد بورقته لون عسلى غامق شكله فاميه تحفه
- ماتور 1200 سى سى اكنه لسه جديد ( بيعرق مايه )
- سنتر لوك 2 ريموت
- 4 زجاج كهرباء
- 4 وحدات رفع زجاج
- كاسيت لسه بورقته
- طارة دركسيون 2107 الجديدة
- ديفل استيراد ( مش فاكر الماركة بصراحة )

العربية ( اقسم بالله وربنا شاهد عليا ) مافيش اى مكان روحته الا اتقالى حاجة من اتنين 1- تبيع العربية دى واديك فيها / 2- العربية دى دافع فيها اوى ) فى محطة البنزين - عند الميكانيكى - فى الشارع - فى الشغل - ادام محلات العربيات

نيجى بقى للسعر الى انت منتظرة ( 17700 الف )
اكملك بالمرة علشان يبقى ادامك فكرة كاملة عن العربية
اقلك سبب انى بيعتها
1- كانت اول عربية ليا واول خبرة فى مجال العربيات ( كنت مرعوب ودايما حاسس انى اضحك عليا )
2- كانت واخده عين جبارة خوفتنى منها وجابتلى حاله نفسيه منها ( لانى بتحسد بسرعة ) بياثر فيا الحسد بسرعة
3- شكلها قديم ( موديل 80)
4- ماتورها ضعيف شويه ( بانظر لرغبتى فى ماتور قوى فى العزم والسرعة والسحب والسفر ) وصوتها كان عالى
5- كان فيه حاجة مش مظبوطه فى العفشة كانت قرفانى ( بالنظر لانها اول خبرة ليها )
6- تقيلة جدااا عليا ( كل الادا كده - وبالذات لانى كنت بتعلم وعاوز حاجة ناعمه - فى الزحمة والركنات كانت بتقرفنى )

نصيحتى ليك
بعد ماتقارن المواصفات دى بمواصفات العربية الى ادامك ماتعديش ال 13 الف
لو هاتجيب لادا - هات 2105 او 2107 موديلات من 84 ولحد 94 سعرها من 16- 24 حسب الحالة والموديل والكماليات ( اعادة بيعهم اسرع - عليهم طلب اكتر - شكلهم احسن شويه )

اعتقد كده عملتلك تقرير وافى ولو فيه حاجة تانية عاوز تسال فيها اكتبهالى وقولى

[mr_astra]

الف الف الف شكر دة انت عملت تقرير جامد جدا لدرجة انى اتخيلت انى شايفها ادامى وسايقها كمان
والله انا هاخد بنصحتك واجيب زى ما التلى وخصوصا انى كنت فى سوق العربيات امبارح ( الاحد ولقيت فعلا الفرق بسيط )