#1
|
||||
|
||||
شويه اسئله علي عفشه الكريستاله
دلوقتي انا عربيتي لانسر كريستاله كنت ركبتلها 2 مساعد امامي kyb من 6 شهور
ومن اسبوعين سمعت رجرجه في العربيه وطقطقه في الدركسيون قلقت جامد ورحت توكيل لانسر اللي في قليوب وكشفت عالعربيه وتم ايضاح الاتي 1- 4 مساعدين جداد 2- طقم بارات واتياش دركسيون 3 كاوتش تراب للمساعدين وكاوتش بيانو الكلام ده حيدخل بالتركيب علي 2000 جنيه انا دلوقتي مظبط فلوس بس مش عاوز اصرف المصاريف دي كل شويه وعشان كده سالت عالعفشه كامله بكام واتقالي ان العفشه الميراج مساعدين وسوست ومقصين تعمل 1500 والعفشه الايفو الرياضيه تعمل 3500 طبعا انا ولا عاوز رياضي ولا بجري ولا بعمل اي حاجه كل اللي عاوزه عفشه تستحمل مطبات مصر الظريفه عاوز اعرف بقي الاتي 1- ايه الفرق بين عفشه الميراج وعفشه الايفو ليه الايفو غاليه كده اوي 2-هل لو ركبت عفشه ميراج حتفرق معايا في الاداء؟ 3- ممعايش فلوس اجنط دلوقتي ممكن يركب عليها 13 عادي ولا حيبقي وحش 4- لو جنطت هل حبقي بردو محكوم ب15 عشان غلط ولا خلاص بقي احط 16 و17 عادي 5- سعر العفشه كام هل 1500 ولا اكتر ولا ايه 6- تتجاب منين واضمن منين انها سليمه ومن حد مضمون واركب الكلام ده فين ارجو من الخبراء افادتي في الموضوع ده عشان انا مش عاوز استعجل واروح اشتري مساعدين تاني وفي الاخر يبوظوا طالما حشتري وادفع مبلغ زي ده يبقي اشتري صح وشكرا لسعه صدركم
__________________
my mitsubishi love 4 ever |
#2
|
||||
|
||||
رد: شويه اسئله علي عفشه الكريستاله
الأيفو عفشة وسوست رياضية ناشفة بدرجة كبيرة, علشان تحقق للعربية الثبات على السرعات العالية والملفات, وطبعا ثبات الأيفو أقل مايوصف به أنه خيالى.
الميراج عفشة شبه رياضية, لأن الميراج معمولة علشان تقدم الأداء والراحة معا, فنقدر نقول أنها هتلائم عربية للأستخدام اليومى, بس هتبقى أنشف سنة من العفشة الأصلية بتاعة اللانسر, وأحتمال متحسش بالفرق. عفشة الأيفو غالية على الفاضى, لأنها هتبقى ناشفة بدرجة كبيرة, وحضرتك مش محتاج مميزاتها لأن اللانسر عمرها ماهتوصل للسرعة اللى يخليها تستفيد من العفشة دى, أو حتى حضرتك هتحتاجها فى أستخدامك للعربية, وكمان التجار عندنا متصورين الأيفو عربية خيالية, وبيعلوا فى سعر قطع غيارها جدا وخاصة أن تمن نصين أيفو أستيراد 22 ألف جنيه, بس الصراحة انا معرفش عفشة الأيفو تركب عند حضرتك ولا لأ, الأيفو دفع رباعى واللانسر كبالن وأختلافات التصميم (شكلى بأفتى). الجنط ال 13 عادى مهو راكب فى كل عربيات مصر, بس حضرتك مقلتش أيه اللى راكب على العربية, لو قصد حضرتك علشان العفشة فمش هتفرق فى حاجة. الجنط ال 15 مناسب جدا, كشكل وأداء وعملية, أعلى من كده ممكن, بس مينفعش فى مصر علشان كل ماعرض الكاوتش يكبر كل ما أحساسك بالطريق هيزيد, ومع عفشة ناشفة (أو حتى طرية) مش هترتاح فى السواقة على الطريق, وطبعا فيه عوامل تانية زى وزن الجنط وحجمه ودى هتأثر على الموتور والكبالن والعفشة ككل على المدى الطويل. وده غير أن حضرتك مش هتحتاج جنط كبير للدرجة مع عربية عادية الا للمنظرة , وسعره وسعر الكاوتش بتاعه هيبقى غالى وهيتعب جيبك فى ثمن الكاوتش على المدى الطويل. الأسعار أنا معرفش فيها قوى الصراحة, بس 1500 مناسب لعفشة ميراج, بس ممكن تهز فى السعر حبة كويسين , والأيفو بلاش منها خالص علشان الأسباب السابق ذكرها. بس ليه حضرتك مفكرتش فى المساعدين المونرو, سعرهم أغلى من ال KYB حبتين بس كواليتى أعلى, ناشفة حبتين بس ثبات اعلى. وأنا من رأيى حضرتك تنزل الجمعة الجاية الحرفيين, وتقطع المحلات أسئلة وفصال, وتجيب مساعدين جداد مونرو و باقى المستلزمات من هناك جديد وأستيراد وتتابع مع ميكانيكى هناك, ولو مش عايز جديد بتوع الأستيراد ماليين الدنيا, بس لازم لازم تاخد من الراجل كلمة, يعنى قل له هاخدهم تحت التجربة, او على ضمانتك, علشان لو لقدر الله طلع فيه حاجة ترجع جرى تبدلهم, وياريت تركب العفشة عند ميكانيكى فى نفس المنطقة, علشان يطمن على حالة المشتريات , وتلحق تجرب فى نفس اليوم. وبأذن الله تقدر ترجع العربية لمجدها, بالتوفيق.
__________________
|
#3
|
||||
|
||||
رد: شويه اسئله علي عفشه الكريستاله
بجد تسلم ايدك جبت المفيد انتا
انا كنت حاسس بردو ان الدنيا حترسي علي ميراج بس حته مساعدين مونرو دي انا معرفش عنها حاجه بس الناس كلها بتنصح عالنت بالمساعدين الكي واي بي فتنصحني اجيب المونرو دي منين ولا اجيب كي واي بي مره تانيه واتلم في المشي سؤال تاني بقي هل الجنط ال15 فعلا حينشف العفشه حتي لو جبته المقاس الموافق لل13 اللي عندي ؟؟؟ انا عندي جنط 13 - 175 -70 وحركب 15-195-50 كده مفيش مشكله في المقاس بس كنت قريت ان ال15 ححس بزلط وطوب الطريق واحس ان العفشه انشف شويه مستني ردك عشان ان شاء الله حنزل انفذ ان شاء الله يوم الجمعه الجايه او اللي بعدها
__________________
my mitsubishi love 4 ever |
#4
|
||||
|
||||
رد: شويه اسئله علي عفشه الكريستاله
وكالعادة يقدم محمد باشا الرد الشافى, ربنا يكرمه. ال KYB مع أنهم يابانى ومونرو أسبانى, لكن المونرو أثبت كفائته وتحمله, بس المونرو أنشف من الKYB وهيزود الثبات, بس هيقلل الراحة شوية, وهو أغلى من الKYB بس بيعيش وعليه ضمان سنة فمش هيبوظ زى ال KYB. الكاوتش لو حضرتك لاحظت مساحة الأطار الجديد هتزيد بصورة كبيرة عن الأول, وخاصة أن أرتفاع الكاوتش من الجنب هيقل بنسبة 20% (من 70% الى 50% )عن القديم, ومع زيادة مساحة سطح الاطار أحساسك بالطريق هيزيد, بس فى مقابل ده هتاخد ثبات أعلى وقدرة أكبر على المناورة على السرعات العالية وتحسن فى قدرتك على الفرملة علشان مساحة الاطار الزايدة. وفعلا زى ماقلت أحساسك بالطريق هيزيد, بس أنا معرفش حد مركب كاوتش أكبر وأشتكى من الموضوع ده أو ضايقه. ومن رأيى لو مشاوير حضرتك جوه البلد وعلى سرعات قليلة خليك فى ال 13 علشان أحسن على السرعات الأبطأ فى المناورة من ال15 وكمان مريح فى القيادة والطريق لأن حجم الجنط الجديد وكاوتشه هيتقل الدركسيون سنة وهيزود أحساسك بالطريق زى ماقلنا, أنما ال15 قلنا مميزاته
__________________
التعديل الأخير تم بواسطة hazem_khidr ; 28-10-2010 الساعة 12:13 AM |
#5
|
||||
|
||||
رد: شويه اسئله علي عفشه الكريستاله
انتا كده فعلا حتخليني افكر في المونرو
عالعموم التوكيلين مش بعيد توكيل kyb في شارع رمسيس ومونرو في التوفيقيه اروح اسأل بكره ان شاء الله وربنا يكرم وجزاك الله خيرا علي المعلومات القيمه دي وربنا يكرمك ياباشا
__________________
my mitsubishi love 4 ever |
|
|