عايز أشترى سيارة عائلية 7 راكب

[Walid Samy]

أرجوا النصيحة والإفادة

عايز أشترى سيارة عائلية 7 راكب مستعملة أو جديدة المهم على قد الميزانية ، لأنى والحمد لله على رزقه ونعمته عندى أربع بنات أطفال أكبرهم 9 سنوات ، وطبعا فى أى مشوار أو سفر بيجمعنا ما بينفعش معاهم العربية العادية (5 راكب) لأن بيبقى معانا زوجتى وأمى ، وبافكر فى كذا إختيار فى حدود 90- 100 ألف وموتور مايزيدش عن 1600 سى سى علشان الضريبة والترخيص ، وبعد البحث والفحص والتدقيق وجدت (من وجهة نظرى) أن إختيارات ال 7 راكب فى مصر تقريبا هما دول:

1. بيجو 307 sw مستعملة موديل 2007 و 2008 ، صناعة فرنسى ، رانج السعر من 75ألف وحتى 90 ألف حسب الحالة ، العربية تعتبر مثالية كإختيار أول لأنها أكثر من رائعة يعنى كماليات ورفاهية عالية جدا وتقفيل بخامات ممتازة وثبات وأمان ممتاز ولكن الكلام كتير يخوفك من إنها متقدمة تكنولوجيا وبالتالى أعطالها قاتلة لأنها مرتبطة بالكمبيوتر ، والصيانة وقطع الغيار مصاريفها مرتفعة ، وسعر إعادة البيع متدنى نظرا لعدم وجود طلب كبير على البيجو فى السوق (ودى مش مشكلة كبيرة لأنى هاشتريها مستعملة مش جديدة وبالتالى مفيش فرق كبير فى سعر إعادة البيع) والكنبة الأخيرة (كرسى 6 و 7) صغيرة ومتنفعش غير الأطفال فقط (ودى بالنسبة ليا مش مشكلة لأن عندى أطفال صغيرين).
2. كيا كارينز ، ودى الإختيار الثانى بعد البيجو بل وتنافس البيجو ، عربية ممتازة وواسعة وكبيرة وتوكيلها سمعته كويسة وصيانتها معقولة طبعا أرخص وأسهل من البيجو وممكن يركب لها كنبة فى الخلف وتبقى 7 راكب ، بس طبعا فى فرق كبير فى الإمكانيات والكماليات وخامات التقفيل والسلامة والأمان والثبات بينها وبين البيجو (دى فئة والبيجو فئة أعلى).
3. تويوتا أفانزا ، تجميع مش يابانى أعتقد ماليزى أو إندونيسى ، طبعا هى تويوتا لكنها للأسف عربية فقيرة جدا فى تجهيزاتها وخاماتها وتقفيلها وحجمها صغير وتحس إنها عربية من موديلات أوائل التسعينات وخسارة فيها الفلوس.
4. دايهاتسو جراند تيريوس ، عربية 4x4 ، مش يابانى برضه ماليزى ، موتور 1500 سى سى ضعيف على حجم العربية ، تجهيزاتها ضعيفة ، فيها مشكلة كبيرة جدا فى الثبات بسبب ارتفاعها ، غالية الثمن ، لاتصلح كسيارة عائلية لقلة الثبات والأمان ، فى رأيى الشخصى مش مريحة نفسيا.
5. رينو لوجان mcv م ، هى أساسا داتشيا مش رينو وراكب فيها موتور 1600 سى سى رينو قديم من التسعينات ، كبيرة وواسعة بس فى الحقيقة متشجعكش على الإطلاق وما تحسش إن دى عربية رينو أصلا.
6. سيتروين جراند بيكاسو ، عربية الأحلام ، أقل ما توصف به أنها تحفة حقيقية متجسدة فى صورة سيارة ، بها تجهيزات وكماليات ورفاهية مبهرة وغير طبيعية ومش موجودة فى أى حاجة تانية من اللى قولناهم بل هى فئة مستقلة بذاتها ، أنا شخصيا هاتجنن عليها بس للأسف بإعمال العقل وجدتها غير مناسبة لأنه للأسف عيوبها وما كنتش أتمنى (ألاقيلها عيوب) هى:

• الموديل الأرخص سعره زيرو 200 ألف (ووالله مش كتير عليها) مانيوال (وده عيب قاتل بالنسبة لى) , ديزل مش بنزين (طبعا هى موفرة جدا فى استهلاك الوقود بس معرفش حاجة عن مواتير الديزل وهل هى أحسن ولا أوحش من البنزين) ، بس بجد لو جربت تقعد بس جواها مش هتبقى عايز تنزل منها.
• الموديل الأعلى سعره 320 ألف ، أوتوماتيك ، بنزين ، طبعا سيارة الأحلام
• غير منتشرة إطلاقا غير بعدد محدود جدا ، وطبعا مشاكل التوكيل والصيانة وسعر إعادة البيع

تقريبا دى خلاصة اللى وصلتله بعد بحث لفترة طويلة وفى حدود ميزانية محدودة غير قابلة للزيادة ، أرجو المشاركة والتواصل عسى أن نجد سويا الحل المناسب.

[side view]

مبدئيا نستبعد الافانزا والجراند تيريوس بسبب عدم الثبات وتقفيلهم من جوه سيء جدا ( مثلا اكره الباب الداخليه بتتخلع وتتكسر بسهوله ) بالرغم من جوده الموتور فى كل عربيه

الرينو اللوجان MCV مش منشره بالرغم من سعرها المميز

الكارينز عربيه لطيفه وناس كتيره بتشكر فيها لكن الموتور 1600 ضعيف عليها وبالتالى سحب العربيه ضعيف شويه وثبات العربيه معقول فهى تعتبر كويسه كعربيه للمدينه وللاستخدام المعقول

البيجو 307 عربيه رائعه لا غبار عليها لكن قطع الغيار والصيانه غاليه جدا طبعا لكن احسن بكتيير من الافانزا والتيريوس

السيتروين بيكاسو او الجراند بيكاسو زى البيجو او افضل بس عيب السيتروين القاتل
فى الصيانه وقطع الغيار وعدم الانتشار وبالتالى كمان 5 او 10 سنين مش هتعرف تبيعها خالص
لكن السيتروين ممتعه جدا فى السواقه والثبات على الطريق

لو انت عايز عربيه اساسيه للبيت ومش هتفكر تغيرها او تبيعها تبقى السيتروين او البيجو
لو انت عايز عربيه لمرحله معينه او لفتره معينه تبقى الكارينز وبعدين ان شاء الله تجيب حاجه اعلى

ربنا يوفقك

[@واحد من الناس@]

أختلف إختلاف جزئى مع حضرتك لأن أنا ركبت وعملت تجربة قيادة لكل من الإفانزا 2008 الجراند تيريوس 2009 الكيا الكارينز 2010 وكلهم كانوا أوتوماتك

الإفانزا عيبها الوحيد ضيقة من الداخل من ناحية العرض والطول وتجميعها وسحبها جيد او جيد جدا

الجراند تريوس هى الأخت الكبرى للإفانزا لأن الإفانزا بتنزل برة مصر بإسم دايهاتسو زينون عيبها الضيق من الداخل من ناحية الطول فقط تجميع وسحب جيد جدا

الكارينز أفضلهم على الإطلاق فى نقطة الوسع ولكن ذلك فى موديل ال5 راكب فقط بس موديل ال7 راكب اضيق بكتير فى الطول فقط تجميع وسحب برضة جيد جدا بس عربية ورق بمعنى الكلمة

لو هتخل الماتركس الفئة دى تبقى أفضلهم على الإطلاق فى السوق من ناحية الطول فقط و أفضلهم فى السحب والتجميع ممتازة خصوصا إنى جربتها مانيول وأتوماتيك وكانت 2008 و2006 على الترتيب

كل اللى فات يتميز بإنتشاره وسهولة وجود قطع غيار له وإعادة بيع _بعكس الفرنسى (ثقافة شعب)_

[moneer_marco]

الى كل اعضاء المنتدى الجمال
ارجو المساعدة فأنا ايضا عايز عربية عائلية 7 راكب 1600 سي سي ومحتار السعر لا يتعدى 100 الف جنيها

[MmFFoR]

للزميل منير ماركو

انصحك بالافانزا ( زيرو ب 120 الف فل اوبشن )