يا ناس نفسى أخلص من الخصله الغبيه اللى بعملها دى !!

[واحد شاى]

السلام عليكم
انا يا جماعه للاسف دايما وانا سايق بتصرف تصرف غبى و هوا انى ساعات اكون ماشى فى امان الله والاقى واحد حمار زنق عليا بمنتهى الاستهتار للاسف بلاقى نفسى بتصرف بمنتهى البساطه انى بلف الدركسيون واحدف الناحيه التانيه من غير ما ابص فى المرايا بس الحمد لله كل مره ربنا بيسترها و مش بيكون فى حد جاى من ورايا و مش بزنق على حد
لكن بجد ببقى متضايق اوى لانى عارف ان حركه زى دى غبيه و ممكن تودى فى داهيه و ممكن لو على طريق سريع تتسبب فى كارثه او لقدر الله موته لكن مش عارف ليه بحس ان ده اسرع و اسهل رد فعل اقدر اعمله فى الموقف ده يعنى انا لما العربيه مثل تزنق عليا بحس انى مش هلحق ابص فى المريا قبل ما اكسر الناحيه التانيه و برده بحس ان سرعه رد الفعل لو فضلت فى حارتى لمست فرامل مش هتدى الادء المطلوب و بحس ان اسرع واسهل رد فعل انى اكسر الدركسيون و اتفاداه
مع انى لو لبست فيه هيبقى هوا اللى غلطان اما لو انا اللى كسرت فساعتها لو حصل حاجه بسببى هبقى انا اللى غلطان
ملحوظه : انا لسه أول سنه ليا سوقه
بجد عارف انه تصرف غبى وعارف انه مممكن يتسبب فى كوارس وعارف ان كل مره ربنا بيسترها معايا و مش بيكون فى عربيات جايه من الناحيه التانيه لانه عارف انى مش بتاع مشاكل و خناقات و يمكن ده السبب اللى بيخلينى احاول اتفادى اللى كسر عليا بألى طريق منعا لحجوث مشاكل وان كان التصرف اللى بتصرفه ممكن يدخلنى فى مشكله تانيه
ياريت يا جماعه لو حد عنده نصايح ليا عشان ابطل التصرف ده يقولى

[mody777]

السلام عليكم

انا كنت بالبداية زيك كدة

بس عايز افهمك حاجة لو اقتنعت بيها هتروح منك العادة دية

انت مثلا ماشي في امان الله وواحد زنق عليك

لو كان رد فعلك انك دوست فرامل ولاقدر الله خبطتة ساعتها انت هتبقي في السليم وهينزل يعتزلك كمان لانة هو الغلطان

لكن لو عملت زي رد فعلك الي بتعملة هتبقي غلطان والدنيا كلها هتغلطك وهتحط نفسك في مشاكل انت في غني عنها

انت لو اقتنعت بكدة هتروح منك العادة دية عن تجربة

السلام عليكم

[حسام البورسعيدى]

شوف يا برنس ..


حاول تعود نفسك انك تدوس فرامل وفى نفس الوقت تبص فى المراياوبعدين تكسر ..

طبعا كل ده فى ثانية ...

ومتنساش ان انت فى مصر يعنى لازم تسمعنا البيييييييييييييييييييييي يييييييييب الحلوة بتاعتك والا منظرك هيضيع فى الشارع ...

وانت اكيد بتسوق على مهلك اوى علشان كده الناس بتكسر عليك .. لو مش عارف تسرع امشى على اليمين دايما لان الشمال لازم يكون اسرع من اليمين ..

وباذن الله مع التعود هتبقى حاجة هايفة ...

تحياتى يا غالى ..

[حازم شاهين]

معلش أنا هقول كلام نظرى شوية
أى عادة ممكن التخلص منها بالتركيز و الصبر و المثابرة

لو ركزت إنك تغير طريقة رد فعلك فى المواقف إللى زى دى
بعد فترة و كذا محاولة هتقدر تغير سلوكك إن شاء الله

[عبدالله منصور]

اوعى تحدف احسن الى جاى من ورا يطيرك لاقدر الله

انت بس ابقى هدى شوية سرعتك بإستعمال الفرامل لحد ما اخينا دا يعديك وبعدها كمل عادى

او بص فى المراية بسرعة لو محدش جى اكسر زى مانت عاوز