كل ما تريد معرفته عن نظام مساعد ثبات السيارة الخاص بشركة هوندا (Vehicle Stability Assist “VSA”)

[Horsepower]

السلام عليكم ورحمة الله وبركاته

حصريا لمنتدى (مصر موتورز – MasrMotors )

كل ما تريد معرفته عن نظام مساعد ثبات السيارة الخاص بشركة هوندا (Vehicle Stability Assist “VSA”)

مقدمة:

منذ عام 1997 و شركة هوندا تبحث رفع فعاليات الأمان بالسيارات ,,,

وكانت الأولى باليابان التي قدمت نظام فرامل مانعة للإنغلاق(ABS) على الأربع عجلاك,,,

والأولى في العالم التي نجحت بتطوير نظام مراقبة الجر(Traction Control System) لنظام الجر الأمامي للسيارات.

نظام مساعد ثبات السيارة Vehicle Stability Assist “VSA” الذي تقدمه شركة هوندا يضيف التحكم في الإنزلاق الجانبي (Side Slip Control) إلي نظام الفرامل المانعة للإنغلاق (ABS) و نظام مراقبة الجر(Traction Control System) .

هذا النظام الجديد يتحكم في التغير المفاجيء في سلوك المركبة, مما يتيح للسائق الوقت للإبقاء على السيطرة والتحكم بالوضع.

لهدف عدم إفساد متعة القيادة تم وضع نظام فريد من نوعه مبني على مفهوم "نظام مساعد ثبات السيارة من خلال التحكم بالعجلات الأمامية".

هذا النظام متوافر في موديلات سيفيك 2009 – 2010 المستوى VTi الأول والثاني (غير متوافر في مستوى LXi)

هذا النظام بيكون شغال بمجرد تشغيل السيارة ويمكن إغلاقه بالضغط على زرار مكتوب عليه VSA بالتابلوه يسار الطارة لمدة 3 ثواني ... و يمكن إعادة تشغيله بالضغط على نفس الزرار مرة أخرى لمدة 3 ثوان.

أولا نحب نعرف إن سبب الإنزلاق الجانبي للسيارة بيكون إن القوة المؤثرة على السيارة في المنعطفات بتكون أكبر من أداء الإطارات لإبقاء السيارة في المسار المطلوب ,,, الإنزلاق الجانبي للسيارة نوعين:

النوع الأول هو إنزلاق مؤخرة السيارة للخارج عند المنحنيات وهو الغالب على سيارات الجر الخلفي ويسمى Oversteer.

سيارات الجر الخلفي بيكون العجل الخلفي فيها هو مصدر الحركة والعجل الأمامي للتوجيه فقط و بكدة بتكون المسافة بين محور العجل الأمامي ومحور العجل الخلفي (إللي بيسموها قاعدة العجلات Wheelbase) هي السبب في العزم إللي بيحدف ظهر العربية للخارج مع الملفات (العزم = قوة * مسافة) ... كده مفهوم سبب وجود عزم داخلي في الجر الخلفي إن قوة دفع السيارة من مكان و محور إرتكاز ودوران السيارة في مكان تاني.

النوع الثاني هو إنزلاق مقدمة السيارة للخارج عند المنحنيات وهو الغالب على سيارات الجر الأمامي ويسمى Understeer.

سيارات الجر الأمامي بيكون العجل الامامي هو مصدر الحركة وهو نفسه لتوجيه السيارة وبالتالي إللي بيحصل إن العجل الأمامي بيفقد إلتصاقه بالأرض مع التسارع وكدة الفكرة واضحة إن عند الملفات لما يكون مصدر الحركة والدفع هو هو مصدر التوجيه يبقى لو حصل والعجل الأمامي فقد جزء من أدائه في الإلتصاق بالأرض يبقى فقد جزء من قدرته على التسارع وفقد جزء من قدرته على التوجيه وده عند الملفات.

إزاي نظام مساعد ثبات السيارة VSA بيسيطر على كلا النوعين من الإنزلاق للسيارة:

1- التحكم في حالة إنزلاق مؤخرة السيارة عند المفات (Oversteer):

بيقوم نظام ال VSA بفرملة العجلة الأمامية الخارجية للسيارة وبالتالي بيخلق عزم مساوي في القيمة ومعاكس في الإتجاه للعزم إللي عايز يحدف ظهر السيارة للخارج,,,

بيتحسب إزاي؟ .... عن طريق حساب معدل الإنحراف الحقيقي للسيارة ومقارنته بمعدل الإنحراف إللي عايزه السائق من خلال حساب زاوية المقود (الطارة) وسرعة السيارة ومقارنتها بزاوية الإنحراف الحقيقية للسيارة, لو قد بعض يبقى مافيش تدخل, أما لو الإنحراف الحقيقي للسيارة أكبر من إللي عايزه السائق بيتدخل ال VSA زي ما شرحنا سابقا و زي ما واضح في الصورة و الرسم التوضيحي:

2- التحكم في حالة إنزلاق مقدمة السيارة عند المفات (Understeer):

بيقوم نظام ال VSA بفرملة العجلة الأمامية الداخلية علشان يخلق عزم إضافي بيساوي في القيمة و الإتجاه العزم المفقود أثناء الدخول في المنعطف نتيجة فقدان العجل الأمامي جزء من قدرته على الإلتصاق بالأرض.

بيتحسب بنفس طريقة حساب ال Oversteer وبيزيد عليه إن تدخل ال VSA بيكون مش بس بفرملة العجلة الأمامية الداخلية ده كمان بيقلل من القدرة الخارجة من المحرك على العجل الأمامي ... ليه؟ ... لأن لو العجل الأمامي فقد أدائة بالإلتصاق بالأرض بنسبة كبير يبقى الحل بفرملة العجلة الأمامية الداخلية لوحده ولا هايبقى ليه معنى ولا تأثير لأنها أساسا مش لاصقة بالأرض, زي ما واضح في الصورة والرسم التوضيحي:

Engine Torque Reduction + Inner Front Wheel Braking = Understeer Control When Cornering Under Power

3- التحكم في إنزلاق العجل أثناء التسارع:

إزاي نظام مساعد ثبات السيارة VSA بيسيطر على السيارة في حالة التسارع على أرض غير متجانسة في معامل الإحتكاك بينها وبين العجلات الأربعة للسيارة (مثلا تسارع على أرض عليها بقعة زيت أو رمل أو مياة ...إلخ):

لما بيحصل تسارع على أرض وبيكون أحد نصفي السيارة واقع على أرض عليها زيت أو رمل أو مياه أو أي حاجة تكون بتقلل قوة الإحتكاك بين العجل والأسفلت مقارنة بالجانب الآخر إللي واقف على الأسفلت بيحصل إن العجل إللي واقع على الناحية إللي معامل إحتكاكها صغير بيدور وبيفقد إلتصاقه بالأرض وهنا بيقوم نظام ال VSA بتقليل العزم الخارج من الموتور على العجلات الواقعة على الناحية الزلقة وفرملة العجل على الناحية دي لو لزم الأمر علشان يرجع لمستوى عزم ودوران عجل دون فقد في إلتصاق العجل بالأرض وبكدة العربية ما تعومش.

4- التحكم في الفرامل أثناء الإنعطاف:

إزاي نظام مساعد ثبات السيارة VSA بيساعد السيارة على الوقوف في مسافة أقل عند الفرامل على منعطفات؟

لما تكون السيارة داخلة منعطف بسرعة كبيرة وعايز تقف بسرعة بيتم تشغيل نظام الفرامل المانعة للإنغلاق ABS بس في الحالة دي بيتم تشغيل نظام القنوات الأربع (نظام القنوات الثلاث للفرامل المانعة للإنغلاق بيتم في حالة الفرامل على مسار مستقيم أو منعطفات بسرعة صغيرة) بيتم فرملة العجلة الخلفية الخارجية بقوة أكبر لإيقاف السيارة في مسافة أقل كما هو واضح بالصورة:

رسومات فنية توضيحية لمكونات النظام و أساسيات التشغيل

أرجو أن يكون الموضوع مفيد,

تحياتي,
أحمد سامي

[haythamkmal]

موضوع مميز كالعاده ، بس هيعمل ايه فى الصحراء دى

[Horsepower]

المشاركة الأصلية كتبت بواسطة haythamkmal موضوع مميز كالعاده ، بس هيعمل ايه فى الصحراء دى

ههههههههههههه
إن شاء الله بكرة تعمروتبقى خضراء
وبعدين يا باشا ما إنت عارف إن الناس هي إللي بتعمرالمكان مش العكس,,,
أنا متعشم خير إن شاء الله إن القسم هنا هايكون البريمو في المنتدى,,,

[ahmed_menaiem]

موضوع جميل و الله و شكرااااااااااااااا

تسلملنا ايدك يا ابو حميد موضوع جميل وفعلا الثبات ده اهم حاجه في العربية خصوصا في ارض زي ارضنا لنا الله يا مصر