ربنا ستر ومتعجنتش.

[Injection]

زى ما عنوان الموضوع بيقول, أكيد كلنا وأحنا ماشيين فى الشارع بتقابلنا مواقف حياة أو موت وربنا بيسترها, وغالبا بتحصل مرة أو أكثر فى الأسبوع, والموضوع ده مش عن الحوادث ده عن أشباه الحوادث, فأيه أخطر حاجتين تلاتة حصلولك وأنت ماشى وطلعت منها على شعرة؟

أنا لسه طالع من الشارع من حوالى نص ساعة, وكنت هتظبط أنا والعربية ظبط و ولا على البال وده اللى حمسنى أكتب الموضوع.

ماشى فى شارع فى مدينة نصر من الشوارع الورانية ومافيش عربيات, والشارع طبعا حارة واحدة والعربيات راكنة على الجنبين, والساعة 7 صباحا, وأنا ماشى بتدلع مزودتش عن 40 , وكان فيه قدام تقاطع وصندوق زبالة قبل التقاطع كعادة كل الشوارع المصرية وكان فى عربية قبل التقاطع مجنحة لبره شوية فحدفت شمال سنة بسيطة علشان أفاديها, وصندوق الزبالة قدام بمتر على شمالى, كل ده عادى جدا, اللى مش عادى بقى أن كان فيه مطب مخفى خفية سودة, وأنا بحدف شمال ومش شايفه, طبعا العربية طارت بسبب المطب وده كان كفيل بأنه يخلى العربية تحدف شمال زيادة و صندوق الزبالة يدخل يقعد جمبى فى العربية, وللى مش متصور الموقف, عارفين كلنا صناديق الزبالة الحديد, وأيديها اللى طالعة لبره, أهى أيد منهم كانت هتدخل فى الزجاج الأمامى من الناحية الشمال ثم على وشى ثم على القوايم, وربنا ستر وعرفت أبعد العربية سنة يمين كانت كفيلة بأنى أشوف أيد الصندوق وهى بتحاول تسلم عليا, بس أنا مرديتش السلام.
الدروس المستفادة: متمشيش فى مدينة نصر الساعة 7 الصبح على سرعة هادية.

المهم, أيه أخطر حاجة عدت عليك وخرجت منها بسلام؟

الصورة دى عجبتنى أوى فقلت أحطها, ومتنسوش تجاوبوا على السوأل.

[tareksakr]

حمدالله علي سلامتك

[احمد بدر1978]

حمدلله على سلامتك

[xabi]

حمد لله على السلامه وقدر ولطف

[crypt76]

أولاً ألف حمد لله على سلامتك

ثانياً، الدروس المستفادة:
1- عينك في وسط راسك عند القيادة في دهاليز المهروسة على مدار الساعة (أو كما يقول الفرنجة 24/7)
2- صناديق الزبالة وضعت بهذه الصورة وصممت بتلك الأذرع الطويلة ليس لتحمل منها بل لتصطاد كل عابث تسول له نفسه أن يسير بجوارها (يا عابث يا شرير!)
3- حاول قدر المستطاع توقع الأسوء دائماً في دهاليز القاهرة، فمن الطبيعي جداً أن تسقط عليك قنبلة عنقودية أو رشة نابالم ظريفة أو على أقل تقدير لغم أرضي مضاد للطائرات (متسألنيش إزاي)
4- اقرأ دعاء الركوب عند الركوب وانطق الشهادتين وتوكل على الله.