محتار اشتري ايه....ساعدوني

[engineer.a-h]

السلام عليكم...
يا جماعه انا محتار وعايز حد يساعدني انا عايز اشتري عربيه في الحدود ما بين ال 90 وال 120 الف جنيه ومحتار لاني مايل للعربيات العاليه زي التريوس والتيجو وفي نفس الوقت عجباني السيراتو والجين 2 والانترا بس انا مش عارف في عربيات كتير في السعر ده وعايز حد يقولي ديه كويسه او متجربه يعني انا عجبني جدا التيجو مميزات وكل حاجه بس مشكلها لصيانه وقطع الغيار والعفشه مقلقاني....
ياريت حد يساعدني انا عايز عربيه فول اوبشن اوتماتيك ومش لازم جيب بس المهم تكون متجربه يعني انا بسوق بسرعه عاليه يهمني تكون فيها امان وتكون ثابته و1600 سي سي وهل استهلاك البنزين في التيجو 2000 سي سي عالي يا ريت حد يساعدني ....وشكرا .....ساعدووووووووني. what

[ramy hassan]

لو ليك ف العربيات العالية:
التيجو أوالتيريوس أو الرينو دوستر
لو عربية عادية:
الالنترا أو الكارينز أو االسيراتو

المعادلة بالنسبالك صعبة شوية....
عربية عالية واوتوماتيك يبقى التيريوس 1500 سى سى (مش فول ابشن)
عربية عالية و مانيوال يبقى التيجو 1600 سى سى (فول ابشن مافيش اوتوماتيك الا ف ال2000 سى سى)
التيجو 2000 سى سى طبعا بتاكل بنزين اكتر من 1600 و ال1500 سى سى
الرينو داستر لسة ماحدش جربها بس مافيش منها اوتوماتيك

انا عن نفسى معايا التيجو 1600 بقالها 4 شهور وعامل بيها 5000 كم
العربية بجد و بامانة عاجبانى جدا جدا والعفشة بتاعتها فعلا خشنة بس دة مقابل الثبات العالى ع الطريق السريع (واللة بدون مبالغة مشيت على 160 وكان ممكن اكتر والعربية ماشاء اللة ثابتة والملفات على 140 كم\س وزى الفل لابتعوم ولا حاجة)
عيبها الوحيد انها تأفيل مصرى...لكن الجودة (التبلوة والفرش الداخلى الكراسى والابواب والصالون) و الاداء (موتور و فتيس وسحب وتكييف وفرامل) بالنسبة للسعر فهو ممتاز والتكيف تلاجة بس طبعا بيؤثر على السحب.

وأسأل واتخير اللة اولا قبل الشراء

[Eng . Mano]

انصحك طبعا بالتريوس ، لانك استحالة تضحى بمبلغ زى فى عربية ماحدش جابها و ما شاكرش فيها من ناحية التقفيل و استهلاك الوقود و العفشة ، و فى نفس الوقت يكون قدامك عربية يابانى 100%100 ، و واسعة و عالية و قوية ، اعتقد ان الاختيار فى صالح التيريوس .
و ياريت برده تفكر فى الكروز ، منصور شيفرولية منزل عليها عروض تسويقية جامدة جدا بمناسبة شهر رمضان ، المانيوال ب 105 الف جنيه ، و الاتوماتيك تقريبا ب 114 الف جنيه ؛

[Horsepower]

السلام عليكم,
حضرتك بتقارن بين عربيات فئات مختلفة 4*4 مع سيدان ,,, مش منطقي
شخصيا أنا مش مقتنع بالتيريوس لأنها 4*4 شكلا فقط ,,, أداء ليس له أي علاقة بالدفع الرباعي لا قوة موتور ولا عزم,,,
و نصيحة إبعد عن السيراتو لأن عفشتها ناشفة لدرجة هاتكرهك في السواقة ,,, ده غير إن ثباتها ضعيف,,,

أنا لو مكانك ومعايا 120 ألف لعربية سيدان ,,,
أول عربية هافكر فيها إمبريزا ,,, بس هاتبقى مانيوال و ب 125 ألف ,,, بس عربية,,,
ثاني عربية هوندا سيتي ,,, ممتازة في كل حاجة وتوكيل محترم (عن تجربة شخصية) ,,, بس مش بتاعت غرز على سرعات عالية (أكتر من 140 كم/س غرز لأ),,,
ثالث عربية فيات لينيا ,,, بس عيبها (أوماترا) توكيل يكرهك في العربية و شركة فيات كلها ,,, ده غير إنها مانيوال,,,
رابع عربية سيات إبيزا ,,, ممتازة و فيها كل إللي بتدور عليه ,,, بس عيبها الوحيد المشكلة إللي بدأت تظهر في فتيس ال DSG بس لم تظهر فيها ظهرت في الباسات و الجولف ,,, ويقال إن تم إحتوائها خلاص ولم يعد هناك مشاكل,,,
خامس عربية كروز ,,, فيها كل إللي إنت عايزه وأوتوماتيك ,,, بس توكيل برضه مش قد كدة,,, وإعتمادية أقل من السيارات الأربعة إللي قبلها.

ربنا يوفق للخير إن شاء الله.