افيدونى ياعباقرة السيارات ارجوكم

[ياسين11]

السلام عليكم ورحمة الله وبركاته انا اشتريت عربية 128 فيات موديل 1974 بس بجد تحفة ولكن النهاردة العربية وقفت محلك سر تقريبا البطارية نامت اقدر اعمل ايه"؟ واحل المشكلة ديه ازاى

[Injection]

شوف هل العيب من البطارية فعلا ولا لأ, شوف الأجهزة الكهربية شغالة ولا لأ, لو أشتغلت العيب مش من البطارية, وهل لما بتدور صوت المارش بيظهر, لو ظهر ده مش عيب بطارية.

ولو العيب عيب بطارية جرب تدورها بازق وشوف هتشتغل ولا لأ, لو أشتغلت سيبها تشحن البطارية شوية, وأطفى ودور تانى, أشتغلت يبقى الحمد لله البطارية كانت عايزة تتشحن, ماشتغلتش يبقى عوضك على الله فى البطارية.

ولو العيب من البطارية هتوديها لواحد بتاع بطاريات يشوف فيها أيه, هيحاول يشحنها ويزودها مياه, لو مشتغلتش يبقى هتجيب بطارية جديدة.
ولو حاجة تانية حصلت غير اللى فوق قول, يعنى لو أدت صوت مارش عند التدوير أو الكاسيت أشتغل.
وألف مبروك على العربية الجديدة.

[مهند سالم]

بص يا سيدي لو بتفتح الكونتاكت ما بتلاقيش أي رد فعل يبقى سلك البطارية مهرب، يعني العربية وقفت منك مرة واحدة مثلا والسلك مملح فعمل عازل حاول تحرك السلك وتنظف الملوحة إلا فيه وتركبه تاني.
أما لو لمبة البطارية نورت معاك وبتجيب معاك بوادر تدوير لكن الماتور مش قادر يقوم يبقى ممكن تكون البطارية فعلا نايمة، بس ده لازم يكون بعد ركنة طويلة يعني، عموما لو عملت كدة يبقى خلي حد يزوقك وعشق التاني وافتح الكونتاكت وطبعا دوس برجلك دبرياش، ولما العربية تاخد سرعة كويسة سيب رجليك من الدبرياج وزود بنزين، لو دارت يبقى الحمد لله وسيبها تشحن، بس برده الأفضل تروح للكهربائي عشان يكشف عليها ويغير ليها المية.
لو العربية حضرتك ما ركنتهاش فترة تستدعي إن البطارية تنام، يبقى حضرتك عندك مشكلة يا إما في الدينامو يا إما في المارش.
لو المشكلة في الدينامو يبقى البطارية هتنام معاك كثير، حتى لو ركنت العربية فترة مش طويلة.
لو المشكلة في المارش هتلاقي صوته مش طبيعي وفي زنة كدة، وفي الحالتين حضرتك برده تذهب للكهربائي يكشف عليهم. وابق طمنا.
وألف مبروك، وربنا يبارك ليك فيها