أرجو الرد بسرعة - عيب في الفتيس الأوتوماتيك للانسر 1300/98

[magicsoka]

السلام عليكم و رحمة الله و بركاته

دي أول مشاركة لي في المنتدى الجميل ده، انا تصفحت المواضيع و فعلا في حاجات كتيييييييير قوي استفدت منها مكنتش أعرفها قبل كدة عن العربية اللانسر.

المهم أنا عندي مشكلة كبيرة قوي أرجو الرد عليها بسرعة من أهل العلم اللي على دراية بحلول و أسباب مشكلة زي دي.

أنا عندي لانسر كريستالة 1300 كاملة أوتوماتيك مو98 العربية انا لسة شاريها من أسبوع و ماشية معايا زي الفل و مفيش أي مشاكل، لغاية امبارح. روحت من الشغل عادي و كله تمام و ركنت العربية في الجراج زي كل يوم، ساعتين كدة و نزلت أروح مشوار، دورت العربية و اديتلها مارشيدير و جيت امشي بيها ، بالظبط كدة رجعت لورا 30سم بالظبط، و حلفت ما تمشي تاني خالص، اديها اي غيار مش عايزة تتحرك من مكانها، صوت الموتور بقى رفيع شوية مش زي الأول، المهم جيبت ميكانيكي و كشفنا على كل حاجة من زيت فتيس للفلتر لكل حاجة، حتى اني غيرت فلتر زيت الفتيس، بس برضه مفيش فايدة، العربية دايرة عادي و زي الفل و بتاخد الغيار بتاعها عادي برضه ، بس مهما تديها بنزين و تدوس مش عايزة تتحرك، و بعدين لقينا حاجة غريبة كمان، لما تدور مفتاح الكونتاكت بس من غير ما تشغل الموتور ، يعني على وضع ان البطارية بس هي اللي شغالة بس الموتور لا، لما تديها غيار في الوضع ده تسمع زنة غريبة بتقعد بالظبط 3 ثواني و تفصل، الكلام ده مع اي غيار مش المارشيدير بس، تدي الزنة دي و تفصل.

أرجوكم أفيديوني يا أهل العلم، العربية لسة شاريها من اسبوع و مركونة تحت البيت زي الميت.

[احمد بدر1978]

الاحتمال الاكبر ان الفتيس يكون اتحرق

[Sky_Bird]

انأكد من زيت الفتيس الاول لانه احتمال انه ناقص فميديش القوة الهيدروليكيه للفتيس

[magicsoka]

شكرا يا شباب على ردودكم، انا حليت المشكة و الحمد لله، الموضوع طلع في قربة الفتيس، الميكانيكي قال لي ان عمرها الإفتراضي انتهى و اتخرمت او حاجه زي كده، المهم جبت غيرها و غيرتها و دلوقتي العربية ماشية زي الفل و الحمد لله، بس انا جيبت القربة دي بـ500جنيه فهل ده سعر كويس و لا انا اتضحك علي؟