سؤال برىء

[luckyman]

لية احنا فى مصر الدوله الوحيدة اللى فى العالم اللى بنحب نروح نحو الاشياء المبهمة ونجرب فى نفسنا ونحول سوقنا الى حقل تجارب
يمكن فى الصين نفسها مش تلاقى كمية الناس اللى مستعدة تجرب عربيات زى عندنا بدم قلبها وتستحمل عيوب منتج وتخلية يكبر ويتطور ونفضل ندور على اعذار فعلا الانسان المصرى غريب وعجيب جدا ومش بيتعلم
لية هنا فى مصر نعمل من النماذج الفاشله فى العالم كله اساطير لا تموت
خلاص بفى طلعنا من مرحله السوق المنغلق كان ممكن نعذر الجيل القديم اللى اتربى على المكعبات والمربعات وانتاج محدود على اصابع اليد والواحدة وكانت هناك دوافع ممكن يتقبلها الانسان ومعظمها نفسى
لكن دلوقتى لازم نجتاز المرحله دى ومنقبلش الا بكل ما هو جيد الصنع
مثلا عندنا عربية ممتازة جدا وانا شايف دى المفروض اللى تكون عربية لها شعبية كبيرة فى مصر وتمتاز بجميع خصائص هذا الصانع العظيم زى تويوتا الياريس ومازال سعرها فى متناول الكثير لو فعلا انتم بتتكلموا على اليابانى واللى فاتة الميرى يتمرمغ فى ترابة والناس بتداف وتبرر شراء موديلات عفا عليها الزمن والدهر وقل ما شئت باسعار تعتبر باهظة كما فى سؤال ومداخله احد الاعضاء المنتدى اليوم حول البعض الذى يقتنى مرسيدس صنعت قبل الثلاثين سنة مضت وبسعر ليس بالهين ووجدت ان الكثير له دوافعة مع ان ممكن ان يكون هذا صحيح فى حالات نادرة جدا
على فكرة والله المستهلك المصرى بجانب ظلم الحكومة والتوكيل والمصنع والموزع الا انة يلعب دور كبير وهو اللى وصل نفسة للمرحله المتاخرة دى وبعدين بيشتكى كانة ضحية
الواضح انها ثقافة متهالكة لا اساس لها من الصحة مع كثير من المفاهيم الخاطئة التى تسيطر على المواطن الذى هو اساس عملاية الشراء والبيع والطلب
لية الناس نسبة كبيرة منها مصممة انها تكون حقل تجارب خصوصا ان الناس هنا عارفة مش قيمة 75 الف جنية مثلا
لا دول عارفين قيمة القرش ومبلغ مثل هذا ليس بالهين
لية الناس اصبحت متقبله ان يوجد عيب بسيارتها الجديدة مسبقا وتسند الوكيل اللى مش يحترم حد ويسلم سيارات بربع تشطيب ان جاز التعبير
وعجبى

[tobgy]

علشان ببساظة يا بشمهندس احنا ناس بنحب المنظرة (و ده رايي الشخصى)
ان انا متأكد مثلا ان اى واحد بيجيب الصينى بيجيبها عشان الشكل و الكماليات
طب انت يا حج تعرف حاجة عن العربية؟ .... لاع
طب تعرف حاجة عن الموتور اللى متركب غلط؟ ... برضيك لاع
طب تعرف حد جابها و جربها و لاقها كويسة؟ ...... لاع
امال جايب العربية على اساس اييييييييييييييييييييه؟
يقولك انا حجيبها و اجربها
اصلها فيها اوبشنز و سعرها حنين
طب دانت كدة المفروض تشك فيها مش تشتريها!!!!!!!!!!!!!!!
اى عربية شكلها جديد و فيها اوبشنز و بتمشى حتلاقيها شغالة زى الفل عند المصريين و بنعملها قيمة
حتى الدولة نفسها و التوكيلات زى ابو الفتوح مثلا هرشوا التيتا
هاتلهم يا عم عربية شكلها معقول و فيها اوبشنز
طب و العربية نفسها اسمها ايه عالميا؟
لالالا اصل المصريين مبيدقوش على الحاجات دى
من الاخر هى المنظرة و جزء حب استطلاع بس بيطول شوية
اصل حب الاستطلاع عندنا يعنى نشترى و نجرب
و اسف على الاطالة

[AbOnOrA]

طبعا كلام استاذ طوبجى ينطبق فعلا على فئه من الناس اللى بتشترى صينى مش على الكل
لان اغلب الناس بتدقق كويس فى العربيه اللى هتدفع فيها فلوس مش قليلة لكن الاولويات بتختلف من واحد للتانى
فمثلا واحد اولوياته الشكل والمظهر ومش هيستهلك العربيه بشكل كبير وبيشترى عربيه من توكيل كبير وقديم ومعروف يبقى ليه لاء بيشتريها وبتؤدى الغرض وبيبقى اختياره صح

ممكن اقول امثلة كتير بس علشان مطولش عليكم

نيجى بقى للسؤال البرىء اللى هو اساس الموضوع واللى بفترض ان الناس قاعدة مستنيه العربيات الصنى علشان تجربها فى نفسها ومش عاجبهم التويوتا ياريس اللى اسعارها بتبداء من 90 الف وبتعدى ال100 الف للمواتير 1300 وبتوصل لحوالى 120 الف للموديل اللى بموتور 1500

اولاً المنتجات الصينينه مش معمولة للتجارب فى الشعب المصرى تحديداً المنتجات الصينية بتسوق فى الصين نفسها اللى بقت اكبر سوق مستهلك فى العالم زيها زى امريكا ده اولاً وثانياً فيه اسواق كتير متعطشه لسيارات اقتصاديه زى اسيا عموما وافريقيا وروسيا ومن دول مصر

ليه الدول ديه متعطشه لسيارات اقتصادية ديه الاجابه النموزجيه بتاعتها يطول شرحها وان كانت واضحة ولا تحتاج لتفسير

ليه الجودة مش هى الاولويه علشان زى ما قولت كل واحد اولوياته بتختلف وغالباً ما بتكون السعر والاوبشن باك هى الاولوية الاولى بالاضافة للشكل

طب هل الصينى بس هو اللى مغامرة وتجربه محفوفه بالمخاطر والصعاب اطلاقاً ده كلام مش صحيح اى عربيه جديدة فى السوق ممكن تكون مخاطرة حتى لو هى عربيه جيدة لان لسه مشاكلها مش معروفه ومدى التزام التوكيل بحل مشاكلها وتوفير قطع الغيار باسعار معقولة وباقى مفردات التكلفة الاجمالية للتشغيل والملكية مش واضحة
ده غير طبعا العوامل الاقتصادية الاخرى زى سعر اعادة البيع ومدى اقبال الناس عليها

وعندك امثلة كتيرة زى الرينو ميجان مثلا اللى اقبل الناس على شرائها اول ما نزلت باسعار تصل ل 150 الف وبعدين باعوها من اثر المشاكل والاعطال الكتير وتكاليف الصيانة والاصلاح الباهظه بتلت سعرها واهى شركة كبيره وعريقة
اللوجان الرومانى نفس الكلام تقريبا وكل اللى اشتراها اتدبس فى سعرها وبيخسر جامد فى اعادة البيع
وبعدين هو فيه ايه من العربيات مفيهاش عيوب صناعة حضرتك مقريتش عن مشاكل المرسيدس والبى ام اللى بتتجمع فى مصر ؟ وطبعاً مشاكل الكورى اللى بيتجمع فى مصر ومشاكل التويوتا الكرولا اللى بتتجمع فى جنوب افريقيا

مفيش عربيه جديدة مفيهاش مشاكل بس هى الفكره حجم المشاكل قد ايه مقارنه بسعرها وكماليتها

ده كله بالاضافة الى ان الصورة مش بالسوء اللى حضرتك متخيلة فيه عربيات كتير اسيويه سواء صينى او ماليزى او هندى او ايرانى اقتصاديه جداً ومميزة بكماليات تفوق الشريحة السعريه اللى بتتباع بيها ومشاكلها مش كارثيه ولا حاجة ومستوى الجودة والتقفيل والخامات لا يختلف كثيرا عن مستوى العربيات الكورى المجمعة محلياً واللى اسعارها اعلى منها

واخيراً مش فاهم ايه علاقة التويوتا ياريس بالموضوع وايه علاقتها بال 75 الف كمان ؟؟