حكـــــــــــــــــــــــ ـــــــــــاية شـــــــــــــــــــــهيد

[of_hon]

بسم الله الرحمن الرحيم

أنا قررت اكتب الموضوع ده في المنتدي ده عشان انا بحس ان المنتدي بيتي (اه والله )
وقررت اكتب الموضوع ده عشان اعرف الناس شرطة يعني ايه واعرفكم احنا بنتعب أد أيه عشانكم ( احنا دي عشان انا ضابط شغال في الأمن المركزي برتبة ملازم يعني متخرج السنه اللي فاتت).

واكتر حاجة استفزتني عشان اكتب الموضوع ده ان قريت هنا في المنتدي في موضوع تاني واحد قال لاتبيع لضابط ولا تشتري من ضابط ولا ليك علاقة بضابط قام واحد رد عليه وقاله لأ لازم تعرف ضابط عشان يجيبلك الرخص لما تتسحب ويسلكلك أمورك دا علي أساس أن الضباط دول يهود يعني ؟؟؟؟؟؟؟؟؟؟؟؟؟؟؟؟؟؟؟؟؟؟؟؟

القاعده العامة في الموضوع كل قاعدة وليها شواذ يعني زي ما فيه ضابط كويس فيه ضابط وحش وزي ما فيه دكتور بيعالج واحد وينقذ حياته برده فيه الدكتور اللي بيعمل عمليات اجهاض لبائعات الهوي ( والله حلوة بائعات الهوي دي ) و فيه الدكتور اللي كل همه الفلوس وفيه المهندس اللي بيغش أصل الحياة كدا خير وشر .

فأنا قولت احكيلكم شوية عن الشرطة وشهداء الشرطة عشان تحسوا بدورنا
واظن دلوقتي قدرة الشرطة واضحة لكل الناس مفيش ولا فسفوسة حشيش ولا قرص برشام ولا الهوا ( الموجود كله خلطة حنة يا بيه أه والله ).



بما ان الواجهة الحقيقة للشرطة في اي دولة في العالم هي الدوريات الأمنية و الاعمال المرورية إذا فقائدي المركبات المختلفة هم الأكثر احتكاكا بالشرطة ( حلوة قوي قائدي المركبات ) .

أنا هكمل بالعامية عشان اعبر احسن .....

يعني سيادتك من خلال تعاملك مع الإدارة العامة للمرور في مصر فانت تقدر تكون فكرة عن طبيعة الشرطة في مصر ( وضحت كدا ).

وعشان احنا في مصر ما ينفعش تطبق المعيار دا علينا (لييييييييييييييه بس ما انت كنت ماشي كويس ) أقول انا لسيادتك ليه .....
1- أسوء فئات المجتمع السواقين بلا أدني شك ( وكل قاعدة وليه استثناء طبعا )

2- الحالة العامة للمجتمع المصري و الحاجات الغريبة اللي بنشوفها وانحطاط الأخلاق والفهلوة والفكاكة ( والأخيرة دي من أيام الفراعنة ) يعني كل عيوب الشعب المصري بتظهر في الشارع يعني تقدر تقول الواحد وهو نازل الشارع بينزل وهو مشغل كل الأبوشنات الغلط اللي فيه .

3- العصبية والتوتر عشان الحالة المادية الزفت للغالبية.

4- الاحساس الدائم ان مفيش قانون والفهلوة دائما هي الحل الأمثل

5- الاحساس بان يعني ايه حتة ضابط قد عيالي ولا في سني أو أمين فلاح ولا عسكري ملوش لازمة يوقفني ويتنطط عليا .

6- الحالة المادية الصعبة لأفراد الشرطة بسبب المرتبات بتخليهم يمشوها تسليك ( الأفراد حاجة و الضباط حاجة تانية خالص فرد يعني أمين أو درجة أولي ودي فيها رتب كتير زي صف ضابط وصول ومندوب وحاجات تانية كتير ودرجة تانية ودول المجندين )*

7- ودي حاجة محدش واخد باله منها العجز في عدد الضباط وما يترتب عليه من زيادة ساعات العمل للضابط ( أنا مثلا العادي بتاعي في اليوم 16 ساعة ويومين في الاسبوع مقفلين ببات فيهم في القطاع ) بس دي مش مشكلة من أيام الكلية واحنا متعودين علي المجهود العالي وساعات نوم قليلة يعني مش مشكلة قوي بس يؤخذ بيها برده وتوضع في الاعتبار .


كفاية كدا ............


نحكي أول حكاية وهي لاتنين شهدا ( كما رواها في محاضرة لنا في كلية الشرطة السيد اللواء صلاح الدين الشربيني مدير الإدارة العامة للعمليات الخاصة )
شهداء العملية : الشهيد لواء / محمود عادل
الشهيد عقيد / عمرو عبد المنعم
المكان: جبل الحلال - سيناء
التوقيت : صيف 2007
المأمورية : تكليف قطاع العمليات الخاصة بالتعامل مع بؤرتين ارهابيتين واقعتين في جبل الحلال مؤكد تورطهم في تفجيرات شرم الشيخ .
المعلومات المتاحة : ( المعلومات دي بيجبها ضباط البحث الجنائي وأمن الدولة ) أعداد الأرهابيين غير محددة و تفوق 15 فرد قاموا بتلغيم الجبل ولديهم كميات كبيرة من السلاح الألي والقنابل اليدوية والذخيرة ( شوفت الارهاب وصل لأيه قنابل والغام يعني ملغمين جبل كامل انتوا متخيلين الكلام ده ولا احنا بنأذن في مالطا ).

العملية : تم اعداد خطة التعامل بناء علي المعلومات السابقة وبناء علي مشاهدات مجموعة الاستطلاع التي ذهبت لموقع العملية قبل التنفيذ تقريبا باسبوع وكانت أهداف الخطة كالأتي :
1- تمشيط منطقة جبل الحلال بالكامل من الألغام
2- مطاردة الارهابين الموجودين في الجبل.
وتم تنفيذ الخطة كما رسمت حيث استمرت عملية تمشط الجبل 3 أيام كانت عملية التمشيط تتم صباحا و السكون ليلا في القول الأمني ( القول ده لفظ بنقولة علي أي مجموعة منظمة بشكل معين سواء كانت أشخاص أو فصائل أو مدرعات )
وبالفعل وأثناء عملية التمشيط وكما هو متوقع تم واكتشاف البؤرتين وتم التعامل معهم وتصفيتهم بنجاح تام .
رأت قيادات العملية الأستمرار في الجبل لفترة زمنية أخري أستكمالا لعملية تمشبط الجبل والبحث عن أي مشتبه فيهم وبالفعل تم الاستمرار وأثناء سير القول الأمني في المدقات الجبلية انفجر لغم في المدرعة المتقدمة من جهة اليمين لم يسفر عن اصابات .
وفي مثل هذه الحالات يتم اخلاء القوات من المدرعات ونزولها علي هيئة دفاع دائري وأثناء هذه العملية واثناء التتميم علي القوات انفجر لغم أخر أسفر عن استشهاد الشهيد لواء محمود عادل والشهيد عقيد عمرو عبد المنعم .
وتصادف أن يو م استشهاد الشهيد لواء محمود عادل هو يوم عيد ميلاد ابنته الوحيدة و قد كانت الأسرة في انتظار عودته ولكن بدلا من أن يدخل علي أسرته حاملا هدية لأبنته دخل بدل منه خبر استشهاده حاملا نبأ دخوله الجنة .

ملحوظة >>>>>>>>>> في معلومات لم تذكر وكذلك أحداث أخري كذلك حفاظا علي السرية ( بس أنا عارفها )

اللـــــــــــــهم ارزقـــــــــــــــــــــ ني الشــــــــــــــــــــــ ـــــــــــــــــهادة

وياريت أي حد عنده أي سؤال عن الشرطة بصفة عامة أو أي استفسار أنا في الخدمة أصل أنا عندي اليومين دول اجازة هههههههه

ونستـكمل حلقات الشهادة - ان شاء الله - تباعـــــــــــــــــــــ ــــــــــــــا

[Moh.Osama]

ربنا يحميكوا وينصركوا وتنضفوا البلد من االى فيه وتقضوا على الظباط الفاسدين يا رب

[tarek elbadry]

روح اللة يباركلك انتة وامثالك
ويرحم شهدائنا ويسكنهم فسيح جنتة

[sh_masry]

مع احترامى ليك انت ملازم فى الأمن المركزى و دول معظمهم محترمين او بيبانوا محترمين علشان مالهومش علاقه مباشره مع المواطن و علاقتهم فقط مع المواطن فى التجمعات و المظاهرات و يدى الأوامر بالضرب بالخرزانه او بالقنابل المسيله للدموع و محدثات الصوت ...... انما لو رحت امن عام او مباحث او نجده هاتشوف الأفترا على المواطنين بجميع طبقاتهم و مؤهلاتهم من اصغر عسكرى لأكبر رتبه ...... و ياريت قبل الدفاع عن جهاز الشرطه الموقر تلبس لبس ملكى و تحاول تدخل قسم على اساس انك مواطن عادى او تروح تعمل تجديد ترخيص سياره او اى حاجه من مصالح المواطن العادى و شوف هايتعمل فيك ايه و قرر انت بنفسك اذا كنت هاتحب البلد على الوضع ده و لا لأ ...... و فى انتظار ردك بعد التجربه .
بالنسبه لشهداء الوطن دول على دماغتا من فوق و نكن لهم خالص التحيه و الأحترام (ان كانت الشهاده خالصه للوطن ) انما الفساد و الذل و الهوان لا نكن له الا الكره و القرف و الدعاء الى الله ان يخلصنا منهم و لا نملك ايضا الا قول حسبنا الله و نعم الوكيل فى كل ظالم مفترى جبار ذو سلطه يدوس على اعناق البشر الحره ليجعلهم عباد اذلاء .
و ربنا يباركلك فى صحتك و اهلك و مالك و وظيفتك ان كنت من الناس التى تخاف الله و لا تقلب الحق باطل و الباطل حق و ياريت ماتتغيرش من داخلك بمرور الوقت لأنك واضح انك محترم و من اصل محترم .

[of_hon]

المشاركة الأصلية كتبت بواسطة sh_masry مع احترامى ليك انت ملازم فى الأمن المركزى و دول معظمهم محترمين او بيبانوا محترمين علشان مالهومش علاقه مباشره مع المواطن و علاقتهم فقط مع المواطن فى التجمعات و المظاهرات و يدى الأوامر بالضرب بالخرزانه او بالقنابل المسيله للدموع و محدثات الصوت ...... انما لو رحت امن عام او مباحث او نجده هاتشوف الأفترا على المواطنين بجميع طبقاتهم و مؤهلاتهم من اصغر عسكرى لأكبر رتبه ...... و ياريت قبل الدفاع عن جهاز الشرطه الموقر تلبس لبس ملكى و تحاول تدخل قسم على اساس انك مواطن عادى او تروح تعمل تجديد ترخيص سياره او اى حاجه من مصالح المواطن العادى و شوف هايتعمل فيك ايه و قرر انت بنفسك اذا كنت هاتحب البلد على الوضع ده و لا لأ ...... و فى انتظار ردك بعد التجربه . بالنسبه لشهداء الوطن دول على دماغتا من فوق و نكن لهم خالص التحيه و الأحترام (ان كانت الشهاده خالصه للوطن ) انما الفساد و الذل و الهوان لا نكن له الا الكره و القرف و الدعاء الى الله ان يخلصنا منهم و لا نملك ايضا الا قول حسبنا الله و نعم الوكيل فى كل ظالم مفترى جبار ذو سلطه يدوس على اعناق البشر الحره ليجعلهم عباد اذلاء . و ربنا يباركلك فى صحتك و اهلك و مالك و وظيفتك ان كنت من الناس التى تخاف الله و لا تقلب الحق باطل و الباطل حق و ياريت ماتتغيرش من داخلك بمرور الوقت لأنك واضح انك محترم و من اصل محترم .

ياباشا شكرا علي كلامك الجميل في حقي مش عارف أقولك أيه

أنا هعلق علي نقطتين

أول حاجة حضرتك قولت ان الامن المركزي اختصاصه او شغله الاساسي المظاهرات والحاجات دي ودي فكرة غلط جدااااااااااااااا عند الناس كلها وحابب اصححها
الامن المركزي في مصر ليه أدوار كتير جدا وكلها تبع حاجة في الأمن اسمها عمليات الشرطة أيه هي عمليات الشرطة هي العمليات التي يخول للشرطة فيها استخدام القوة بهدف فرض النظام العام في ظل سيادة القانون
وعمليات الشرطة دي نفسها 3 حاجات اول حاجة عمليات أمنية ودي فيها حملات تفتشية ومطاردة عصابات وفض شغب وحاجات تانية كتير ودي صميم عمل الأمن المركزي وعمليات تأمنية تأمين منشأت وشخصيات وتالت حاجة عمليات تأمين الاحتفالات العامة والمباريات الرياضية
أظن كدا حضرتك فهمت شغل الأمن المركزي ووصلك ان احنا بنتعامل مع عتاة الأجرام والعصابات يعني من الأخر كده الحرامي أبو مطواة دا بتاع المباحث والحرامي أبو ألي ده بتاعنا .
ياريت المعلومة تكون وصلت لحضرتك .

تاني حاجة حضرت بتقول ( انما لو رحت امن عام او مباحث او نجده هاتشوف الأفترا على المواطنين بجميع طبقاتهم و مؤهلاتهم من اصغر عسكرى لأكبر رتبه )

أنا مبنكرش أن فيه سوء معاملة من قبل بعض السادة الضباط للجمهور بس حضرتك روح لأي ضابط وكلمه بهدوء وبخفة دم لو اتنرفز عليك ولو حتي عاملك بطريقة غيها جفاء يبقي لك حق عندي
أمال المشكلة فين الأفراد أنا والله ما برميهم بالباطل بس عن تعامل الأمين الفلاح ( مش قصدي شتيمة أناأساسا من كفر الشيخ ) مفكر خلاص بقي وزير الداخلية عايز يقلب عيشه يقوم يرمي بلاه علي الناس ولي معاهم مواقف كتييييييييييييييييير هاحكيهلكم بس بعدين
وعلي فكرة حضرتك برده أنا اشتغلت ايام الكلية في الأمن العام وفي اسوء اقسام مصر وعارف الوضع والنظام كويس وليا اصحابي اللي شغالين في الامن العام يعني انا مش بعيد عن الوضع وبقول لحضرتك وبصراحة كده ومن الأخر الضابط ( مش الأمين ولا العسكري ولا أي حد تاني ) بيعامل اللي قدامه علي حسب شخصيته وانطباعه اللي انا اخدته عنه يعني مثلا انا قاعد في القسم وجالي واحد لقيته لابس كويس طريقته مهذبة وبيكلمني باحترام عمري ماهعملو وحش انما لوجالي واحد شكل مسجل ودخلي تلاتات في تلاتات وبيرمي بلاه وأي كلامي أكيد لازم أبقي شديد معاة ( والشدة أنواع ) غير لما يحيلي واحد محسسني أنه أهم واحد في مصر وعاملي برم وعمال يصيع عليا وييسألني السؤال الشهير انت متعرفش أنا مين ؟؟؟؟ ( علي فكرة في المواقف دي برد وأقوله أنت اللي شكلك عبيط وماتعرفش أنا مين وأبن مين )أكيد لازم واحد زي ده لازم اعرفه هو مين بجد .

وأخيرا عشان مطولش عليك ( بس أنا حاسس إن أنا طولت ) عمري ما لبست الزي العسكري بتاعي غير وانا رايح الشغل ( أو وأنا جاي شئ منطقي هههههه) .