السايس (وظيفة من لا وظيفة له)

انا من كتر خنقتي منهم وهما عاملين زي الابراص تلقيها تطلعلك من اي حته علشان انا بحب اطلع من الشغل عندي ادخل سيتي ستارز او سيتي سنتر فتلاقيني خلاص بقيت ادمان بالنسبالهم علشان كدا نويت اني اعمل موضوع ليهم مخصوص تقدير لمجهودهم الرائع في اخد الشارع لحسابهم وتحت حماية رجال المرور واحلي حاجه لو ظابط المرور شاف الواحد مننا راكن جنب الرصيف بس مش محضن اوي يديله مخالفة وقوف صف تاني لكن السايس لو عايز يوقف 50 صف يوقف وتلاقي ظابط المرور عمال بيشرب معاه شاي والامور عادي جدا ويله بينا نبتدي

اولا: نتكلم عن السايس بشكل عام
السايس مش موظف زي موظفين الحكومه وشغلتهم بتعتمد على البلطجه بشكل كبير لعدة اسباب من ضمنها المنطقه والناس الي عايزه تركن والحاجات دي كلها

بالنسبه للمنطقه: كل واحد بيشتغل الشغلانه دي بيحجز المكان الي بيسايس فيه ومفيش حد تاني يقدر يقربله ويسايس فيه ، يعني لو واحد واقف في نقطه معينه محدش يقدر يقرب من السبوت بتاعته دي ويشتغل فيها والا ليلته هتبقى سودا لأن ساعتها هيجيب كل عيلته ويضربوه ويعملو فيه الي ما يعمل.

بالنسبه للناس الي عايزه تركن: معظم الناس لما بتشوف السايس الي واقف بتحس بشعورين يا اما بيخافو منه من عدد المطاوي الي واخدها في وشه (نظرا للمواقف الدفاعيه الكتير الي اخدها في دفاعه عن المنطقه بتاعته) يا اما بتشفق عليه لو كان راجل عجوز مش قادر يقف يسند طوله
وفي الحالتين في شواذ بيخرجو عن القاعده دي وبيقفلو شباك العربيه علشان ميدوش للراجل حاجه ، وفي منهم الي بيجري اول ما يدخل في بحر الطريق.




اماكن انتشار السايس

لو انت ماشي في اي شارع حيوي لازم هتلاقي هناك سايس او اكتر على حسب التنظيم الي معمول بينهم وبين بعض.وبرضه لو انت معدي على اي مول وخصوصا السراج او جنينه مول لازم هتشوفهم حتى لو رحت الساعه 12 باليل علشان تدخل حفلة الـMid Night.
بس الغريب في الموضوع التنظيم الي بيعملوه بينهم يعني لو انت ماشي في شارع طوله 100 متر هتلاقي في الشارع ده فيه اكتر من واحد (علشان محدش يعرف يدور العربيه من سكات ويهرب من الابيج). وتلاقي كل كذا متر في سايس شكل واقف هناك وكلهم هيقربو منك ويقولولك ركنه يا بيه ، ركنه يا أبله (طبعا يا هتحلقله يا هتشاور بأيدك شكرا بس ساعتها من كتر ما انت بتشاور الناس هتفتكرك اهبل وعمال تشوح بأيديك في العربيه) على سبيل المثال الشارع الي قدام سيتي ستارز هتلاقي هناك اكتر من سايس والاغرب من تقسم المناطق هوه انهم معلمين المناطق والاحداثيات بالسور المقابل للرصيف (علشان محدش يركن في منطقة السيطره بتاعت جاره ، زي الاراضي كده).





طبيعة عمل السايس وانواعهم:




نيجي الاول لطبيعة عمل السايس
السايس بصفه عامه شخص بلطجي عايز ياكل لقمته بعرق جبينه ، زي الشحاتين بالظبط اما بياكلو لقمتهم بعرق جبينهم. وبيعتمد اعتماد كلي على طبيعة الشعب المصري الطبيبه الي مش عايز يكسفه او مش عايز يتضرب (اعتمادا على شكله). الواحد من دول اول ما يشوفك رايح للعربيه يجري وارك علشان يطلعك مع ان الشارع مع ان الطريق فاضي وسهل جدا انك تطلع لوحدك واول ما يلاقيك قربت من بحر الطريق يروح ناقل نفسه برشاقه للباب الي جنب السواق علشان ياخد الي فيه القسمه.

انواع السايس:
واحد يخليك تركن ويطلعك بمهاره (متمكن من شغلته)
النوع ده انت فعلا لازم تديله الابيج بتاعه لأنه ممكن يضحي بنفسه وتلاقيه واقف في نص الشارع وارك علشان يخليك تطلع في امان ولو انت عايز تركن هتلاقيه في اماكن ظاهره ممكن تديله بس نور وتلاقيه بيظبطك في المكان الي المفروض انك تركن فيه (علشان متبوظلوش النظام بتاع الركنه بتاعه).

واحد تنك يسيبك تركن لوحدك وتطلع لوحدك واول ما تطلع تلاقيه واقف جنب باب السواقالنوع ده من النوع التنك الي يسيبك تركن لوحدك وتطلع لوحدك واول ما تطلع تلاقيه جنبك زي قرد قطع قال يعني هوه كان بيشاورلك وانت البعيد اعمى مشفتوش ولازم ياخد اجرته ، علشان تتفادى النوع ده من السايسين اقفل الشباك الي جنبك (واقفل الباب طبعا) واحلقله زي ما حلقلك ثم هوه هياخد فلوس على ايه؟ ارضيه مثلا؟ دي ارض الحكومه.

واحد بيضللك
النوع ده اخطر انواع السايس لأنه ممكن يلبسك في عربيه جايه في الطريق وغالبا هتعرف النوع ده انه هيبقى قاعد على العربيه الي راكنه جنبك وبيقولك تعالى لو الموقف ده حصل معاك قبل كده اكيد هتاخد بالك انه مبيقولش غير تعالى تعالى (بوووووم الي جاي في الطريق لبس فيك) بسبب السايس الغشيم الي كان بيقولك تعالى. طبعا ده المفروض انه ياخد قلمين على كام شلوت على كام ضربه على قفاه بدال الفلوس.

الفرق بين سايس الجراج وسايس الشارع
في فروق كتير جدا بين السايس الي شغال في الجراجات والسايس الي شغال في الشارع
اولا: سايس الجراج راجل شيك شغلته الي مكتوبه في البطاقه سايس جراج انما سايس الشارع استحاله تلاقي مكتوب في البطاقه بتاعته سايس شارع او سايس بس
ثانيا: سايس الجراج بياخد مرتب ثابت بالاضافه للعمولات او التبس الي الناس بتدفعه ، اما سايس الشارع فا بياخد مرتبه بالاكراه من الناس الي عايزه تركن (ساعات بيحددو قيمه معينه للركن في الشارع وبيجيبو ورق مطبوع معرفش بيجيبوه منين)
ثالثا: سايس الجراج استحاله يتخانق مع زميله علشان وقف في المنطقه بتاعته بالعكس ده هيفرح لأن واحد هيشيل عنه شويه من الشغل الي عليه ، طبعا العكس مع سايس الشارع لو حد قرب من المنطقه بتاعته هيعمل معاه زي سليمان الحلبي وده اقل واجب علشان قرب من منطقة نفوذه.

نصائح عامه للتعامل مع سايس الشارع
1- لو عايز تركن ولقيت واحد وقفك وطلعك في الحاله دي من الادب انك تديله حاجه كلنا عارفين ان حتى مع عدم وجود الشخص ده كنت هتعرف تركن وتطلع بس الراجل تعب ووقف وساعدك ولازم تديه الي فيه القسمه ولو نص جنيه. انما لو واحد تنك معملكش حاجه اديله في سنانه واقفل شباكك وامشي واحلقله ، ولا هوه ساعت الفلوس يجي جري من غير ما يعمل حاجه.
2- قبل ما تركن حاول تبص على شكل السايس الي معاك ممكن يكون شكله شضلي ويقولك هات كمان جنيه (بعد ما تكتشف ان مش شكله بس هوه الي مرعب) لو شكله شضلي حاول انك تمشي كمان 10 متر ولا حاجه اكيد هتلاقي منطقة نفوذ واحد تاني شكله اريح نفسيا.
3- لازم تفرق بين سايس الجراج وسايس الشارع لأن سايس الجراج مش المفروض انه يدلك تركن فين ولا المفروض انه يقف ورا عربيتك ويشوفلك الشارع ، سايس الشارع من مهامه الاساسيه انه يدخلك الركنه ويطلعك منها زي ما دخلك فيهاوالا يبقى مقصر وميستاهلش الفلوس الي عايز ياخدها.


وبقوا خلي بالكم يا جماعه ونصيحة محدش يدي عربيته لحد يركنهاله بدل ما يرجع يلاقي وشها بدل قفاها ومش هتعرف ساعتها تطلع من السايس جنيه

[MEMOO_1ST]

فعلا موضوع جميل.
وفعلا انا بتخنق منهم و90% منهم نصابين ولا بياخد بالهم من العربية ولا حاجة وبيبقى بس مهتم انو ياخد الفلوس وأهم حاجة متحاسبوش غير لما ترجع هيقعد يقولك هغير النبطشية وهقفل ولا تسأل فية قولو لما ارجع.
وتقبل تحياتي.

كلامك مظبوط يا ميمو وديه طبعا من ضمن النصايح

[miam0502788391]

شكرا ويا ريت رجال المرور يشدوا حيلهم معانا فى اقتلاع هذه الفئة من الشوارع

[Bendary]

تسلم ايدك ياأبو حميد ياقرصان على الموضوع الشيق
فعلا معاك حق
اللى واقفين ادام سيتى ستارز دول اخر بلطجه ، يتحايل عليك عشان تركن وبعدين يقول الركنه ب 5 ج
ليه عشان ايه ؟؟؟؟؟؟ دانا ادخل جراج المول واريح دماغى
بس انت لو بتروح الحته دى كتير - انصحك تركن امام مسجد القوات المسلحه - فى هناك سياس بردو بس مش طماعين .