سكودا فيليشيا و بعض اسعار قطع الغيار

[meezus]

الاول انا كنت باشتكى من زيت بينزل من تحت العربية و ابتدى يزيد الموضوع جامد
فروحت لميكانيكى جنب البيت متعود عليه من زمان قالى يا باشا الطبة مفوتة و زيت الموتور و كلام من ده ماشى يا عم ايه الحل خراط و ظبط و 50 جنية فى 50 تانية مصنعية و كلو تمام
رجعت ركنت العربية فى الجراج و حطيت كرتونة تحتها و تانى يوم لسة فى زيت
روحتلة تانى فتح الكابوت و بص على الموتور قالى العربية ناشفة و مفيش حاجة قمت مطلعله الكرتونة بزيتها قام قايلى كدة حنفك و جوان كرتيرة و كلام كتير كدة ماشى سبتهاله رجعت ها ايه الكلام الواد الصنايعى ابن ال..... كان ناسى يربط معرفش ايه قلتله من الاخر يعنى مفيش زيت حايجى تانى قالى عيب يا باشا بس ممكن حاجة خفيفة كدة كل شهر من الفتيس و ده شغلانة كبيرة و مش حتاثر على حاجة و مش حافك الفتيس عشان مايبوظش رجعت و كرتونة و لسة الزيت بينزل!!
دخلت على المنتدى لقيت كاتبين على ميكانيكى كويس فى شارع النصر روحتلة قالى ده مش زيت موتور ده زيت فتيس فكه وشويت جلب ورجع الفتيس تمام و الغيار مبقاش سايب زى الاول و الزيت اختفى يس قلت الراجل ده تمام اخليه يكمل على العربية بقى قلتله على المضايقنى فيها طلع جربها قالى العربية مفيهاش عفشة ولا سكاترا مع انى كنت جايب سكاترا تركى جديدة من سنة بس فعلا علبة الدريكسيون كانت تخبط و ترزع كمان و المساعدين قدام ضاربين و ال حامل الكاليبر بايش و تيل الفرامل بيصوت و العربية كاننت تعوم و ترج جامد عند ال 90 وبصراحة انا كنت مكبر و كنت ناوى ابيع بس حصلت ظروف و قلت حاخليها معايا سنة ولا اتنين كمان
فقلت من الاخلر اظبط كل حاجة و فعلا ظبطلى كله و سلملى العربية تمام(و خد منى 130 مصنعية على كل حاجة)بس فرقت جامد جدا الدريكسيون ناعم و بيلف بسهولة الترزيع راح من العربية العفشة حاجة تانية و كانت فعلا قرفانى بس الحمدلله دلوقتى تمام و ده شوية اسعار لحاجات جبتها والى يحتاج حاجة يقوللى

اسكاترا استعمال خارج 320
2 كوبلن المانى 350
2 كوبلن تشيكى اصلى 400 ( خدتهم للميكانيكى فالى شكلهم صينى و محطوطين فى علب رجعنى بيهم و جبتله الالمانى)
2 رومان بلى عجل امامى اصلى 140
2 حامل كليبر صينى(ملقتش اصلى) 150
تيل فرامل ايطالى 70
2 بطحة كاوتش 35
2 مساعدين المانى امامى 410
ايل فتيس و جلب 35
1 رمان بلى عجل خلفى يابانى 45
وش فانوس ضباب زجاج مصرى 10
2 وش فانوس خلفى 20
2 فانوس اشارة تايوانى 45
2 مساحة مطر ايطالى 50
4 عجلات ميتشلان 1200
4 بلف عجل و ترصيص 40
ضبط زوايا 20
باب استعمال فاضى صاج بس جبته ب 200 ده كان من 6 شهور
علامة سكودا امامى 35
علامة خلفى 25 بس تعبانة
فاضل حاجة واحدة بس الكاربرتير فيه العيب المنتشر بتاع تعليق الباب التانى و ده عيوبه انو يخلى العربية متدورش الصبح غير من ثالت ولا رابع مرة و لازم تفضل مثبت رجلك على البنزين و ساعات لما تشد على العربية و تجيب ال rpm على 3500 تقوم معلقة معاك و كانها دايسة بنزين لوحدها قالى حضرتك دلوقتى فى مسمار حديد حد اكيد كسره و هو ده المفروض الى بيظبط الباب ف كدة الباب حيفضل يفتح و يقفل بمزاجة و قالى صعب جدا تلاقيه و انا مش حاقلك جيب كربيراتير عشان حاجة زى ده ف ظبطلى الشوك و نضف الكربراتير وغير فيلتر الهوا و فعلا بتدور احسن و لغاية دلوقتى معلقتش معايا تانى
و كنت سالت هنا فى المنتدى وواحد من الاعضاء مشكور قالى على واحد اسمه خميس كاريتير عند الاستاد حروحله على الاسبوع الجاى عشان برضه اطمن اكتر
حاجة كمان و هى الصوت العالى الخشن شوية ده قلتله عليه قالى ده عشان انت حاطط شكمان المصرى جيب الاصلى و مش حيبقى فى صوت خالص دورت عليه( اخوان مزروعة..هوم موتورز.. عاطف..علاء) و لحد دلوقتى مش لاقى اصلى.. انا من اسكندرية فلو حد يعرف يريت يقولى
اخر حاجة و انا عنده شفت نفس المودبل 97 و مركبلها اكصدام امامى وخلفى ب لون العربية سالت صاحب العربية قالى دول تايوانى و سعره الاثنين 375 من صلاح الدين و رشتهم عند السمكرى
اخر حاجة بجد المرة دى فاضل اركب 2 زجاج كهربا امامى و انذار و كاسيت و سماعات ياريت اى حد عنده معلومات اسعار اى حاجة عن الفيلشيا مشكلة و حلها او عايزلها حل يخش و لو اعرف حساعده انا او اى حد من المنتدى ان شاء الله

[mostafabassam]

شكرا يا فندم بس انا عندى لحضرتك سؤال مدام شكلك خبير فى الفليشيا

انا معروش علي فليشيا موديل 95 تكييف و سنتر و فبركية جوة ومعظم الخارج وعامله 170 الف كيلو و مطلوب فيها 29الف جنية
السعر دة غالى و لا معقول
لك جزيل الشكر

[meezus]

المشاركة الأصلية كتبت بواسطة mostafabassam شكرا يا فندم بس انا عندى لحضرتك سؤال مدام شكلك خبير فى الفليشيا انا معروش علي فليشيا موديل 95 تكييف و سنتر و فبركية جوة ومعظم الخارج وعامله 170 الف كيلو و مطلوب فيها 29الف جنية السعر دة غالى و لا معقول لك جزيل الشكر

تخلص على 27 او 28 لو حالة كويسة اوى ...عدد ال كيلومترات مش قليل ... و اكشف عليها كويس و ياريت ترفعها فبنزينة كمان
و عيوب العربية عشان تبقى عارفها من الاول
1-الدركسيون تقيل حبتين (مفيش حاجة اسمها هاف بور)
2-العفشة برضه ناشفة شوية
3-خد بالك من العيب الشهير بتاعها السخونة الزايدة العيب ده مش عند كل الناس محصلش معايا خالص الحمد لله بس اعرف واحد بايع عربيته موديل 2000 ب 28000 بعد ما بهدلته
4--صوت الموتور عالى
5-التسارع تعبان على الاول و التانى يعنى الطلعة بتاعتها بطيقة شوية
طيب المشاكل ديه ليها حلول ايونن
1-تركب علبة الدركسيون الاصلية -كوتش حالته كويسة و منفوخ على 29 (طبعا ده بيحسن الموضوع لكن هى برضه مش باور)
2-غيرتها و لسة ناشفة بصراحة بس خد بالك ان حالة الكاوتش بتفرق كتييير
3-موضوع السخونة و ده اهم حاجة اسال صاحب العربية جايز عنده اماتة (جايز يعنى)
شوف لو عامل تعديل على دورة التبريد مركب قميص زززعامل زرار يشغل و يطفى المروحة و بص على مؤشر الحرارة و انت بتجرب برضه و اساله غيرت وش السيليندر كام مرة ptmnlo123per128
4-على الكاسيت
5-تقل رجلك على البنزين حبتين

[meezus]

المميزات
1-الثبات 120 متحسش بحاجة و تمام.... 140 رعب و عرق و حاجات من ده بس لسه مجربتش بعد العفشة و الكاوتش الجديد
2-الصاج الناشف عربية فعلن صاجها تقيل و بيستحمل جامد
3-حلوة فى السفر مريحة و التسارع بيتحسن من بعد الغيار التالت
4-عالية عن الارض يعنى انسى المطبات
5-تعتبر واسعة و تشيل 5
6-شكلها مقبول
7-الميكانيكية حافظينها
8-قطع الغيار رخيصة و منتشرة من الصينى للالمانى
9-احسن من التاكسى برضه
استخير ربنا و شوف مرتاحلها ولا لا و شوف برضه و اتفرج على عربيات تانية و حتلاقى ب 29 و 30 حلات انضف و كيلوهات اقل و و موديلات اعلى(تقربا من بعد 98 انجكشن مش كاربريتير ) بس فى النهاية اهم حاجة حالة العربية لا كيلو ولا موديل هو الى حيفرق ربنا يوفقك ان شاء الله

[رياح التغيير]

جزاك الله خير استاذ ميزززوز