وداعا اليابان , كوريا , ماليزيا , و الصين و لو الهند معاهم كمان باي باي

[MaXx]

اتفاقية الجات الملزمة لمصر بالغاء الجمارك علي السلع الاوروبية هيبدأ تطبيقها علي السيارات بداية شهر يناير القادم ( قادم ايه ده كلها كام يوم ) هيبقي في تخفيض كل سنة بنسبة 10% من قيمة الجمرك الاصلي

يعني علي السيارات ال 1600 سي سي و اللي بتهم الفئة الاكثر من الشعب سعر السيارات الاوروبية هينزل 4000 جنيه لكل 100 الف ,, كل عام ,,, لكى يصل سعر السيارة التي تباع اليوم بمبلغ 100 الف الي 60 الف بعد عشر سنوات ,,,

في نفس الوقت ,,, السيارات ال 2000 سي سي و ما فوقها ,,, عليها جمرك 135% ,,, يعني تخفيض سنوي في سعر السيارة التابعة للفئة دي 13 الف و نص الالف لكل 100 الف جنيه

يعني مثال ,,,


يعني هيبقي قدامك كوردوبا مثلا ولا لينيا بسعر 60 الف و فيرنا او لانوس !

يبقي قدامك فولكس جيتا ب 110 الف ( 60% من التمن الموجود 184 الف ) مقابل سيراتو و كروز و الانترا

يبقي قدامك جولف 1600 سي سي ب 90 الف مقابل I30 ب 115,,,

و الجولف ال 1400 TSI هتبقي ب 132 الف ,,,

اعلي فئة في البرافو اللي دلوقتي ب 170 الف هتبقي ب 102 الف ,,,

ال فيات سيينا هتبقي ب 40 الف فقط ,,, ( حلوة اوي سعرها كده و لو يشيلوا الضرايب بقي هههههههههههههه)



Mercedes C200 Elegance Kompressor 1800 cc سعرها النهاردة 388 الف بعد انتهاء ال 10 سنوات نقسم السعر علي 2.35 ,,, يبقي سعرها 165 الف ( سعرها مش قليل برضو بس احنا كنا فين و بيقينا فين ؟ ptmnlo123per1127 )

BMW 320i جميع الكماليات و فتحة سقف 2000 سي سي سعرها ينزل من 360 الف ل 153 الف فقط

BMW 525i و 2500 سي سي سعرها ينزل من 585 الف ل 250 الف ههههههههههههه

اللي جاي اقوي ,,,

Porsche Panamera سعرها حاليا في التوكيل 2 مليون و 800 الف ,,, بينما سعرها علي الموقع في بورش ,,, ما بين 530 و 730 جنيه الف للفئات s , 4s , Turbo

و بكده الوكيل بيضرب 300 الف مكسب في جيبه لان اغلي واحدة فيهم هتبقي 730 الف مضروبة في 3.47 ( قيمة السيارة + الجمرك + الضريبة ) و طبعا الموجودة في معارض الوكيل ما اعتقدش انها اعلي فئة ,,,

دي بقي سعرها هينضرب ضربة موجعه ,,, لان كل العملية انك تضرب السعر في قيمة الضريبة ,,,

730 الف مضروبة في 1.45 ( قيمة السيارة + الضريبة ) الناتج هيكون 1.058.500 يعني ممكن الوكيل يبيعها لو هياخد برضو 300 الف واكتر ( افترا و الله ) تبقي ب مليون و نص ,,, في حين انها كانت بتتباع ب 3 و فئة اقل ,,,



من الاخر اي عربية اقل من 1600 سي سي و حتي ال 1600 سي سي نفسها ,,, اضرب سعر العربية الحالي في 60 و اقسم علي 100 يديك السعر المتوقع بعد 10 سنوات لما تشتريها زيرو

و اي عربية فوق ال 1600 سي سي اقسم سعر العربية علي 2.35 جبتها منين انا ؟
( العربية تمنها مثلا 500 الف = س + 1.35 س ) حيث س هي قيمة السيارة قبل الجمرك
يبقي ال 500 الف = 2.35 س ,,, س = 500 الف مقسومة علي 2.35 ,,,






و بعد كل ده ,,, السعر المفروض يبقي اقل كمان لان الضريبة كانت بتتحسب علي سعر العربية و قيمة الجمرك ,,, و كده هتبقي الضريبة تتحسب علي سعر العربية بدون الجمرك


يعني الاسعار هتقل كمان عن اللي فوق خصوصا الحاجات اللي فوق ال 1600 سي سي
علي الجانب الاخر ,,, الاتفاقية بين مصر و اوروبا يعني هتفضل الجمارك عالية علي السيارات الاسياوية كلها ,,,




و كتير بقي و انت جاي و و انت رايح ,,,



من الاخر اضرب سعر السيارة اليوم في 60% يديك سعر تقريبي للعربية بعد ما تشيل الجمرك منها بعد تمام انتهاء ال 10 سنوات ,,,



اكيد وكلاء السيارات الاسياوية هيحاولوا ينزلوا الاسعار علي قد ما يقدروا علشان يحافظوا علي الميزة اللي خلتهم يبيعوا اصلا ( السعر القليل )

بس هل هيقدروا ينزلو من السعر 40% ؟! علي مدار ال 10 سنوات

ما اعتقدش تماما



بنزول سعر السيارات الاوروبية بالشكل ده ,,,سعر المستعمل هينزل مش في الارض ده هينزل تحت التراب ,,, لما الايبيزا مثلا تبقي سعرها بالكتير 70 الف ,,, مين هيفكر يشتري I10 ولا a113 ولا باندا ولا اي عربية هاتشباك جديدة ,,,

تخيل بقي المستعمل سعره هينزل ازاي ,,,

يعني سعر اعادة البيع اللي تاعبين صحتي بيه في المنتدي هنا مش هيبقي مقياس لاي عربية علي الاطلاق ,,,

( حتة صغيرة المصريين اصلا اغلبهم العربية بتعد معاه اكتر من 5 سنين و مش بتوع تغيير عربيات ,,, الواحد منهم يجيب العربية يفضل سايقها لحد ما تموت منه و لما تموت يغيرلها كل حاجة بس ما يغيرهاش و اكبر دليل علي كلامي العربيات القديمة الكتير ,,, كلمة قديمة هنا معناها ان الشخص يمتلك السيارة لاكثر من 5 سنوات شوف انت بقي العربيات اللي من السبعينات )




و من هنا بقول الاوروبيون قادمون و بقوة و بجد انا متفائل لمصر و المصريين و مبسوط انهم هيركبوا عربيات محترمة اوي و بسعر كويس ( بس لسه في ضريبة مبيعات )





تعقيب اخير ليه ادفع ضريبة غير مباشرة و انت اصلا بتاخد مني ضريبة مباشرة ؟

يعني تاخد من مرتبي قبل ما اقبضه نسبة و بعدين كل ما اجي اشتري حاجة تقلبني في نسبة من تمن الحاجة ؟!

قلة ادب صحيح ptmnlo123per111




خلص الموضوع
_________________________ __

لو معلوماتي غلط في اي جزء من الموضوع يا ريت حد يقول ,,,

انا عدلت الموضوع بتاع 4 مرات لحد دلوقتي علشان يبقي شكله كويس ,,,

و كمان اتكلمت مع ناس عن التأثير ده ,,, لا حول الله يا رب ,,, الناس كان اغلب الردود ,,, مش مصدقين ان ممكن ده يحصل ,,, احنا وصلنا لمرحلة مرعبة من عدم التفاؤل في البلد دي ,, و الرد الاقوي اكيد الحكومة هتعمل حاجة علشان ده ما يحصلش و الاسباب كتير اوي ( تاخد فلوس زي ما كانت بتاخد ,,, عدد العربيات ما يزدش اوي ما هي مش ناقصة زحمة وخد اسباب لما تتعب و يجيلك احباط )

[telatfy]

لم يتحدث احد عن تخفيضات 2000 سي سي خلال السنوات القادمة لتصل الى 0 فى عام 2019 يجب مراعاة هذة التخفيضات جديا

[MaXx]

تم التعديل الموضوع خلال ردك ,,, انا اهملتها فعلا في اول ما كتبت الموضوع ,,, بس بعد كده قلت دي هتتأثر اكتر بالتعديل في الجمارك ,,, شوف تاني كده و قولي رأيك ,,, ptmnlo123per1127

[د/احمد]

شكرا يا اخ ماكس بس الكلام ده هيتطبق كمان 10 سنين يعنى سنه 2020
ومحدش عارف ساعتها هيكون سعر اليورو كام بالضبط.
سنة 2000 كان اليورو بيتباع بحوالى 4جنيه مصرى حاليا سعر اليورو 8 جنيه وسبعه قروش
يعنى سعر اليورو تضاعف فى 10 سنين
وبحسبه بسيطه لو استمر الاقتصاد المصرى ماشى بنفس الطريقه هيكون سعر اليورو 2020 فى حدود 16 جنيه ( الله تعالى اعلم يمكن اقل يمكن اعلى انا مش خبير اقتصادى)
بس دى برضه فرضيه لا يمكن تجاهلها وهتكون النتيجه المحصله لهذه الفرضيه ازدياد اسعار السيارات وليس انخفاضها.
من ناحيه اخرى قد تفوم دول شرق اسيا واليابان بتخفيض سعر عملتها امام الدولار لمواجهة مثل هذه الاتفاقيات لتظل منتجاتها لاسيما السيارات تحظى بميزه تنافسيه امام الصناعه الاوروبيه .
والمتأمل فى احوال الاسعار فى مصر يجد العجب فبعد انخفاض الاسعار عالميا بسبب الازمه الاقتصاديه زادت الاسعار فى مصر لمصلحة حفنه من التجار على حساب المواطن المصرى البسيط.

[koky_90]

خبر جامد اوووى

بس عشر سنين عمر برده ptmnlo123per1106ptmnlo123 per111