سؤال عن موقف حصل في نقطه تفتيش علي الطريق

[Dr/Mohammed]

سلام عليكم
ازيكم جميعا
معلشي صدعتكم بيا بس في مفجاه كده ان شاء الله ناوي ابقي اقولهالكم بس اخلص امتحاناتي الاسبوع ده وبناخد راي ابو نورا ( م/وائل ) وبعدين بعضرها عليكم ان شاء الله

نخش في الموضوع بقي

دلوقتي انا ليا سؤال

هو غلط ان الابن ياخد عربيه والده ويسوقها

السؤال غريب

الموضوع اني خت عربيه والدي ورحت بيها مشوار ووقفني ظابط وقالي فين الرخص ووريته رخصي قالي رخص العربيه وريته رخصه العربيه
قالي دي مش عربيتك قولتله دي عربيه والدي قالي طيب فين التوكيل علشان تسوق عربيه والدك
انا استغربت بصراحه
قولتله ازاي يعني عربيه والدي وهايعملي توكيل علشان اركبها وبعدين رخصه العربيه اهي ورخصتي اهي ايه الغلط
ولا هو في قانون جديد بيمنع ان حد ميسوقشي عربيه بترخيص اسمه
بيني وبينكم انا كنت بتكلم وخايف لعاود يكون فعلا مينفعشي امشي بيها وهي مش مترخصه باسمي
المهم هو حس بالخوف فيا ووقفني يجي ربع ساعه علي جنب الطريق لحد ما كلمت والدي وهو اتصرف
بس السؤال
هو يعني ايه توكيل علشان اسوق عربيه والدي ولا الظابط ده كان فاضي وبيتسلي

معلشي بجد تعبتكم بس لان الموضوع ده ضايقني قوي

[خالدخليفة]

قانونا محتاج طبعا لان افرض ان فى مشاكل بينك وبين والدك لاقدر الله وانت واخدها من وراه او سارقها منه هما بيفكرو كده لكن طبعا معظمهم بيعديها وبدليل انه حب يترازل عليك انه وافق على مكالمة الموبايل لانه ممنوع يرد على موبايلات اصلا افرض انت بتكلم واحد عامل فيها والدك طبعا هو قانونا من حقه لكن هو بيحس ان اللى ادامه صادق والا كداب ويبتدى يتسلى بعد كده ربنا يكفيك لالشر ويحميلك لعائلتك ان شا ء الله ثم هو فين الكمين ده

[pro mada]

الظابط ده بيستهبل و كان بيرزل عليك
معلش يا ما هنعيش و يا ما هنشوف
و بعدين هو في حد بيسرق ابوه

[lancer.style]

على الفكرة الظابط دة شكلة رخم فعلا

بس زى ما الاستاذ خالد قالك هيا اة ممنوع بس بيعدوها

لانى انا علطول ماشى بعربية ابوية و بقف فى كماين عادى جدا

بس هو شكلة كان بيعيش شوية

[mesho70]

السلام عليكم

سيدى انا ذهبت للمرور فعلا وانا برخص عربيتى الجديدة من اسبوعين

وسألت موظف التامين انى عايز أأمن على سائق ( على حد معلوماتى )

علشان متتكتبش على ظهر الرخصة " غير مأمن على سائق " لكن موظف

التامين مفهمش حاجة ومعرفش يرد ذهبت الى موظف التراخيص على

شباك المرور فقلى " طالما اللى هيسوق العربية غيرك وهى مش باسمة

ومعاة رخصة خاصة - يعنى مش مهنية - يمكن يسوقا عادى ومفيش مشكلة "

عالرغم من ان اكتر من مرة كنت بسوق عربية اخى ومعايا رخصة خاصة

وكان احيانا عسكرى مرور يسألنى على التوكيل ومكنش معايا حاجة زى كدة

بس كانت بتعدى ومفيش مشكلة حصلت وان كنت بعد كلام حضرتك ان شاء الله

هاروح المرور واسأل على الموضوع تحديدا ضابط المرور شخصيا

تعرف كمان يا سيدى انى كنت شارى عربية جديدة باسمى من 8 سنوات

وكنت جاى من الاسكندرية فى طريقى للقاهرة وكان اخى اللى سايق والنمر

تجارية وضابط المرور فى ( مرغم) اول الاسكندرية سحب الرخص بتاعة اخى

وبتاعة النمر التجارية وقمت بدفع غرامة 100جنية وايقاف الرخصتين شهر

مع انى كنت مأجر النمر التجارية بـ 70جنية يوميا ودفعتهم لمدة شهر 1000 جنية +

غرامة المرور ودة بعد ما تعاطف معى صاحب الرخص وكل دة علشان راكبين 2 فالعربية

بالرغم من ان القانون بيقول انى من حقى ان استعين بسائق والراكب التانى يكون صاحب العربية !!!!!

لكن تقول اية ؟؟ وتروح لمين ؟؟؟ قول ياباسط

على فكرة بينى وبين الاسكندرية 1000 كم نعم الف يعنى شوف نقطة تفتيش؟!؟!؟!؟!؟!