طريقة تجديد الرخصة بدون ما تدفع رشاوى او يتنصب عليك بالخطوات ومن اوسخ مرور

[وائل احمد السيد]

اولا لازم تتعامل مع الموظف المختص لا تعطى اوراق لشخص لا تعرفة خارج شبابيك الخدمة لانهم نصابين ولو اعطيتة ورقة علشان يخلصهالك هتقع ما بين فكية وهيكلك أكل
كنت اليوم بمرور السلام بجدد الرخصة فالخطوات هى كالتالى وزى ما حصل معايا طوال اليوم هناك وهى كالتالى ..
( اولا ) بتشترى اوراق فحص فنى وبيئى وطفاية حريق
( ثانيا ) بتاخد الاوراق والعربية وتدخل على الفحص الفنى وهنا لا تعطى الورق الا للشخص المسئول عن اخد بصمة العربية موتور وشاسية وتخلص ورقة الطفاية بنفسك لائما هيتنصب عليك فيها من النصابين الموجودين هناك وهو كتير اوى
( ثالثا ) بعد ما تخلص الفحص وكلة تمام هما كدة مش هيحتاجو السيارة تانى خالص خرجها من مكان الفحص واركنها فى مكان أمين لانك هتقعد فترة طويلة لحد ما تخلص وتاخد الرخصة وغالبا هيكون الساعة 4 العصر
( رابعا )اعمل تأمين اجبارى ودة بيكون(( من سنة او اتنين او تلاتة ))حسب الفلوس اللى معاك فأحسبها صح الاول السنة ب103 جنية تقريبا فلو 3 سنين بيكون المبلغ310 جنية
( خامسا )شراء ورقة المخالفات من مكتب التصوير وتدبس معها الرخصة وتذهب الى شباك صرف اللوحات وتديها الى الموظف اللى هناك وهو هياخدها منك ويقولك انتظر بمكان تسليم الرخص ولما يتأكد من انة هو صرف لك اللوحات هيكتب لك فى الورقة السنة اللى صرف لك فيها اللوحات الخاصة بعربيتك وبيختم الورقة
( سادسا ) بتاخد الورقة وهى مختومة الى شباك المخالفات لو فية عليك مخالفات بتدفعها ولو مافيش بتدفع فقط 5 جنية وتاخد مخالصة مختومة بانك دفعت المخالفات او ان مافيش عليك مخالفات ثم تجيب ملف فاضى تكتب علية اسمك ورقم عربيتك بخط كبير وتشترى حافظة تقدير رسوم وضرائب
( سابعا ) بتذهب للموظف المختص بالتجديد بيقدر لك الضرائب ودة على حسب مانت دفعت التأمين الاجبارى (( سنة او اتنين او تلاتة )) وتقريبا السنة بتكون 220 جنية فلو ثلاث سنوات هيكون 660 جنية او اكثر قليلا وبيتم دفعهم بالخزينة وايضا يتم شراء دمغات للثلاث سنوات ب35 جنية وايضا تشترى منة عدد 3 ورقات ضرائب وتملاهم بنفسك وبيكون فيها الاسم والرقم القومى والعنوان ورقم العربية ورقم الشاسية ورقم الموتور (( تملا الثلاث ورقات كلهم بخط واضح ))
وتصور البطاقة وتصور الرخصة بالمرة وتحط دة كلة بالملف وتقدمهم على الشباك للموظف المختص وبعد ما يراجع الورق كلة ما عليك الا انتظار الفرج ومعاة الرخصة
ودة اللى حصل معايا النهاردة وكان اسود يوم فى 2014
تحياتى للجميع

[احمد على 1999]

تسلم تسلم تسلم
بجد ربنا يكرمك

[ahmed_eng2001]

ربنا يباركلك و كل مرة ان شاء الله متتعطلش فى المرور ....

انا بس عاوز اقول لحضرتك انك كدة متمرمطتش و لا حاجة .... ليا واحد صاحبى فضل فى الموضوع ده 5 ايام ما بين مرور الزقازيق و مرور المنصورة

تقدير الضريبة و التأمين الاجبارى ... يتم على ال سى سى للعربية
تقبل مرورى

[وائل احمد السيد]

السلام عليكم
طبعا تقدير الرسوم والضريبة بيتم على السى سى للعربية كل ما يكون السى سى عالى بيعلى المبلغ علشان كدة تلاحظ ان معظم اللى معاة عربيات فوق ال 3000 سى سى بيبيع العربية لان الضريبة عالية جدا بس مش عارف كام ....
تحياتى للجميع

[MIDOO10]

يارب ينظرو للمرورو نظره عطف ويبقى شباك واحد للتعامل انا بمرور فيصل تروح تجيب بيانات لوحات قديمه انا مسلم القديمه فى سنه 2009 ولحد الان بطلع بيان ليها قبل ما اطلع المخالفات ودى فيها ساعه تضيع للوقت وبعدين اروح للنيابه اجيب مخالفات والباقى زى ما الاستاذ/ وائل احمد السيد ما بيقول