افيدوني فى نقل ملكية 127

[MAHMOUD HATEM]

السلام عليكم

انا معايا عربية 127 موديل 84 شاريها من 4/2013 والرخصة لسة لحد 2015 ان شاء الله ,, ومعايا العقد والتوكيل وكل حاجة

دلوقتي انا ان شاء الله هنقل الملكية ليا ,, وانا تبع المرور المالك القديم ,, مرور فيصل

فاياريت اللى يقدر يفيدني فى الخطوات من " أ " لـ " ي " ,, واطول مدة ترخيص كام سنة

ومعلش هاتقل عليكم المصاريف بتبقي كام والضرايب والحاجات دى عشان لسة اول مرة

[ahmed_eng2001]

حجاوب حضرتك على حد علمى البسيط .. على ما احد الخبراء يجاوب حضرتك بالتفصيل ان شاء الله

حضرتك بتجيب مخالصة من نيابة المرور الى العربية تبعها ( مخالفات ) بالتوكيل الى مع حضرتك ..و من الممكن انهم يطلبوا اصل اللوحات المعدنية !!! تاخدالمخالفات و تروح شباك المرور ومعاك العقد و التوكيلات ( فى حالة وجود اكتر من توكيل ) حتى المالك الاصلى و تقوله انك عاوز تعمل نقل ملكية .... و حيوديك تعمل فحص ... و تغير التأمين الاجبارى
انا سمعت انك لازم تجيب استعلام امنى من قسم الشرطة ... علشان حوادث السرقة للسيارات فى الايام الاخيرة
و بعد كدة حضرتك حتجدد الرخصة حتى 2015 من غير ما تدفع ضريبة على السيارة فى هذه السنة
و بكدة ... حتطلعلط رخصة باسمك ... و لمدة عام واحد .. و فحص حتى 2017 ... و تيجى السنة الجاية ان شاء الله تجدد الرخصة فقط .. مع شهادة مخالفات جديدة .. و تجديد 3 سنوات كحد اقصى
و تيجى سنة 2017 ... تفحص تانى .. و تقف فى الشباك تانى و ورق و دوخة تانى .. علشان بس تكتب فى الرخصة الفحص حتى سنة 2020

انت بتعمل فحص فى حالة نقل الملكية .... او فى حالة مرور 3 سنوات على الفحص السابق ...
نقل الملكية ملهوش دعوة بالضريبة السنوية على السيارة

علشان متوجهش دماغك من مشوار المرور .... تعمل الاثنين فى يوم واحد .. و تفضل تعمل كدة ... نفس يوم ما تجدد تفحص و تخلص نفسك

فحضرتك ممكن تستنى كمان سنة ... و تفحص و تنقل الرخصة و تدفع 3 سنوات تجديد و تخلص نفسك

او حضرتك ممكن تروح و تغير رخصة بس باسمك و تخلى الفحص السنة الجاية

نصيحة واحد صديقى ... لما تشترى عربية ... اول حاجة تعملها تروح تغير الرخصة باسمك و تفحص و بالمرة تجدد 3 سنوات ... علشان تكون خلصت من مشوار المرور ل 3سنوات قادمة باذن الله

فى انتظار احد الاخوة العالمين اكتر بموضوع المرور ده

[MAHMOUD HATEM]

هى الرخصة لسة لحد 5 / 2015 فا استني لحد ماتخلص واروح انقل واجدد ولا ايه

[ahmed_eng2001]

عذرا ... دى وجهات نظر ... انا لو مكانك كنت رحت نقلت ملكية تانى يوم ما اشتريتها ... و جددت 3 سنوات و فحصت و خلصت قصة المرور دى تماما ... انا مبحبش يكون عليا ورق او اى اجرائات تتعمل و اسيبها ... و بحب دائما فى البيع و الشراء تكون المعاملات اقصر ما يمكن
لو حضرتك تقدر تستنى كمان سنة ... يكون اوفرلك و انا ما انصحش بكدة
لو مش حتقدر .. اتكل على الله روح و جدد 3 سنوات و انقل ملكية و افحص كله مرة واحدة
و ربنا يوفقك للى فيه الخير

[MAHMOUD HATEM]

انا كان نفسي اعمل كدة بس وقتها العربية كانت محتاجة سمكرة ودوكو والواحد كان على الحديدة بعيد عنك