اشتريت نيسان صنى 2013

[teta]

السلام عليكم ورحمة الله وبركاتة
بفضل الله ربنا رزقنى واشتريت سيارة نيسان صنى 2013 وحتى التاريخ 27-4-2014 السيارة لم تعمل 5300 كيلو متر عشان انا محافظ عليها جدا بالأضافة انها بتخرج من المشاوير المهمة فقط المهم انا حاسس انها بتاكل بنزين وعايز اعرف معدل استهلاكها كام فى 100 كيلو مثلا ولو رايح الشغل يعنى حوالى 35 كيلو رايح جاى يا ترى ماهو معدل الأستهلاك علما بأن الطريق الدائرى عندى مفتوح وبجرى حوالى 110 كيلو على العداد. ارجو الأفادة
مع خالص تحياتى

[zing0]

يعنى حضرتك عاوز تعرف إزاى بنقيس معدل الإستهلاك؟
-------------
مبدئياً تروح تفول التانك للآخر و تآخد قراية العداد (عداد الكيلومتر)
تكون مفضى شنطة العربية من الكراكيب و الحاجات إللى ملهاش لازمه
تسوق بالشكل الطبيعى بتاعك, و لا تحرق على الغيارات و لا تسوق سواقة رياضية و عنيفة و لا تسوق سواقة هادية زياده عن اللازم, و تخلى متوسط سرعتك على 90 كم/س (فى المتوسط لو الطريق مفتوح)
بعد مشوار طويل (سفر مثلاً) عديت فية الـ 100 كم, ترجع تفول للآخر تانى و تشوف فى البنزينه أخدت كام لتر بالضبط (عداد الليترات مش الفلوس)
تقسم المسافه على عدد الليترات يديك كل لتر بيعمل كام كيلو متر
تضرب الناتج فى 20 علشان تعرف فى الصفيحه بتعمل كام كيلو

مثال للتوضيح:
العداد مع تفويل التانك أول مرة كان 5500
بعد المشوار فولت التانك و العداد بقى 5700
و أخدت 25لتر بنزين

5700-5500 = 200 كيلو
200 كيلو / 25 لتر = 8
يعنى كل لتر بيعمل 8 كيلو
8 * 20 (صفيحة البنزين دايماً بتكون 20 لتر) = 160

اللى فوق ده مثال و الأرقام دى طبعاً مش واقعيه, للتوضيح فقط

[احمد على 1999]

طبيعى الاستهلاك يبقى مثلا فى حدود 240 كم فى الصفيحة
لان مشوارك رايح فى حدود 17 كم على طريق مفتوح نصهم حتكون العربية لسة مسخنتش لدرجة حرارة التشغيل المثالية لعملية الاحتراق الكامل فالاستهلاك لازم حيبقى عالى

و انت راجع برضه حتكون العربية بردت فحيتكرر نفس السيناريو

[teta]

السلام عليكم ورحمة الله وبركاتة
الأستاذ Zing
أشكرك كثيراً معظم ما كتبته والله ما اعرفة لذلك اشكرك كثيراً وسوف افعل كل ما كتبتة واخبرك النتائج
مع خالص تحياتى
د/ السيد البسطامى السيد (teta)