ربنا يستر ... و الله انا قلق جدآ

[حسين122]

السلام عليكم
يا جماعة الخير
الكمال لله وحده
نويت و الله الموفق اني اشتري عربية سكوربيو ماهينتارا ديزل 7 راكب 2200 سي سي موديل 2012 زيرو فرامل ايه بي اس و اي بي دي اوتوماتك تكييف و بارور و مثبت سرعه و طارة مالتي فانكشن
العربية ليها مجموعه مميزات على حد علمي :
- العربية عاليه عن الارض
- العربية زيرو اوتوماتك و و و و و و و
- العربية 7 راكب و دي مسئلة مهمه لأن ربنا من عليا ب 4 ولد و ثلاثة بنات غير انا و زوجتي و والدي كتير بيكون معايا في المشاروير
- سعرها 128 الف و ممكن تنزل شويه و بصراحة دي يادوب على قد الميزانيه المتاحه بالاخص في ظروف السوق المترديه اليومين دول
- العربية زيرو ممكن نجيبها عن طريق البنك و الله اعلم او عن طريق كونتك كار
- العربية مظهرها الخارجي معقول نسبيآ ( مسئلة ازواق ) هيه مش ممتازة بس في الاهم من المظهر الخارجي

العربية ليها سلبيات :
- العربية هندي مش ياباني ( كان نفسي في كده )
- صوت الموتور عالي برضه نسبيآ يعني لو حضرتك كنت راكب بي ام و ركبتها هتحس بمشكله لكن لو كنت راكب عربية تعبانه ف الحضيض و تركبها هتحس انه كله تمام بس بصراحه ما جربتش اسافر بيها
- الصيانه بالكامل داخل البافارية و عرفت من احد ملاكها انه ممكن تتصل مع بعض المهندسين هناك يعملوا لك الصيانه بره التوكيل
- ضريبتها ف السنه 2718 جنيه!!!!!!!!!
- بالنسبه للعفشه هيه نفس عفشة الديماكس الربع نقل و ناشفه بالنسبه للانسر و خلافه
لو سمحتم تدعوا لي بالتوفيق و لو في تجربة فعليه لحد منكم ياريت بقول بس يوضح هوه خبرته ايه يعني ما يقارنهاش بالمرسيدس مثلآ
يقارنها بعربية ليها نفس الامكانيات من حيث الاتساع بالتحديد و في نفس متوسط السعر مش الضعف مثلآ
و شكرآ
المفروض اتمم الصفقه خلال 20 يوم مثلآ
أنا بس عاوز أوضح أن شكل العربية أو نعومة العفشه و صوت المكنه مش بالخطورة الكبيرة بالنسبة لي لو مفيش عربية غيرها بنفس السعر و المساحه
أنا كنت راكب 127 بابين و بعدهالانسر سبورت زيرو و بعدها رجعت لل 127 و بعدها لانسر كريستاله يعني اتمرمط صح و ده في الفترة المتأخرة بس
و لله الحمد بأسوق من 30 سنه من اول ال131 السيات لحد الأوبل فكترا و بأعرف اتعامل و الحمد لله
لكن كل خوفي من قطع غيارها في المستقبل
في ناس بيقولوا متوافرة ف التوكيل و ناس بتقول ممكن توفقلها قطع غيار تانيه
و لما بأدور على عربية تانيه ذي الجراند تريوس بألاقي فرق سعر و ضعف ف الثبات و ضيق مساحه و عزم موتور أقل
لو في حد عنده نصيحه يتفضل.....
الله المستعان

[nktis]

هو عيبها انها ديزيل فسحبها ضعيف , انا معايا ديمكس و علي كلامك هي نفس العفشه , العفشه كويسه بس ناشفه في المطبات بس من الاخر عفشه عربيه تشتغل و تتحمل غير الملاكي .
طيب مفكرتش في الكارينز او جراند تيريوس .؟؟.

[ahmed_eng2001]

الماهيندرا عربية مش منتشرة .... فللأسف ... مش حتلاقى ناس كتير تكلمك عنها و عن عيوبها ....
و ده معناه ان حضرتك حتغامر و تكون من اوائل الناس ( فى الناس الى تعرفهم ) الى تشتريها

خلى بال حضرتك ... فيه فرق كبير انك بتسأل على قطع الغيار بصفة عامة و حضرتك لسة لم تمتلك السيارة .... و بين انك مالك السيارة و بتدور على قطعة غيار معينة ... بمعنى اخر .... حضرتك سألت عن العفشة و الناس قالت انها نفس عفشة لدبابة ... تيجى حضرتك تعمل صيانة تكتشف .. ن فيه كاوتشة واحدة فقط مش زى الدبابة ... و الكاوتشة دى مش موجودة ... كدة الكلام اختلف .... ده على سبيل المثال
استخير ربنا و توكل على الله و ربنا يوفقك

[هانى ظريف منصور]

طيب ما تشوف السوزوكى فاملى عربيه حلوة والتوكيل اعلن عن نزولها الاسواق اوائل شهر 4 وهى بردة 7 راكب ممكن تكون غاليه شويه بس مضمونه