فزورة احتار فيها الناس !!!الشاهين بتسخن في السريع بس و في الزحمة لا و عجبي؟؟؟؟ الحلقة الاخيرة ان شاء الله
بعد التوصل الي الحل للسخونية بشيل سرابنتينة التكييف و جاء الصيف و الواحد في عرض نسمة هوا في عز الزحمة اتخذت القرار بتركيب السربنتينة و تشغيل التكييف و ملعون ابو العربية (بالبلدي حنضحي بالمريض عشان اهله يعيشوا) و بعد قراءات مفصلة في الوضعية المثلي للسربنتينة وجدت الاتي يجب تركيب سربنتينة التكييف بحيث لا تبعد عن الردياتير بمسافة تسمح بتكوين جيوب هواء ساخن بينهم و يجب ايضا ان تكون مروحة الردايتر بعيدة بقدر الامكان عن مروحة سربنتينة التكييف (ما يكونوش علي خط واحد) المهم توكلت علي الله و ايدي علي ايد بتاع التكييف و ركب و اشحن يا ابني و التكييف تمام يا بيه و اطلع علي الطريق و جرب و هوب هوه هوه نفس العيب قلت مش مهم تسخن تتنيل المهم انا اتكييف لغاية ما اغورها في داهية و ابيعها.
المهم مشيت بيها شهر و في يوم و انا نازل الساعة 4 ظهرا و علي منزل كوبري الجامعة الحرارة عالية جدا و المروحة مش شغالة قلت هي ناقصة الثرومتات ضرب و شغلت المروحة ديركت و برضه ما بتردش بحط ايدي علب الردياتير لقيته ساقع تلج فتحته لقيت مفيش ميه حطيت جركن ميه و لقيت دخان ابيض طلع من الموتور من تحت كاني دعكت مصباح علاء الدين و استنيت العفريت عشان اقوله عايز عربية جديدة المهم العفريت ما طلعش و الدخان هدي و لقيت رشاش ميه طالع من الموتور و بينزل علي الشكمان و يتبخر و يطلع دخان ، قفلت الكبوت و بصيت علي الحرارة لقيتها نزلت شوية جريت علي الميكانيكي . و للحديث بقية قريب قوي
|
16-01-2014, 12:08 PM
