انتبه لسيارتك

[YahiaAshraf]

بسم الله الرحمن الرحيم

كتب : Yahia Ashraf

من خلال خبرتى المتواضعة فى عالم السيارات و قرائاتى منذ سنين حبيت انى اعمل الموضوع ده بحيث انه يفيد الجميع باذن الله




1- لو انت سايق عربية اوتوماتيك ولاقيت فى العدادات عند خانة ناقل الحركة ولاقيت لمبة n منورة مع d يبقى كده يا باشا الفتيس فيه خلل او فيه حساسات مش شغاله و لازم تروح للتوكيل او ميكانيكى يحللك المشكلة بسرعة


2 - وانت سايق على سرعة عالية و لاقيت رعشة فى الدركسيون يبقى كده يا جميل العربية محتاجة ترصيص واتزان

3 - وانت سايق لو لاقيت فى عضة فى الفتيس و انت بتنقل النقلات يبقى كده الدبرياج فى حاجة يا معلم و لازم تكشف عليه

4 - وانت سايق و عمال تزود السرعة ولاقيت عداد ال اربى ام بيزيد من غير ما تزود السرعه يبقى كده الدبرياج فى حاجة او فيه تاكل فى اسطوانة الدبرياج

5 - لما تيجى تدوس فرامل وتلاقيه الدواسة بتوصل لغاية الارضية تماما يبقى كده الماستر الرئيسى للفرامل فيه حاجة او فيه تسريب لزيت الفرامل
6 - لما تدور عربيتك وتلاقى فيه دخان ازرق من الشكمان يبقى كده فيه استهلاك لزيت الموتور

7 - لو انت سايق فى طريق فى مطبات وحسيت بتطلع لفوق و تنزل لتحت او بتحس بصدمة المطبات و احنا فى مصر ما شاء الله ربنا يعوض علينا من المطبات دى يبقى كده المساعدين فيهم عيب ولازم يتغيروا

8 - وانت سايق يا باشا بسرعة وسيبت الدركسيون ولاقيت العربية عماله تيجى يمين و شمال يبقى كده العربية محتاجه ضبط زوايا او العجل محتاج يتزود
9 - لو انت سايق بسرعة و جيت تدوس فرامل خفيفو حسيت برعشة فى رجلك يبقى كده طنابير الفرامل اللى قدام فيهم حاجة

10 - لو لاقيت لمبة البطارية نورت فى العدادات يبقى كده البطارية فيها حاجة يعنى عايزة تتغير مثلا او الدينامو فيه عيب او ان سير الدينامو مقطوع او مش مشدود

11 - لو لاقيت لمبة الزيت نورت يبقى تنزل يا باشا من العربية وتشوف مستوى الزيت لو مضبوط يبقى شوف لو فيه تسريب

12 - لو سمعت صوت زى زنه كده يبقى كده بلى العجل متاج يتغير

13 - وانت سايق وجيت تدوس فرامل و سمعت صوت صفارة يبقى كده تيل الفرامل محتاج يتغير

14 - لو لاقيت مؤشر درجة الحرارة بقى عالى يبقى كده فيه خلل فى منظومة التبريد

15 - لما تيجى تجيب الدركسيون يمين وشمال على اخرة وسمعت صوت زنة يبقى كده فى احتمال ان يكون فيه تسريب لزيت الباور او ان طلمبة الباور باظت

16 - لو رفعت غطا الردياتير والعربية مركونه و بارده ولاقيت الغطا من تحت فيه حاجة شبه الطحينه كده يبقى الميه اختلطت بزيت المحرك ولازم تفك وش السلندر و تغير الجوان

17 -لما تيجى تشغل العربية على السلانسيه ولاقيت صوت صفاةر و انت بتدور يبقى كده سير الباور و الدينامو و طلمبة الميه محتاج يتغير او يتظبط

18 - لو برده جيت تشغل العربية على السلانسيه ولاقيت العربية بتدور بطريقة يعنى مش منتظمة ( مش عادية يعنى ) يبقى كده منظومة تشغيل الموتور على البارد فيها عيب

19 - لو بصيت على زيت الدبرياج ولاقيت المستوى قليل يبقى كده يا اما فيه تسريب زيت او اسطوانة الدبرياج فيها تاكل

20 - لو فتحت غطا الردياتير و العربية باردة ولاقيت مية الردياتير قليلة او فيها صدا يبقى كده العربية محتاجز تزويد ميه او تغير الردياتير لو فيه صدا ( متكسلش يا عم الحج لازم يتغير )



وأخيرا كل سنة و أنتم طيبين و عيد أضحى سعيد عليكم جميعا باذن الله


تحياتى
Yahia Ashraf

[zing0]

الله ينور, بجد خلاصة الخلاصه
بس كنت عاوز أعرف فى رقم 18 معنى الكلام ده...

منظومة تشغيل الموتور على البارد

لأن أنا عندى العربية لما بأدورها الصبح بتعتل أوى, لازم من كذا مرة و لما بتدور الأر بى إم بيكون واطى جداً و العربية كلها بتتنفض (مش بتترج بس), و طبعاً بتحتاج فترة تسخين طويلة شوية, بس بعد ما تسخن, تتضبط عادى خالص.
العيب ممكن يكون من أيه؟

[YahiaAshraf]

المشاركة الأصلية كتبت بواسطة zing0 الله ينور, بجد خلاصة الخلاصه بس كنت عاوز أعرف فى رقم 18 معنى الكلام ده... لأن أنا عندى العربية لما بأدورها الصبح بتعتل أوى, لازم من كذا مرة و لما بتدور الأر بى إم بيكون واطى جداً و العربية كلها بتتنفض (مش بتترج بس), و طبعاً بتحتاج فترة تسخين طويلة شوية, بس بعد ما تسخن, تتضبط عادى خالص. العيب ممكن يكون من أيه؟

عربية حضرتك نوعها ايه و موديل سنة كام ؟

[zing0]

عربية حضرتك نوعها ايه و موديل سنة كام ؟

لادا 2105 - 82

[YahiaAshraf]

المشاركة الأصلية كتبت بواسطة zing0 لادا 2105 - 82

تمام علشان كده وارد ان ده يحصل مع سيارة قديمة شوية لكن لو سيارة حديثة بتفرق بقى من حيث الاعراض التى تم ذكرها فى الموضوع

بالنسبة للمشكلة حاول تروح لميكانيكى متخصص يكشف على السيارة